काठमाडौँ– कुपन्डोलका राजेन्द्र श्रेष्ठ बुधबार सुपथ मुल्य पसल थापाथलीमा भेटिए। उनी दैनिक आवश्यकताका खाद्य वस्तु लिन आएका थिए। थापाथली आउने काम परेपछि बाटोमा सुपथ मूल्य पसल लागेको देखेर भित्र छिरेको उनले बताए।
खाद्य व्यवस्था तथा व्यापार कम्पनी लिमिटेडले गएको असोज १ देखि सुपथ मूल्य पसल सञ्चालन गरिरहेको छ। पहिलो पटक सुपथ मूल्य पसल छिरेका श्रेष्ठले दैनिक उपभोग्य सामग्री सस्तो र गुणस्तरीय भएको बताए। सरकारले सबै जनताको पहुँच पुग्ने गरी धेरै ठाउँमा यस्ता पसल खोल्नुपर्ने उनको सुझाव छ।
सुपथ मूल्य पसल सञ्चालन भएसँगै त्यहाँ खाद्यान्न तथा अन्य उपभोग्य वस्तु किन्नेको संख्या बढिरहेको छ। चाडबाडमा बजार मूल्य बढ्न नदिन तथा सर्वसाधारणको सहुलियतको लागि सरकारले विभिन्न ठाउँमा यस्ता पसल सञ्चालनमा ल्याउने गरेको छ।
रति ठकुरी थापाथली नजिकै बस्छिन्। चाडबाडमा सुपथ मूल्यको पसल सञ्चालन हुने उनलाई जानकारी छ। त्यसैले आवश्यक सामग्री किन्न खाद्य व्यवस्था तथा व्यापार कम्पनी लिमिटेडको स्टोरमा जाने गरेकी छिन्। उनी भन्छिन्, ‘बजारमा महँगो हुन्छ। यहाँ अलिकति भए पनि सस्तोमा पाइन्छ।’ दाल, तेल चिनी, मसलालगायत सामग्री सस्तो र गुणस्तरीय हुने उनी बताउँछिन्।
ललितपुरस्थित इमाडोलका केशव चौलागाईं र उनकी श्रीमती मिना खाद्य वस्तु लिन टयाक्सी नै लिएर सुपथ मुल्य पसल पुगेका थिए। उनको परिवार ठुलो छ। ‘थोरै लगेर पुग्दैन, एकै चोटि धेरै उठाउने गरेको छौँ,’ मिना भन्छिन्, ‘त्यसैले ट्याक्सी नै लिएर हामी दुवै जना आएका हौँ।’
उनीहरुलाई छिमेकीले बासमती चामल एकदम राम्रो भएको जानकारी दिएका थिए। मिना भन्छिन्, ‘हामीहरु इन्डियन चामल खाइराखेका थियौँ। एकचोटि हेरौँ न भनेर पनि आएका हौँ।’
खाद्य व्यवस्था तथा व्यापार कम्पनी लिमिटेड थापाथली केन्द्रका वरिष्ठ सहायक ललितकुमार यादवका अनुसार सुपथ मूल्य पसल प्रत्येक वर्ष चाडबाड नजिकिएपछि खोल्ने गरिएको छ। नेपालभरि ३९ जिल्लाको ४३ ठाउँमा सुपथ मूल्य पसल खोलिएको उनी बताउँछन्। काठमाडौँ उपत्यकामा चार ठाउँमा खोलिएको छ। काठमाडौँमा थापाथली, नख्खु, रामशाहपथ र सूर्यविनायक केन्द्रबाट खाद्यवस्तु बिक्री वितिरण हुने गरेको छ। यी पसल दशैँदेखि छठसम्म सञ्चालन हुने छन्।
कल्पना भट्टराईको अफिस थापाथली नजिकै छ। उनी चार वर्षदेखि यहाँको खाद्य सामान किन्दै आएकी छिन्। सुपथ मुल्य पसल खोल्दा मात्र नभएर अन्य बेला पनि उनी यहाँबाट नियमित रुपमा उपभोग्य सामग्री किन्छिन्।
उनले यहाँका सामान सस्तो र गुणस्तरीय हुने गरेको उनी बताउँछिन्। ‘चाडबाडमा बजारमा मुल्य बढ्छ। सामान पनि गुणस्तरी हुँदैन। यस्तो बेला सरकारले नै सुपथ मूल्यमा सामग्री बिक्री गर्दा सर्वसाधारणलाई राहत हुन्छ,’ उनी भन्छिन्। बाहिर बजारबाट खाद्यवस्तु किन्न आफूले कम गरेको उनको भनाइ छ।
कीर्तिपुर बस्ने राजेन्द्र महर्जन पनि सुपथ मूल्य पसलमा नियमित आउने गर्छन्। उनले छिमेकी बाबुकृष्ण महर्जनलाई पनि लिएर आएका थिए। आफू अरु बेला पनि आउने गरेको उनी बताउँछन्। ‘म चामल र अन्य सामग्री एकैपटक धेरै लैजान्छु। यसो गर्दा आइरहनुपर्दैन,’ उनी भन्छन्।
खाद्य व्यवस्था तथा व्यापार कम्पनी लिमिटेड थापाथली केन्द्रका वरिष्ठ सहायक यादवका अनुसार निशुल्क ‘होम डेलिभरी’ पनि हुने गरेको छ। ‘निशुल्क होम डेलिभरीका लागि वेभसाइटमार्फत अनलाइनमा अडर गर्दा घरमा उही मूल्यमा पुग्छ।’ त्यसका लागि www.nepalfood.gov.np मा गएर अर्डर गर्न सकिन्छ। तर, तीन हजार रुपैयाँभन्दा माथिको अर्डरको मात्र होम डेलिभरी हुने गरेको छ।
सरकारले चाडपर्व लक्षित गरेर जनतालाई सहुलियत दिन सुपथ मूल्य पसल खोलेको यादबले बताए। यसअघि सरकारले लकडाउनमा पनि २०% छुटमा खाद्यवस्तु बिक्री गरेको उनको भनाइ छ।
चाडपर्वअघि फाट्टफुट्ट ग्राहक मात्र सामान किन्न कम्पनीको स्टोरमा पुग्छन्। तर, चाडबाडमा भने ग्राहकको संख्या ह्वात्तै बढ्ने उनले बताए। यस पटक पहिलो दिन असोज १ बाट नै ग्राहक आउन थालेको उको भनाइ छ। हरेक दिन थापाथली केन्द्रबाट मात्र साढे चार लाख रुपैयाँसम्मको व्यापार हुने उनले जानकारी दिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1751879619.webp)
-1749826086.png)
