कुलमानबारे सरकारलाई गगनको सुझाव, ‘राम्रो काम गर्न नसके नराम्रो पनि नगर्नू ’

राजनीति

नेपाल लाइभ शनिबार, फागुन २४, २०८१ १७:५९

काठमाडौं – नेपाली कांग्रेसका महामन्त्री गगन थापाले ऊर्जामन्त्री दीपक खड्कालाई लक्षित गर्दै राम्रो काम गर्न नसके नराम्रो पनि नगर्न सुझाब दिएका छन् । नेपाल विद्युत् प्राधिकरणका कार्यकारी निर्देशक कुलमान घिसिङप्रति इंगित गर्दै थापाले अहिले सरकार नै एउटा व्यक्तिको पछि लागेको जस्तो देखिएको टिप्पणी गरेका हुन् ।

उनले कांग्रेसले चाहेकै दिन एमाले अध्यक्ष केपी शर्मा ओली नेतृत्वको सरकार ढल्ने समेत बताएका छन् । सिन्धुलीमा पार्टीको क्षेत्रीय सम्मेलनलाई सम्बोधन गर्दै उनले कांग्रेस अहिले सरकार बदल्ने पक्षमा नरहेको बताए ।

उनले भने, ‘चुनाव आउन तीन वर्ष बाँकी छ । हामीसँग तीन वर्षको समय छ । यो सरकार कांग्रेसले नचाहँदासम्म बदलिन्न । यहाँ पनि सबै नेताहरुले भनिसक्नुभयो, यो सरकार बदल्न कांग्रेस चाहँदैन, तर जुन दिन चाह्यो त्यो दिन गयो । चाहँदैन, हामीले नचाहँदासम्म जाँदैन । अब केही समयसम्म एमालेले नेतृत्व गर्छ त्यसपछि कांग्रेसले गर्छ ।’ महामन्त्री थापाले प्रचण्डको चकचक र उपद्रोको कारणले अहिलेको अवस्था आएको बताए ।

नेपाल विद्युत प्राधिकरणका कार्यकारी निर्देशक कुलमान घिसिङबारे उनले भने, ‘अहिले हामी सुनिरहेका छौं, ऊर्जा मन्त्रालयको । मन्त्रालयअन्तर्गत विद्युत प्राधिकरण छ । मैले बुझ्न सकेको छैन, बदनियत हो कि ढंग नपुगेको हो, तीन–चार महिनामा सेवा निवृत्त हुने एउटा व्यक्तिको पछि सरकार नै लागेको देखिन्छ । यस्ता कुरा ठीक होइन । तीनचार महिनापछि उपयुक्त व्यक्ति ल्याएर नेतृत्व गर्न दिने । सरकारले नै व्यक्तिको पछि लागेर किचकिच गरिरहेको देखिन्छ । यस्तो कुरा ठीक होइन । यस्तो काममा कोही मन्त्रीहरू लाग्नु हुँदैन ।’

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

एमालेले आज ‘नेकपा’ स्थापना दिवसको अवसरमा विशेष कार्यक्रम गर्दै

आज तीनवटा संसदीय समितिका बैठक बस्दै

राष्ट्रिय परीक्षा बोर्डको बैठक बस्दै, १२ कक्षाको परिक्षा बारे निर्णय गर्ने