गगन थापालाई ओलीको व्यङ्ग्य- संशोधन गरेर चिन्तक निस्किन खोज्या छन्, ठीकै छ

राजनीति

नेपाल लाइभ शुक्रबार, मंसिर २४, २०७८ १४:१८

फाइल तस्बिर

काठमाडौं- नेकपा (एमाले)का अध्यक्ष केपी शर्मा ओलीले कांग्रेस नेता गगन थापालाई जवाफ फर्काएका छन्। थापाले ओलीको 'समृद्ध नेपाल, सुखी नेपाली' आधारभूतरुपमै सही नभएको बताएको भोलिपल्ट ओलीले संशोधन गरेर चिन्तक बन्न खोजेको भन्दै व्यङ्ग्य गरेका छन्।

शुक्रबार बागमती प्रदेश संगठन कमिटीले १०औं राष्ट्रिय महाधिवेशनमा निर्वाचित टिमलाई बधाई एवं सम्मानमा आयोजित कार्यक्रममा बोल्दै ओलीले भने, 'समृद्ध नेपाल, सुखी नेपाली संशोधन गरेर समुन्नत नेपाल, सम्मानित नेपाली' कि के भनेर आएछ। संशोधन गरेर चिन्तक निस्किन खोजेको जस्तो देखिन्छ, ठीकै छ।'

उनले यसअघि पनि एमालेको 'आफ्नो गाउँ, आफैं बनाउँ' लाई पनि अनेक खालका नाममा परिवर्तन गरिएको उल्लेख गरे। गगनकै शैलीमा भने, 'गाउँपिच्छे सहकारी, घरैपिच्छे भकारी' पनि भनिएको थियो, भकारी रित्तो थियो कि भरिएको?'

उनले समृद्ध नेपाल, सुखी नेपाली राष्ट्रिय गन्तव्य रहेको बताए। उनले थपे, 'मूल गन्तव्य समृद्ध नेपाल सुखी नेपाली हो। यसभित्र राष्ट्रियता, लोकतन्त्र, समनाता, मानवअधिकार, वारतावरणीय सुरक्षा आदि यहीँभित्र आउँछन्।'

कांग्रेसको महामन्त्रीमा उम्मेदवारी घोषणा गरेका थापाले बिहीबार अवधारणापत्र सार्वजनिक गर्दै ओलीले अघि सारेको उक्त अवधारणामा आमनागरिक नरहेको दाबी गरेका थिए। उनले भनेका थिए, ‘एउटा पार्टी र नेताको मुखबाट सुन्नुभएको छ, समृद्ध नेपाल, सुखी नेपाली। त्यो र समुन्नत नेपाल र सम्मानित नेपालीमा आधारभूत फरक छ।’

उनले ‘समृद्ध नेपाल’का विषयमा व्याख्या गर्दै भने, ‘समृद्ध नेपाल नेपालमा एयरपोर्टको सङ्ख्या बढ्यो भने, चुच्चे रेल दुईतिरबाट आयो भने, पानीजहाज हुइँकियो भने, धरहराबाट हेर्न पाइयो भने हुन्छ। तर, समृद्धिभित्र रेल छ, चढ्ने मान्छेको अत्तोपत्तो छैन। भ्युटावर छ, तर तलका मान्छे त्यसबाट देखिँदैन।’

उनले ‘समुन्नत नेपाल’ अवधारणालाई नाप्ने स्केल हुने बताए। उनले थपे, ‘पाँच वर्षपछि देश समुन्नततर्फ कति गयो? त्यो नाप्ने स्केल हुन्छ। वंश, जात र लिङ्‍गको आधारमा प्राप्त गर्ने विशेष अधिकार आजभन्दा भोलि घट्दै गयो भने हामी समुन्नतितर्फ गयौं भन्छौं।’

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

७२ घण्टाभित्र माग सम्बोधन नभए आन्दोलन गर्ने कर्मचारीहरूको चेतावनी

विद्यालयको चाबी बोकेर काठमाडौं आउन विद्यालय कर्मचारीलाई निर्देशन

केन्द्राध्यक्षलाई काठमाडौं आउन शिक्षक महासंघको अपील