सहमहामन्त्री नपाएपछि केन्द्रीय सदस्यमा उम्मेदवारी दिँदै डिला संग्रौला

महाधिवेशन विशेष

नेपाल लाइभ शनिबार, मंसिर २५, २०७८ ११:४९

काठमाडौं– नेपाली कांग्रेसको जारी १४ औं महाधिवेशनमा नेतृ डिला सांग्रौलाले केन्द्रीय सदस्यमा उम्मेदवारी दिने भएकी छन्। यसअघि महिला कोटाबाट सहमहामन्त्रीको दाबी गरेकी उनले सो पद नपाएपछि केन्द्रीय सदस्यमा उम्मेदवारी दिन लागेकी हुन्।

महाधिवेशनअन्तर्गत शनिबार बिहान १० बजेबाट मनोनयन सुरु भइसकेको छ। हालसम्म किरण गुरुङले सभापतिमा तथा मानबहादुर विश्वकर्माले सहमहामन्त्रीमा उम्मेदवारी दर्ता गराइसकेका छन्।हालसम्म खुला तथा समावेशीमा गरी केन्द्रीय सदस्यतर्फ विभिन्न २५ जनाको उम्मेद्वारी परिसकेको निर्वाचन समितिले जनाएको छ।

मनोनयन दर्ता गर्न सभापतिका लागि ३० हजार रुपैयाँ, उपसभापति र महामन्त्रीका लागि २५ हजार रुपैयाँ, सहमहामन्त्रीका लागि २० हजार र केन्द्रीय सदस्यको १० हजार रुपैयाँ दस्तुर निर्धारण गरिएको कांग्रेसले जनाएको छ।

निर्वाचन समितिले मनोनयनको लागि आज साँझ ५ बजेसम्म समय निर्धारण गरेको छ। आइतबार दावी विरोध सकेर अन्तिम नामावाली प्रकाशन गरिनेछ। उम्मेदवारी मनोनयनका लागि २० स्थानमा व्यवस्था गरिएको छ।

मनोनयनमाथि दाबी विरोध सकेर २७ गते बिहान ८ बजेदेखि मतदान सुरु हुने कांग्रेसले जनाएको छ। कांग्रेसमा चार हजार ७४३ महाधिवेशन प्रतिनिधि रहेका छन्। निर्वाचनबाट देशभरबाट आएका महाधिवेशन प्रतिनिधिले १३४ पदाधिकारीसहितको केन्द्रीय समिति चयन गर्नेछ। पदाधिकारीतर्फ एक सभापति, दुई उपसभापति, दुई महामन्त्री, आठ सहमहामन्त्रीको निर्वाचन हुने व्यवस्था छ।

त्यसैगरी ३५ खुला केन्द्रीय सदस्य, महिला नौ, प्रत्येक प्रदेशबाट तीन जनाका दरले २१, दलित नौ, आदिवासी जनजाति, १५ खस आर्य १३, मधेसी नौ, दलित चार, मुस्लिम तीन, पिछडिएको क्षेत्रबाट एक अल्पसङ्ख्यकबाट एक, अपाङ्गताबाट एक सदस्य निर्वाचित हुने व्यवस्था छ। कोषाध्यक्ष भने निर्वाचित केन्द्रीय सदस्यमध्येबाट निर्वाचित हुने व्यवस्था छ।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

केन्द्राध्यक्षलाई काठमाडौं आउन शिक्षक महासंघको अपील

भोलिदेखि शिक्षक आन्दोलन बिहान १० देखि २ बजेसम्म हुने

गभर्नर छनोट सिफारिस समिति सदस्यबाट विजयनाथ भट्टराईले दिए राजीनामा