कविता : ब्ल्याक आउट विद्रोह

साहित्य डबली

नेपाल लाइभ शनिबार, चैत १६, २०७५ १०:२८

काशीराम बजगाईं

राता झण्डा फर्फराउँदै
निधारमा मार्क्सको हड्डीको चन्दन पोतेर
बाटोमा मजदुरहरूको छाला ओछ्याएर
ऊ हिंड्छ हत्कडी बाँधेर हाम्रा खुट्टाहरूमा

हामीले गाउन थाले हाम्रा जिब्रामा किला ठोक्छ
हामीले बोल्न थाले हाम्रा ओठमा ताल्चा झुण्ड्याउँछ
हामीले लेख्न थाले हाम्रा हात काट्ने आदेश दिन्छ
विद्रोही खुट्टामा गोली हान् भन्छ

शून्य सन्नाटालाई शान्ति घोषणा गरेर
ऊ नबोल् हाम्रो शान्ति खल्बलिन्छ भन्छ
नरो तेरो चिच्चाहटले अशान्ति फैलिन्छ भन्छ
ऊ प्रत्येक घाउहरूलाई हाँस्ने आदेश दिन्छ
कोदालो बोकेर आरन हिँडेको किसानसँग डराउँछ
र सुनपानीमा चोबेर वाइड हड्डीका टुक्रा फ्याँक्दै
ऊ सुँघ्न लगाउँछ आफ्ना पाल्तु कुकुरहरूलाई

हाम्रो हरेक बिद्रोहमा ऊ डराउँछ
मधेश मेरो हो भन्छ
ऊ मधेशीसँग डराउँछ
पहाड मेरो हो भन्छ
ऊ पहाडी सँग डराउँछ
नेपाल मेरो हो भन्छ

झोलामा बम बोकेर सिमा नाघेको आतंकवादी जस्तो
ऊ डराउँछ यो देशको प्रत्येक नागरिकसँग
फुटपाथमा बसेर चिया पिउन डराउँछ
आफैंले खोलेका अस्पतालमा उपचार गर्न डराउँछ
र रातारात उड्छ जाल बोकेर विदेशी स्याउला खोस्रन

ऊ बलात्कारलाई बहादुरी ठान्छ
र शरीरमा छिर्का परेको खुनलाई क्रान्ति भन्छ
ऊ डराउँछ कपालमा रातो रुमाल बाँधेको गोठालोसँग
शान्ति शान्ति भनेर चिल्लाउँछ
तर्सिन्छ घर छाडेर ओरालो हिंडेको
परदेशीको निधारमा रातो अक्षता देखेर
टाङमुनिबाट गाउँछ राष्ट्रिय गान
पुच्छर हल्लाउँछ भुक्छ पछिपछि हिंड्छ
पछिपछि हिंड्छ पुच्छर हल्लाउँछ भुक्छ
र गर्व गर्छ आफ्नो पुच्छरले पृथ्वी बोकेको देखेर
पत्रकारलाई मेरै अंग होस् मेरो मयल पखाल् भन्छ
लेखकलाई प्रेम लेख् भनेर बक्सिस बक्सिन्छ

हामीले लेखेका किताब पढ् भन्छ
हामीले लेखेको इतिहास पढ् भन्छ
हाम्रा भक्तिगाना गा भनेर सूचना दिन्छ
हाम्रो विरुद्ध कविता नलेख् भन्छ
ऊ डराउँछ हातमा मार्क्सका किताब देखेर
त्यसपछि घोषणा गर्छ बाघीहरूलाई देशद्रोही
र डरा भनेर डर देखाउँछ हामीलाई
ऊ डराउँछ हनुमान चालिसा नभट्याउनेसँग
ऊ डराउँछ स्कुल नजाने हरेक बालकहरूसँग

हामी हिंड्ने बाटोमा
कर्फ्यू लगाएर इतिहासको लामो नमीठो साइरन बजाउँदै
अगाडि पछाडि नन्दी भृंगि सुरक्षा राखेर
कुनै अपराधी हिंडेजस्तो हिंड्छ
इस्पातका मोटरमा मुख लुकाएर
गाउँमा कुखुरा चोर्न आएको चोरजस्तो लुसुक्क परेर
ऊ यो बाटैबाटो भएर हिंड्छ

श्रमिकहरूले उपहार ल्याएका खेलौना लुट्छ
निर्धनहरूले ल्याएको मतपत्र च्यात्छ
न्यायालयलाई भान्साघर बनाउँछ
र पकाउँछ आफू अनुकूल रोटीहरू
छाड्छ अपराधीलाई पैसामा
दिनडहाडै किन्छ
दिनडहाडै बिक्छ
दिनडगाडै नांगिन्छ
तपाईंलाई थाह छ ऊ को हो?

माफ गर्नुहोला तपाईं गलत हुनुहुन्छ
ऊ सरकार होइन

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

७२ घण्टाभित्र माग सम्बोधन नभए आन्दोलन गर्ने कर्मचारीहरूको चेतावनी

विद्यालयको चाबी बोकेर काठमाडौं आउन विद्यालय कर्मचारीलाई निर्देशन

केन्द्राध्यक्षलाई काठमाडौं आउन शिक्षक महासंघको अपील