महाधिवेशन विशेष

माओवादीमा नेता हेरेर पदाधिकारीको संख्या निर्धारण गरिँदै

नेपाल लाइभ बिहीबार, पुस ८, २०७८ ०९:०४

काठमाडौं- नेकपा (माओवादी केन्द्र)को पुस ११ गते सुरु हुने राष्ट्रिय सम्मेलनबाट अध्यक्षमा पुनः पुष्पकमल दाहाल ‘प्रचण्ड’ नै दोहोरिने निश्चित भए पनि अरु पदाधिकारीमा को-को आउँछन् भन्ने प्रतीक्षाको विषय भएको छ। तर, त्योभन्दा पहिले पदाधिकारीका पद कति हुन्छन् भन्ने टुंगो लगाउनुपर्नेछ। अध्यक्षभन्दा पछाडि पदाधिकारीअन्तर्गत कुन-कुन पद राख्ने र ती पदको संख्या कति हुने भनेर टुंगो लगाउन माओवादीले स्थायी समिति सदस्य देवप्रसाद गुरुङको संयोजकत्वमा पाँच सदस्यीय कार्यदल गठन गरेको छ।

कार्यदलमा अहिले पदाधिकारीबारे छलफल भए पनि अन्तिम टुंगो लाग्न बाँकी छ। कार्यदलले यो विषय टुंग्याउन बाँकी नै रहे पनि माओवादी केन्द्रका नेताहरु पदाधिकारीका आकांक्षी नेताहरुलाई हेरेर पदाधिकारीको पद र संख्या निर्धारण गरिने बताउन थालेका छन्। उनीहरुका भनाइमा पदाधिकारीमा सर्वसम्मत गर्न नेताहरूको व्यवस्थापनलाई मुख्य आधार बनाएर पदाधिकारी टुंगो लगाउन थालिएको हो।

माओवादी केन्द्रको अन्तरिम विधानमा अध्यक्ष, उपाध्यक्ष, महासचिव, उपमहासचिव, सचिव, कोषाध्यक्षसहितका पद रहने र पार्टी बहुपदीय संरचनामा चल्ने उल्लेख गरिएको छ। अब त्यसमा कति पदाधिकारी थप्ने भनेर स्थायी समिति सदस्य गुरुङको संयोजकत्वमा पाँच सदस्यीय कार्यदल बनाइएको हो। कार्यदलमा रहेका माओवादीका एक स्थायी समिति सदस्यका अनुसार कार्यदललाई अब कुन-कुन नेतालाई कसरी व्यवस्थापन गर्न सकिन्छ भन्ने हिसाब गरेर खाका प्रस्ताव गर्न भनिएको छ।

कार्यदलमा सबै पक्षलाई समेट्नेगरी खाका पेस गर्न भनिएको र त्यो खाका स्थायी समितिमा पेस भएपछि पदाधिकारीबारे अन्तिम टुंगो लाग्ने ती सदस्यले बताए। ‘पदाधिकारीमा को-को नेतालाई लैजान सकिन्छ भन्ने विषयले नै पदाधिकारीको संख्या कति हुने भन्ने टुंगो लाग्नेछ,’ कार्यदलका ती सदस्यले भने, ‘कार्यदलले आफ्नोतर्फबाट गृहकार्य गरेर खाका स्थायी समितिमा पेस गर्छ। त्यसपछि पदाधिकारीको टुंगो लाग्छ।’

राष्ट्रिय सम्मेलन नजिकै आइसकेकाले अब बस्ने स्थायी समिति बैठकबाट यसबारे टुंगो लाग्नसक्ने उनले बताए। माओवादी केन्द्रको राष्ट्रिय सम्मेलन पुस ११ देखि १३ गतेसम्म काठमाडौंमा हुँदै छ।

यो पनि पढ्नुहोस्

को बन्ला माओवादी केन्द्रको महासचिव? यी हुन् दाबेदार नेता

माओवादीले वडा, पालिका र प्रदेश समितिभन्दा केन्द्रमा पदाधिकारी धेरै बनाउने तयारी गरेको छ। मओवादीका स्थानीय तहमा सात जना पदाधिकारी र प्रदेशमा नौ पदाधिकारी रहने व्यवस्था गरिएको छ। ‘पार्टीको अन्तरिम विधानले अध्यक्ष, उपाध्यक्ष, महासचिव, उपमहासचिव, सचिव र कोषाध्यक्ष पद मात्रै उल्लेख गरेको छ। त्यसमा थप नेताहरूलाई व्यवस्थापन गर्नेगरी पदाधिकारी फाइनल गरिनेछ,' ती नेताले भने, ‘त्यसो हुँदा स्थानीय तह र प्रदेशभन्दा केन्द्रमा पदाधिकारी संख्या धेरै हुन्छ। मलाई लाग्छ, हामी १० देखि १२ जनासम्म पदाधिकारी बनाउनेछौं।’

अध्यक्षपछिको वरीयतामा रहने उपाध्यक्षमध्ये वरिष्ठ उपाध्यक्ष हुने वा नहुने भन्ने विषय कार्यदलले टुंगो लगाइनसकेको ती नेताले बताए। एमालेले वरिष्ठ उपाध्यक्ष बनाएकाले माओवादीले पनि त्यस्तै पद सिर्जना गरेमा राम्रो सन्देश नजाने भएकाले वरिष्ठ उपाध्यक्षको पद नराख्ने सम्भावना धेरै छ। त्यसो हुँदा उपाध्यक्षमा दुईदेखि चार जना, महासचिव एक, कोषाध्यक्ष एक, उपमहासचिव दुईदेखि तीन जना र सचिव पाँच जनासम्म हुनसक्ने ती नेताले बताए।

यो पनि पढ्नुहोस्

माओवादीमा पद व्यवस्थापन : यी हुन् उपाध्यक्षका आकांक्षीहरु

माओवादीमा पदाधिकारी सर्वसम्मत चयन गर्नका लागि सोहीअनुसार पद संख्या निर्धारण गर्न खोजिएको छ। तर, नेताहरुको व्यवस्थापन सहज नभएकाले सर्वसम्मत हुने सम्भावना भने कम छ। ‘अहिले स्थायी समितिमा रहनुभएका १५ जना नेतामध्ये सबैजसो पदाधिकारीमा जान खोज्नुहुन्छ नै। त्यसमा पनि महासचिव, उपमहासचिव र सचिवमा जान खोज्नेको संख्या धेरै हुन सक्छ,’ एक स्थायी समिति सदस्यले भने, ‘त्यो अवस्थामा पदाधिकारी सर्वसम्मत हुने सम्भावना कम देख्छु।’ त्यो अवस्थामा केन्द्रीय समितिमा मात्र मतदान गरेर पदाधिकारी टुंगो लगाउने सम्भावना पनि छ। माओवादीले प्रदेश समितिमा निर्वाचनको अभ्यास पनि गरिरहेको छ।

यो पनि पढ्नुहोस्

यसरी हुन्छ माओवादीको सम्मेलनमा प्रतिनिधित्व, कहाँबाट कति?

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

अमेरिकामा ट्रम्पविरुद्ध प्रदर्शन

निकै खराब अवस्थामा काठमाडौँको वायु प्रदूषण, स्वास्थ्य सावधानी अपनाउन अनुरोध

अर्घाखाँचीको मालारानीमा जीप दुर्घटनाः दुई जनाको मृत्यु, दुई जना घाइते