वीर अस्पतालका कर्मचारी आन्दोलनमा [फोटो फिचर]

समाचार

निमेषजंग राई बिहीबार, कात्तिक २०, २०७७ १२:२८

काठमाडौं–स्वास्थ्यकर्मीलाई पर्याप्त कोभिड सुरक्षा सामग्री वितरण गरिनुपर्ने, खाइपाई आएको सेवासुविधा तत्काल दिनुपर्नेलगायतका माग राख्दै वीर अस्पतालका कर्मचारी आन्दोलनमा उत्रिएका छन्। अस्पतालका पदाधिकारीविरुद्ध आन्दोलन थालेका उनीहरुले अस्पतालमा बिहान एक घण्टा धर्ना दिएका हुन्।

उनीहरुले बिहान साढे १० देखि साढे ११ बजेसम्म प्ले कार्ड सहित हातमा कालो पट्टी बाँधेर धर्ना दिएका थिए। चैतदेखि हालसम्म कोभिड भत्ता, औषधि खरिद खर्च र सेवा विस्तार भत्ता तथा स्वास्थ्य सुरक्षाका सामग्री नदिएको भन्दै वीर अस्पतालका कर्मचारीहरु आन्दोलित छन्।

विभिन्न प्लेकार्डसहित प्रदर्शन गरेका कर्मचारीहरुले काममा लगाएर पनि सेवा सुविधा नदिनु अपराध भएको भन्दै आक्रोशसमेत व्यक्त गरेका थिए।

कोरोनाको उपचारमा खटिएबापतको भत्तालगायत सुविधा नदिएको भन्दै वीर अस्पतालका कर्मचारीहरु कात्तिक २ गतेदेखि आन्दोलनमा छन्। शुक्रबारसम्म पनि आफ्ना माग पूरा नगरे आन्दोलनका अन्य कार्यक्रम ल्याउन बाध्य हुने उनीहरुले चेतावनी दिएका छन्।