रसुवा– स्थानीय सरकारको रूपमा रहेका स्थानीय तहले असार १० गते भित्रै बजेट पारित गर्नुपर्ने कानुनी व्यवस्था रहेको थियो। तर रसुवाको कालिका गाउँपालिका र उत्तरगया गाउँपालिकाले हालसम्म पनि गाउँसभा मार्फत बजेट पारित गरेका छैनन्।
रसुवाका ५ गाउँपालिकामध्ये ३ वटा गाउँपालिकाले मात्रै गाउँसभा गरी बजेट पारित गरेका छन्। गोसाइकुण्ड, नौकुण्ड र आमाछोदिङमो गाउँपालिकाले तोकिएको समयमा बजेट प्रस्तुत गरेका हुन्।
उत्तरगया गाउँपालिकाको भने १९ गते सम्ममा गाउँसभा गरी बजेट पारित गर्ने तयारी भइरहेको गाउँपालिकाका अध्यक्ष उपेन्द्र लम्सालले बताए। उनले भने,‘हामी दैनिकजसो बैठकमा बसेका छौँ। केही प्राविधिक कारण ढिला भएको हो। केही दिनमै बजेट प्रस्तुत गछौँ।’ तर कालिका गाउँपालिकाले २२ गते कार्यपालिकाको बैठक बसी २४ गते गाउँसभा मार्फत बजेट प्रस्तुत गर्ने तयारी गरिरहेको गाउँपालिका अध्यक्ष सिता अधिकारी बताउँछिन्।
माग भएका योजनालाई प्राथमिकता दिनेबारे विवाद हुँदा कालिका गाउँपालिकाको गाउँसभा अन्यौलमा परेको हो। जनताबाट माग भएको योजनालाई प्राथमिकता दिनुपर्ने धारणा वडा अध्यक्षहरू र कार्यपालिकाका सदस्यहरूले राखेपनि सो विषयमा गाउँपालिका प्रमुख र उपप्रमुख सहमत हुन नसकेपछि विवाद गहिरिएको थियो। आपसी विवादका कारण नै हालसम्म गाउँसभा हुन नसकेको स्रोतले जनाएको छ।
नियमले तोकेअनुसार वडाहरूले आफ्नो बस्ती र टोलस्तरको जनता भेला गरी त्यस भेलाबाट माग गरिएका योजनाहरूलाई प्राथमिकता दिनुपर्ने पाँचवटै वडाध्यक्षहरू र कार्यपालिकाका सदस्यहरूले धारणा राखेपछि यो प्रस्तावलाई प्रमुख र उपप्रमुखले अस्वीकार गरी गाउँसभा नबोलाएको स्रोतले जनाएको छ।
गाउँपालिकामा आवश्यकताभन्दा बढी सवारी साधन किन्नलाई रकम विनियोजन गर्न खोजिएको र वडाको जनताको मागलाई सम्बोधन नगरी बजेट विनियोजन गर्न खोजिएकोले विवाद उत्पन्न भएको एक वडाध्यक्षले बताए।
वडा अध्यक्षहरूको एउटै आवाजले मागेको योजनाहरू सम्बोधन हुनु पर्ने, वडामा बजेटको सिलिङ तोक्नु पर्ने, गत आर्थिक वर्षमा प्रत्येक वडामा एक करोड बजेट प्राप्त भएको हुनाले यस आवमा पनि एक करोड बजेटको सिलिङ नघटाइकन वडालाई बजेट विनियोजन गर्नुपर्ने र चालु खर्च वडामा दिनुपर्ने लगायतका माग वडा अध्यक्षहरूको रहेको उनले बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1752324214.png)
-1752043710.jpg)
-1752245592.jpg)
-1749826086.png)
