काठमाडौं– सशस्त्र प्रहरी बल, हेडक्वाटरले सातै प्रदेशमा सशस्त्र प्रहरी नायब उपरीक्षक (डीएसपी) को कमाण्डमा इन्टेलिजेन्स ब्यूरोको टोली पठाएको छ। इन्टेलिजेन्स ब्यूरोको क्षमतालाई थप प्रभावकारी बनाउन भन्दै सशस्त्र हेडक्वाटर हल्चोकले सातै प्रदेशमा डीएसपीको कमाण्डमा टोली खटाएको हो।
सशस्त्र प्रहरी हेडक्वाटरका अनुसार करिब दुई साताअघि मात्रै सात डीएसपीको कमाण्डमा सात प्रदेशमा इन्टेलिजेन्सी ब्यूरोको टोली पठाइएको छ। यसअघिसम्म सशस्त्र प्रहरी निरीक्षक (इन्सपेक्टर)को कमाण्डमा प्रदेशमा ब्यूरोको टोली खटाइन्थ्यो।
यसअघि इन्सपेक्टरको कमाण्डको टोलीले १४ वटासम्म जिल्ला हेर्नुपर्ने भएकाले प्रभाकारी रुपमा ब्यूरोले काम गर्न नसकेको भन्दै डीएसपीको कमाण्डमा टोली खटाइएको छ।
‘इन्टेलिजेन्स ब्यूरोलाई थप प्रभावकारी बनाउने उदेश्यले डीएसपीको कमाण्डको टोली खटाइएको हो,’ सशस्त्र प्रहरी बलका प्रवक्ता तथा डीआईजी विदुर खड्काले नेपाल लाइभसँग भने, ‘टोलीले आफू मातहतको प्रदेशमा भएका तथा हुनसक्ने सम्भावित घटनाको सूचना संकलन गर्नेछ। अपराध हुनबाट रोक्न र आगामी रणनीति बनाउनसमेत उक्त सूचनाले सहयोग पुग्ने छ।’
डीएसपीको कमाण्डको टोलीले आफ्नो प्रदेशमा हुनुगरेका अपराध, सीमा सुरक्षा, तस्करी, आतंकवाद, सशस्त्र गतिविधि, राजनीतिको आवरणमा हुने अपराध र हुनसक्ने सम्भावित अपराधकाबारेमा सूचना संकलन गरेर हेडक्वाटरलाई रिर्पोटिङ गर्नेगर्छ।
मुख्यगरी तराईका जिल्लामा हुने सीमा अपराध र सीमा सुरक्षाका विषयमा ब्यूरोको टोलीले विशेष निगरानी गर्ने गरेको छ। ‘अन्य जिल्लाका तुलनामा भारतसँग सीमा जोडिएका तराईका जिल्लाहरुमा सुरक्षा चुनौती बढी हुने र सीमा सुरक्षाको कुरा पनि बारम्बार उठिराख्ने भएकाले यीनै कुरालाई विशेष निगरानीका साथ ब्यूरोको टोलीले हेर्ने गरेको छ’, सशस्त्र प्रहरी हेडक्वाटर स्रोतले नेपाल लाइभसँग भन्यो ।
इन्टेलिजेन्स ब्यूरोबाट खटिएका टोलीले सादा पोशाकमा गुप्त रुपमा सूचना संकलन तथा विश्लेषण गर्छन्। यसको दैनिक रिपोर्टिङ प्रदेश कमाण्डर (डीएसपी)ले हल्चोक हेडक्वाटरस्थित इन्टेलिजेन्स ब्यूरोमा गर्नेछन्। सशस्त्र प्रहरी महानिरीक्षक (आईजी)को प्रतक्ष्य मातहतमा रहने गरी सशस्त्र प्रहरी बरिष्ठ उपरीक्षक (एसएसपी) को कमाण्डमा इन्टेलिजेन्स ब्यूरो रहने गर्छ।
डीएसपीको कमाण्डमा सातै प्रदेशमा ब्यूरोको टोली खटाएसँगै ब्यूरो बाहेकबाट सादा पोशाकमा सशस्त्र प्रहरी खटाउनसमेत प्रतिबन्ध लगाइएको छ। यसअघि नै सशस्त्र हेडक्वाटरले बोर्डर आउट पोस्ट (बीओपी), गुल्म, गण, बाहिनीलगायतबाट खटाउँदै आएका सादा पोशाकमा प्रहरी हटाएको थियो।
हरेक जसो युनिटले सादा पोशाकमा घुमुवा खटाउँदै आएपछि विकृति बढेको भन्दै सशस्त्र हेडक्वाटरको निर्देशन धमाधम घुमुवा प्रहरी हटाइएको थियो। सादा पोशाकमा खटिएका चारसय घुमुवा प्रहरीलाई सम्बन्धित कार्यालय तानेर नियमित ड्युटीमा लगाइएको थियो।
खासगरी तराईका जिल्लाहरूमा सशस्त्रका युनिटहरूले घुमुवा प्रहरी खटाउँदै आएका थिए। सूचना संकलनका लागि भनेर खटाइएका घुमुवा प्रहरीहरू अवैध असुली लगायतका धन्दाहरुमा लाग्ने गरेको गुनासो आएपछि सशस्त्र आईजीपी राजु अर्यालको निर्देशनमा घुमुवा हटाइएको थियो।
केही घुमुवाका कारण सिंगो संगठन न बद्नाम हुने अवस्था आएको भन्दै घुमुवा हटाएको सशस्त्र हेडक्वाटरले इन्टेलिजेन्स तालिम लिएका बाहेकका सुरक्षाकर्मीलाई सादा पोशाकमा नखटाउनसमेत निर्देशन दिएको थियो।
घुमुवा प्रहरीका कारण पटक–पटक संगठन नै विवादमा मुछिँदै आएको छ। गत वर्षमात्रै महोत्तरीमा अख्तियार दुरुपयोग अनुसन्धान आयोगको टोलीले वरिष्ठ हवल्दार राजीशरण साहलाई पाँच हजार घुसहित पक्राउ गरेको थियो।
२०७६ जेठ २३ गते सशस्त्रका इन्सपेक्टरलाई अख्तियारको टोलीले पक्राउ गरेको थियो। रुपन्देहीको विष्णुपुरमा कार्यरत इन्पेक्टर तेजबहादुर जोरा ६ हजार रुपैयाँ घुससहित पक्राउ परेका थिए।
इलाका प्रहरी कार्यालय रनैया, रुपेन्देहीमै कार्यरत सशस्त्रका इन्सपेक्टर केशव वस्नेत १५ हजार रुपैयाँ घसहित पक्राउ परेका थिए। गत जेठमा मात्रै प्रदेश २ स्थित छिन्नमस्ता बाहिनीबाट खटिएका घुमुवाविरुद्ध हाहतियार तस्करलाई सहयोग गरेको आरोपमा पक्राउ पूर्जी नै जारी भएको थियो। रौतहटकामा कार्यरत जवान अरुण झा ३० हजार रुपैयाँ घुससहित पक्राउ परेका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1720358702.jpg)
-1751879619.webp)
-1749826086.png)
