बन्द लघु जलविद्युत सञ्चालनबारे स्थानीय सरकारको चासो

पूर्वाधार

ललित बोहरा बिहीबार, साउन १९, २०७९ १०:३९

बैतडी : बैतडीको सुर्न्या नदीमा सञ्चालित अधिकांश लघु जलविद्युत आयोजना बन्द छन्। आयोजना बन्द हुँदा दुर्गम बस्तीका नागगरिक अन्धकारमै बस्न बाध्य भइरहेका छन्।

नेपाल विद्युत् प्राधिकरणको लाइन पुर्‍याउन नसकिने ठाउँमा बन्द रहेका करोडौं लगानीका लघु जलविद्युत आयोजना तत्काल सञ्चालनका लागि पाटन नगरपालिका चासो बढाएको छ।

देशकै १०औँ नमूना सहरको रुपमा रहेको पाटन नगरपालिकामा रहेका लघु ऊर्जा बन्द हुँदा यहाँका नागरिकले सास्ती खेप्नु परेको छ। उसो त नेपाल विद्युत प्राधिकरणको प्रसारण लाइन नपुगेका दुर्गम बस्तीका नागरिक अन्धकारमा बस्न बाध्य छन्।

नगरपालिको वडा नम्बर ७ मा पर्ने कैलपाल लघु जलविद्युत दुई वर्षदेखि बन्द छ। राष्ट्रिय प्रसारण लाइन समेत नपुगेका उल्ल, उपल्लाबाटुला गाउँका नागरिक दुई वर्षदेखि अँध्यारोमै बस्न बाध्य रहेको स्थानीय गोपाल चन्दले बताए। उनले भने, ‘लघु जलविद्युतका कारण हाम्रोमा अहिलेसम्म बिजुली विस्तार भएको छैन। अँध्यारोमै छौँ।’

बन्द रहेका लघु आयोजना सञ्चालनका लागि पहल सुरु गर्ने पाटन नगरपालिकाको नीति अनुसार कैलपाल ऊर्जाबाट निरीक्षण सुरु गरिएको छ। नगरपालिका आफूले सक्ने सहयोग गर्ने तथा नेपाल विद्युत प्राधिकरणकै लाइनमा मिसाई जनतालाई सेवा दिन आग्रह गर्ने नगर उपप्रमुख कमलसिंह बोहराले बताए। उनले भने, ‘हाम्रो नीति तथा कार्यक्रम अनुसार हामी लघु जलविद्युतको निरीक्षण गरिरहेका छौं।’

२०६८ सालबाट निर्माण सुरु भई २०७५ सालमा निर्माण कम्पनीले उपभोक्तालाई हस्तान्तरण गरेको थियो। ९० किलोवाट विद्युत निकाल्ने सम्झौता कम्पनीले गरेको थियो। तर, वैकल्पिक ऊर्जा प्रर्वद्धन केन्द्रले मापन गर्दा ७५ किलोवाट मात्र उत्पादन देखिएको थियो। त्यसपछि २०७६ मा लाइन विस्तारसँगै तत्कालीन कैलपाल गाविसमा विद्युत् विस्तार भएको व्यवस्थापन समितिले बताएको छ।

तर, पावर हाउस र मुुहान बगाएपछि एक नबित्दै विद्युत उत्पादन बन्द भएको छ। अब नेपाल विद्युत प्राधिकरणले आफ्नो स्वामित्वमा ल्याउन खोजिरहेको कैलपाल ऊर्जा व्यवस्थापन समितिका अध्यक्ष रमेश पाण्डेले बताए।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।