एमालेले घर घरमा पुगेर बाँड्दैछ महाधिवेशनको निम्तो

महाधिवेशन विशेष

बीपी अनमोल सोमबार, मंसिर ६, २०७८ १७:५८

चितवन- नेकपा एमालेले दशौं राष्ट्रिय महाधिवेशन चितवनमा गर्दैछ। राजनीतिको मुख्य केन्द्रमा रहेको चितवनमा एमालेले गर्न लागेको महाधिवेशनलाई चासोका साथ हेरिएको छ।

यस पटकको महाधिवेशनलाई एकताको महाधिवेशन भनेको एमालेले उद्घाटन सत्रमा पाँच लाख मानिस सहभागी गराउने तयारी गरेको छ।

नारायणी नदीको किनारमा भव्य मञ्च निर्माणको काम तीव्र गतिमा अघि बढाइएको छ। गृह जिल्लामा पार्टीको दशौं राष्ट्रिय महाधिवेशन आयोजना हुने भएका कारण एमाले चितवनले यसलाई अझ भव्य बनाउने केन्द्रित भएको छ।

यतिखेर चितवन एमालेका नेता कार्यकर्ताहरु महाधिवेशनलाई सफल बनाउनका लागि खटिएका छन्। चितवनबाट नै एक लाखको संख्यामा जनसहभागिता गराउने लक्ष्य राखेको एमाले चितवनले त्यसका लागि तीव्र तयारी गरिरहेको छ।

अहिले एमालेले घर घरमा निमन्त्रणा पत्र वितरण गरिरहेको छ। एमाले चितवनका अध्यक्ष पार्वती रावलले पार्टीको दशौं राष्ट्रिय महाधिवेशन सफल बनाउनका लागि हरेक घरमा गएर निमन्त्रणा दिइएको जानकारी दिइन्।

चितवनमा महाधिवेशन हुनु आफैंमा पनि गौरवको विषय भएको भन्दै उनले महाधिवेशनको उद्घाटन सत्रमा सबैलाई निम्तो दिइएको बताइन्।

नारायणी पारी पूर्वनवलपरासी क्षेत्रमा पनि महाधिवेशनमा सहभागिताका लागि निमन्त्रणा पत्र बाँडिएको छ।

एमालेले बागमती प्रदेशबाट मात्रै चितवनमा आयोजना हुने महाधिवेशनमा तीन लाखको संख्यामा जनसहभागिता गराउने भनेको छ। त्यसका लागि बागमती प्रदेश अन्तर्गतका विभिन्न जिल्लाहरुमा तयारी भइरहेको छ।

देशका अन्य जिल्लाबाट प्रतिनिधि र केही अन्य नेता कार्यकर्ताहरुको सहभागिता हुने भए पनि मुख्य गरेर चितवन, नवलपरासी, रुपन्देही, कपिलवस्तु, पोखरा, मकवानपुर, काठमाडौं, धादिङ लगायतका जिल्लाबाट ठूलो संख्यामा जनसहभागिता हुने बताइएको छ।