काठमाडौं- यातायात व्यवसायीहरुले साढे तीन महिने लकडाउन खुकुलो बनाउँदै सरकारकाले गरेको निर्णयअनुसार सार्वजनिक यात्रुबाहक सवारी चलाउन नसकिने घोषणा गरे। उनीहरूले लकडाउनको अवधिमा थन्किएर बसेका सवारीको मर्मत, बैंकबाट लिइएको कर्जा ब्याक मिनाहा, पुनर्कर्जाको सुविधा, चालक तथा सहचालकको बिमा र सवारी सञ्चालन गर्दा आवश्यक पर्ने स्वास्थ्य सामग्रीको व्यवस्था गर्नुपर्ने माग राखे।
सरकारले व्यवसायीहरुसँग छलफल नै नगरी अकस्मात सार्वजनिक यात्रुवाहक सवारी चलाउन दिने निर्णय गरेकोमा उनीहरुले असन्तुष्टि व्यक्त गरेका थिए। केही कम्पनीहरुले उपत्यकाको रिङरोडमा बस चलाउन थालेपनि अधिकांश व्यवसायीहरुले बस चलाएका छैनन्।
सुरुमा व्यवसायीहरुले भौतिक पूर्वाधार तथा यातायातमन्त्री बसन्तकुमार नेम्वाङसँग भेटेर आफ्नो कुरा राखेका थिए। त्यसपछि उनीहरु बहालवाला तथा सबै पूर्वप्रधानमन्त्रीहरु भेटिरहेका छन्। बिहीबार प्रधानमन्त्री केपी शर्मा ओली र पूर्वप्रधानमन्त्री तथा नेकपाका अध्यक्ष पुष्पकमल दाहाललाई भेटेका थिए।
प्रधानमन्त्री केपी शर्मा ओलीले सरकारको क्षमता र गच्छेअनुसार यातायात व्यवसायी एवं यस क्षेत्रका मजदुरहरुको माग पूरा गर्ने आश्वासन दिएका छन्। यातायात क्षेत्रका समस्या एवं विभिन्न मागहरु लिएर तीनवटा मजदुर संगठन र नेपाल यातायात व्यवसायी राष्ट्रिय महासंघका प्रतिनिधिहरु बिहीबार बिहान प्रधानमन्त्री ओलीलाई भेट्न बालुवाटार पुगेका थिए।
भेटमा यातायात मजदुर र व्यवसायीका कुरा सुनिसकेपछि प्रधानमन्त्री ओलीले कोरोना महामारीका कारण देशको अर्थतन्त्र प्रभावित भएको र स्रोत साधनको अपर्याप्तता रहेको बताएका थिए। तथापि सरकारले आफ्नो गच्छेअनुसार व्यवसायी र मजदुरका माग पूरा गर्ने भन्दै ढुक्क रहन आश्वासन दिएको सहभागी महासंघका एक प्रतिनिधिहरुले बताए।
यातायात क्षेत्रको विद्यमान समस्या समाधान गर्नका लागि निर्माण गरिएको कार्यदलले बिहीबार बिहान नेपाल कम्युनिष्ट पार्टीका अध्यक्ष तथा पूर्वप्रधानमन्त्री पुष्पकमल दाहासँग भेट गरेका थिए। दाहाल निवास पुगेर व्यवसायीहरुले कोभिड–१९ पश्चात यातायात सञ्चालनमा देखिएका समस्याबारे ध्यानाकर्षण गराएका थिए। भेटका क्रममा दाहालले यातायात व्यवसाय मध्यम र निम्न वर्गको व्यापक सहभागिता भएको क्षेत्र भएकाले आफूले यस क्षेत्रलाई उच्च प्राथमिकतामा राखेको बताए।
‘व्यवसायीले राखेका सबै कुराहरु गम्भीर छन्। कोभिड–१९ का सन्दर्भमा संसारभरिका देशहरुले राहत प्याकेज दिने गरेको देखिएको छ’, उनले भने, ‘यहाँ पनि यातायात व्यवसायी र मजदूरका समस्या समाधान गर्न केही न केही राहत वा सुविधाका बारेमा पार्टी र सरकारमा छलफल गर्छु। बरु नीतिगत कुरा अलिक पछि गर्दा पनि हुन्छ।’ दाहालले तत्काल बैंकको किस्तालाई रोक्ने कुरा, यातायात व्यवसाय सञ्चालनका लागि पुनर्कर्जा, राहत र अनुदानसँग सम्बन्धित कुरा र स्वास्थ्य सुरक्षासँग सम्बन्धित विषय राज्यले तुरुन्तै गरिदिनुपर्ने बताए।
त्यस्तै व्यवसायी र मजदुरको टोलीले बुधबार कांग्रेस सभापति तथा पूर्वप्रधानमन्त्री शेरबहादुर देउवालाई भेटेका थिए। भेटका क्रममा देउवाले सार्वजनिक यातायात क्षेत्रमा देखिएका समस्या समाधान लागि पार्टीका तर्फबाट रचनात्मक भूमिका निर्वाह गर्ने बताएका थिए।
उनले लकडाउनका कारण व्यवसायी र मजदुरले भोगेका समस्या समाधानका लागि कांग्रेसका तर्फबाट सक्दो पहल गर्ने प्रतिबद्धता जनाएका हुन्। ‘व्यवसायी र मजदुरका समस्याबारे हामी गम्भीर छौं। समस्या समाधानका लागि सक्दो पहल हुनेछ’, देउवालाई उद्धृत गर्दै भेटमा सहभागी नेपाल यातायात व्यवसायी राष्ट्रिय महासंघका महासचिव सरोज सिटौलाले भने।
‘हामीले प्रधानमन्त्रीलाई समेत भेटेर ध्यानाकर्षण गराएका छौं,’ सिटौलाले भने, ‘बुधबार पूर्वप्रधानमन्त्री शेरबहादुर देउवालाई र बिहीबार पुष्पकमल दाहाललाई भेटेर व्यवसायी र मजदुरको तर्फबाट कोरोनापछि देखिएको यातायात क्षेत्रको समस्याबारे ध्यानाकर्षण गरायौं।’ बिहीबार नै अर्का पूर्वप्रधानमन्त्री झलनाथ खनाललाई भेट्ने र शुक्रबार पूर्वप्रधानमन्त्री बाबुराम भट्टराई र माधवकुमार नेपाललाई भेट्ने तय भएको सिटौलाले जानकारी दिए।
व्यवसायी र मजदुर संगठनका प्रतिनिधिसँगको भेटमा प्रधानमन्त्रीदेखि विपक्षी दलका नेतासम्मले समस्या समाधानका आश्वासन दिएका छन्। तर सार्वजनिक बस कहिलेदेखि चल्छ भन्ने टुंगो लागेको छैन। यातायात व्यवस्था विभागले बुधबार व्यवसायी, मजदुर, स्वास्थ्य मन्त्रालयका प्रतिनिधि र स्थानीय तहका जनप्रतिनिधि राखेर सार्वजनिक सवारी चलाउँदा अपनाउनुपर्ने मापदण्डको बारेमा छलफल गरेको थियो।
व्यवसायी तथा मजदूरले बैंक तथा वित्तीय संस्थाको किस्ता स्थगन गर्नुपर्ने, पुनर्कर्जाको व्यवस्था गर्नुपर्ने, कागजात नवीकरणलाई सहज बनाउनुपर्ने, श्रमिकलाई नियमित निःशुल्क स्वास्थ्य परीक्षणको व्यवस्था गर्नुपर्ने, चालक तथा सहचालकको कोरोना बिमामा सरकार र व्यवसायीको ५० प्रतिशत योगदान हुनुपर्ने, मजदूरलाई स्वास्थ्य सामग्री तथा पिपिईको व्यवस्था मिलाउन माग गरेका छन्।
उच्च स्तरीय भेटघाटमा नेपाल यातायात व्यवसायी राष्ट्रिय महासंघका अध्यक्ष योगेन्द्रनाथ कर्माचार्य, महासचिव सरोज सिटौला, नेपाल यातायात स्वतन्त्र मजदुर संगठनका अध्यक्ष भीमज्वाला राई, नेपाल यातायात मजदुर संघका अध्यक्ष धर्मराज भण्डारी र अखिल नेपाल यातयाता मजदुर संघका अध्यक्ष रामचन्द्र कार्कीलगायत सहभागी छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1751793737.png)
-1751799443.png)
-1749826086.png)
