स्थलगत : यस्तो छ बाढीको बितण्डापछिको मेलम्ची [तस्वीरहरू]

समाज

निमेषजंग राई बुधबार, असार २, २०७८ १२:३७

काठमाडौं- अविरल वर्षाका कारण सिन्धुपाल्चाकको मेलम्ची नदीमा आएको बाढीका कारण भाैतिक तथा मानवीय क्षति पुगेको छ। बाढीमा ४० जनाभन्दा बढी बेपत्ता भएका बताइएको छ।

बाढीपछि मेलम्चीस्थित रोज होटलमा फसेका दुई युवाको हेलिकोप्टरमार्फत उद्धार गरिएको छ। होटलमा थुनिएका उनीहरुलाई नेपाली सेनाको हेलिकोप्टरमार्फत बुधबार बिहान उद्धार गरिएको हो।

बाढीले मेलम्ची खानेपानी आयोजनाको ड्याम र नेशनल हाइड्रोपावरको ड्याम पूर्ण रुपमा क्षतिग्रस्त भएको छ।

बाढीका कारण मेलम्ची खोलामा रहेको चोक्पु तथा फट्टेको पक्की पुल बगाएको छ। त्यसैगरी, जिल्लाको उत्तरी भाग तिपेनी बजार तथा पाँचपोखरी जोड्ने पक्की ता झोलङ्गे पुलसमेत बगाएको जिल्ला समन्वय समिमितका सभापति कृष्णगोपाल तामाङले बताए।

यसैबीच, नदीमा पानीको सतह बढेपछि नदी आसपासका बस्ती र बजारहरु खाली गराइएको छ। मेलम्ची बजारसहित मेलम्ची (इन्द्रावती) नदी किनारका बाहुनेपाटी, सिपाघाटमा बस्ती खाली गराइएको थियो।

मंगलबार साँझबाट आएको बाढीले मेलम्ची खानेपानीको आयोजना स्थलसँगै सिन्धुपाल्चोकका तिम्बु, चनौटे, तालामाराङ, मेलम्चीलगायत बजारमा क्षति पुगेको छ।

सदरमुकाम चौतारा र काभ्रेको धुलिखेलबाट गरी २५० जनाको नेपाल प्रहरी, नेपाली सेना र सशस्त्र प्रहरी टोली मेलम्ची पुगेको छ। सभामुख अग्नि प्रसाद सापकोटा पनि अहिले मेलम्ची पुगेका छन्।

बाढी घटेसँगै प्रभावितहरुले घरमा रहेका सामान निकल्न सुरु गरेका छन्।