अफगानिस्तानबाट नेपाली फर्किँदा विमानस्थलमा जे देखियो [तस्वीरहरू]

फिचर

मनिष पौडेल मंगलबार, भदौ १, २०७८ १४:३२

काठमाडौं- अफगानिस्तानलाई तालिवानले नियन्त्रणमा लिएपछि त्यहाँ रहेका नेपालीलाई स्वदेश ल्याउन थालिएको छ। वैधानिक रुपमा अफगानिस्तान पुगेका १ हजार ५ सय ८६ नेपाली फर्काउने प्रक्रिया सुरु भइसकेको परराष्ट्र मन्त्रालयले जनाएको छ। सोही अनुसार मंगलबार बिहानमात्रै ११८ नेपाली काठमाडौं आइपुगेका छन्।

परराष्ट्र मन्त्रालयकी प्रवक्ता सेवा लम्सालका अनुसार अफगानिस्तानस्थित अमेरिका, बेलायत, इयु, जापान, क्यानाडा, जर्मनी, युएनको एजेन्सिज तथा दूतावासहरुमा गरी वैधानिक रुपमा कार्यरत १ हजार ५ सय ८६ नेपाली छन्।

ती दूतावास तथा निकायमा कार्यरत नेपालीहरुको उद्दारका बारेमा सम्बन्धित नियकालयले लिखित पत्राचार गरिरसकेको र सोही अनुसार उद्धारको काम पनि भइरहेको लम्सालले नेपाल लाइभलाई बताइन्।

नेपाल आइपुगेकाहरुको यस्तो छ व्यवस्थापन प्रक्रिया
अफगानिस्तानबाट उद्धार गरेर नेपाल ल्याइपुर्‍याइएकाहरुलाई स्वास्थय मापदण्ड पूरा गरेर आइसोलनमा राख्ने व्यवस्था मिलाइएको नेपाली सेनाले जनाएको छ।

नेपाली सेनाका प्रवक्ता सहायक रथी सन्तोषबल्लभ पौडेलका अनुसार उनीहरुलाई सामाखुसीमा रहेको राधास्वामी आइसोलेन सेन्टरमा लगेर राखिने छ। उनीहरुको एन्टिजेन परीक्षण हुन्छ।

त्यसपछि एन्टिजेन परीक्षणको नतिजाको आधारमा आइसोलनमा राख्नुपर्नेलाई आइसोलेसन र घर पठाउनु पर्नेलाई होम आइसोलनमा बस्ने गरी पठाइने प्रक्रिया मिलाइएको उनले बताए।

मंगलबार कतार हुँदै त्रिभुवन विमानस्थलमा आइपुगेकाहरुले त्यहाँ रहेका नेपालीहरुको बसाइ क्षेत्र अनुसार फरकफरक अवस्था हुनसक्ने बताए।

उनीहरुले अफगानिस्तानमा रहेका नेपालहरुको संख्या र अवस्था यस्तै छ भनेर भन्न नसकिने बताएका छन्। 'यहाँबाट सोचेको जस्तो भयावह स्थिति छैन', एक नेपालीले त्रिभुवन विमानस्थलमा प्रतिक्रिया दिए।

अर्का नेपालीले भने अवस्था नाजुक रहेको भन्दै त्यहाँको दर्दनाक अवस्थालाई शब्दमा बयान गर्न नसकिने बताए।

आफूहरु अमेरिकी क्याम्पमा रहेकाले आफ्नो अवस्था सहज रहेको र सहजै स्वदेश फर्किन पाएको त्रिभुवन विमानस्थल उत्रिएकाहरुको भनाइ थियो। तर, त्यसभन्दा बाहिर बस्नेहरुको अवस्था जटिल हुनसक्ने उनीहरुको भनाइ छ।

थप तस्वीरहरू :