काठमाडौं– अरु स्थानीय तहमा गठबन्धन गरेर उम्मेदवारी दिएको माओवादी गोरखामा भने एक्लै प्रतिस्पर्धामा उत्रिएको थियो। जहाँ माओवादीले सफलता हात पारेको छ। २०६४ सालकै हाराहारीमा माओवादीले नतिजा निकालेको छ।
गोरखाका ११ पालिकाहरु मध्ये यो समाचार तयार पार्दासम्म १० पालिकाहरुको नतिजा आइसकेको छ। जसमध्ये ८ पालिकाहरुमा माओवादी केन्द्र विजयी भएको छ। २ पालिकामा कांग्रेस विजयी भएको छ भने १ पालिकाको मत गणना भइरहेको छ।
अघिल्लो (२०७४) स्थानीय तहको चुनावमा २ पालिकामा खुम्चिएको माओवादीको आयतन यो पटक भने तन्किएर ९ पालिकामा पुगिसकेको छ। अघिल्लो चुनावमा कांग्रेसले जितेका ७ पालिकाहरु खोस्दै माओवादीले कांग्रेसलाई २ पालिकामा सीमित गरेको छ।
अघिल्लो स्थानीय तहको चुनावमा कांग्रेसले जितेको धार्चे गाउँपालिकाको प्रमुखमा त यो पटक माओवादीले झण्डै दोब्बर मतान्तरले चुनाव जितेको छ। ३ हजार ७७१ मत ल्याएर माओवादीका लक्ष्मण गुरुङ गाउँपालिका प्रमुखमा विजयी हुँदा उनका निकटतम प्रतिस्पर्धी कांग्रेसका सन्तबहादुर गुरुङले १ हजार ९४६ मत ल्याए। उपप्रमुख पनि माओवादीले नै जितेको छ।
अजिरकोट गाउँपालिका पनि माओवादीले कांग्रेसबाटै खोसेको हो। यो गाउँपालिकाको प्रमुख/उपप्रमुख पनि माओवादीले आफ्नो पोल्टामा पारेको छ। प्रमुखमा दीपक देवकोटा ३ हजार ७८७ मतका साथ विजयी हुँदा उनका निकटतम प्रतिस्पर्धी कांग्रेसका गोविन्दबहादुर गुरुङले ३ हजार २८९ मत ल्याए।
बारपाक सुलिकोट गाउँपालिका भने अघिल्लो स्थानीय तहको चुनावमा पनि माओवादीले नै जितेको थियो। यो पटक पनि माओवादी केन्द्र नै विजयी भएको छ। कांग्रेसलाई पछि पार्दै ५ हजार ५१९ मतका साथ माओवादीका विष्णुप्रसाद भट्ट गाउँपालिका प्रमुखमा विजयी भए।
भीमसेनथापा गाउँपालिकामा पनि माओवादी नै विजयी भएको छ। ५ हजार ६५१ मतका साथ माओवादीका लोकप्रसाद बन्जारा विजयी हुँदा कांग्रेसका रोशन गुरुङले ५ हजार १७६ मत ल्याए। यो गाउँपालिका पनि माओवादीले कांग्रेसबाटै खोसेको हो।
सदरमुकाम रहेको गोरखा नगरपालिकामा पनि माओवादीकै दबदबा देखियो। अघिल्लो चुनावमा कांग्रेससँग हारेको बदला लिँदै गोरखा नगरपालिकामा पनि माओवादी विजयी भयो। अघिल्लो चुनावमा माओवादीका मेयरका उम्मेदवार कृष्णबहादुर राना कांग्रेसका उम्मेदवार राजनराज पन्तसँग पराजित भएका थिए।
अहिले भने परिस्थिती ठ्याक्कै उल्टो भयो। पुनः मेयरमा पन्त र रानाको भिडन्त भएको थियो। जहाँ रानाले पन्तसँग अघिल्लो हारको बदला लिए। पन्तलाई १ हजार ८५६ मतान्तरले हराउँदै राना विजयी भए। रानाले ८ हजार ९६४ मत ल्याउँदा पन्तले ७ हजार १०८ मत ल्याए।
पालुङटार नगरपालिकामा माओवादी विजयी भएको छ। माओवादीका विवस चिन्तन ६ हजार ७२ मतका साथ विजयी भए। उनका प्रतिस्पर्धी जनता समाजवादीका प्रेमबहादुर गुरुङले ५ हजार ७१७ मत ल्याए। यो नगरपालिका समेत माओवादीले कांग्रेसबाट खोसेको हो।
शहिद लखन गाउँपालिका यसअघि पनि माओवादीले नै जितेको गाउँपालिका हो। यो पटक पनि माओवादीले १ हजारभन्दा बढी मतान्तरले जितेको छ।
यसअघि कांग्रेसले जितेको गण्डकी गाउँपालिका पनि माओवादीले आफ्नो पोल्टामा पारेको छ। माओवादीका दीपक तिमिल्सिना ६ हजार ३२६ मत ल्याएर विजयी हुँदा कांग्रेसका होमबहादुर रानाले ४ हजार ६५५ मत ल्याए।
अन्य पालिकाहरुमा आफ्नो दबदबा कायम राखेको माओवादीको आरुघाट गाउँपालिकामा भने उपस्थित कमजोर देखियो। कांग्रेसका उम्मेदवार ५ हजार ५५६ मत ल्याएर विजयी हुँदा तेस्रो भएको माओवादीले जम्मा ९१० मत मात्रै ल्याउन सक्यो। आरुघाट यसअघि पनि कांग्रेसले नै जितेको थियो। त्यसबेला १ हजार ९५२ मत ल्याएको माओवादी पहिलाको भन्दा झण्डै हजार मत कममा खुम्चिन पुगेको छ।
सिरानचोक गाउँपालिकामा नेपाली कांग्रेस विजयी भएको छ। कांग्रेस उम्मेदवार ज्ञानेन्द्र गुरुङ ५ हजार ४०३ मतसहित विजयी हुँदा नेकपा माओवादी केन्द्रका नवराज पुडासैनीले ४ हजार १६८ मत पाएका छन्। यसअघि पनि उक्त गाउँपालिका नेपाली कांग्रेसले जितेको थियो।
अघिल्लो स्थानीय तहको चुनावमा कांग्रेसले जितेको चुमनुव्री गाउँपालिका अहिलेसम्मको मत गणना अनुसार माओवादी अग्रस्थानमै छ। उसलाई नेपाली कांग्रेसले पछ्याइरहेको छ।
जितमा उन्माद नभइ जनताको सेवामा खटिन्छौं : लेखबहादुर कार्की (गोरखा इन्चार्ज–माओवादी केन्द्र)
अहिले गोरखामा हाम्रो पार्टीको जुनखालको विजय भएको छ, पहिलो कुरा त पार्टीको विचार, सिद्धान्त, कार्यदिशा, नीति, योजना सही हुनु नै हो। जसमा हाम्रो पार्टीको अध्यक्ष कमरेड प्रचण्डको आदेश अनुसार हामी पार्टीमा कटिबद्ध भएर अघि बढेका थियौं। त्यसैको प्रतिफल हो।
दोस्रो कुरा २०७४ को पराजय नै अहिलेको हाम्रो सफलताको आधार हो। त्यतिबेला ठिक ढंगले हामीले विषयलाई नबुझ्दा त्यो परिणाम भोग्नु परेको थियो। त्यसबाट हामीले गम्भीर शिक्षा लिएर अघि बढ्यौं। मुख्यगरी हाम्रो पार्टीको नेता कार्यकर्ता एकताबद्ध हुनु अर्को महत्वपूर्ण पक्ष हो।
गठबन्धन गर्ने कुरा केन्द्रबाटै भएपछि हाम्रोमा पनि त्यो कुरा स्वभाविक रुपमा उठेको थियो। हामीले कांग्रेसका साथीहरुसँग ६ वटा पालिका मागेका थियौं। मिलेर जाऔं भनेका थियौं। साना पार्टीलाई पनि सँगै लैजाऔं भनेका थियौं। तर कांग्रेसका साथीहरुले त्यसलाई ग्रहण गर्नु भएन। पाण्डवले कौरबसँग एउटा सानो खुट्टा टेक्ने ठाउँ मागेका थिए। तर कौरबले दिन चाहेनन्। अन्ततः लडाईमा पाण्डवले विजय भएर हस्तिनापुर कब्जा गर्यो। अहिले गोरखामा कौरबकै अवस्थामा कांग्रेस पुगेको छ। यो किसिमको विजय हुनुमा चाहिँ आम जनताको समर्थन अर्को कुरा हो। ठिक ढंगले हामीले सबैलाई गोलबन्द गर्न सफल भयौं। पार्टी युनिफाइड गरायौं। त्यही अनुसारलाई जनतालाई बुझाउने काम गर्यौं । हामी जनतमा घुलमिल भएर स्थापित भएपछि हामीलाई जनताले विकल्पको रुपमा हेरेका हुन्।
आम जनसमुदायले माओवादी पार्टीलाई एउटा विकल्पको रुपमा रोजेको छ। विश्वास गरेको छ। हामीले जनताको मनोभावनालाई बुझेर त्यो विश्वासलाई आत्मसात् गरेर हामी अघि बढ्न चाहान्छौं। अब हामी विनम्र भएर काम गर्छौं। जितमा मान्छे बढी हौस्न्छिन्, हारमा निराश हुन्छन्। हामीले कयौं पालिका हारेका पनि छौं। तर हामी हारमा निराश पनि नहौं भन्ने लाग्छ। जति जितेका छौं त्यसमा उन्माद नभई जनताको सेवामा खटिन्छौं।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।
![सय दिने प्रगति विवरण सार्वजनिक गर्दै प्रधानमन्त्री केपी ओली [प्रत्यक्ष प्रसारण]](https://nepallive.net/uploads/posts/500X300/kllllllllll-1729675876.jpg)
![Nepal Live Samachar नेपाल लाइभ समाचार, भदौ १९ [भिडियाे]](https://nepallive.net/uploads/posts/500X300/samachar++-1725458095.jpg)
![प्रधानमन्त्रीसँग प्रश्नोत्तर [प्रत्यक्ष प्रशारण]](https://nepallive.net/uploads/posts/500X300/PMM-(1)-1718866650.jpg)
![भारत भ्रमणबारे प्रतिनिधि सभा बैठकमा जवाफ दिँदै प्रधानमन्त्री प्रचण्ड [प्रत्यक्ष प्रशारण]](https://nepallive.net/uploads/posts/500X300/prachanda-sansad-1710309847.jpg)
![Nepal Live Samachar नेपाल लाइभ समाचार, जेठ ३० [भिडियाे]](https://nepallive.net/uploads/posts/500X300/samachar++-copy.jpg-30-1718203418.jpg)
-1744970725.jpg)
-1743318385.png)
