काठमाडौं– ललितपुरको फुलचोकीको जंगलमा एक व्यक्तिले आफ्नै श्रीमतीको हत्या गरेको खुलेको छ। श्रीमती हत्या आरोपमा जिल्ला प्रहरी परिसर ललितपुरको टोलीले दोखलाको भीमेश्वर नगरपालिका–९ घर भइ ललितपुर हरिसिद्धी बस्दै आएका ६३ वर्षीय घ्याल्मो लामालाई पक्राउ गरेको छ।
उनले आफ्नी श्रीमती ४७ वर्षीया रुपा क्षेत्रीको हत्या गरेको परिसर ललितपुरका प्रमुख तथा एसएसएपी यज्ञविनोद पोखरेलले जानकारी दिए।
आइतबार दिउँसो साढे १२ बजेतिर फुलचोकी जंगलमा एक महिलाको शव भेटिएको भन्दै प्रहरीलाई खबर आएको थियो। त्यसपछि घटनास्थल पुगेको स्थानीय प्रहरी युनिटले घटना शंकास्पद भएको भन्दै तालुक कार्यालयमा खबर गरेपछि परिसरबाट डीएसपीको कमाण्डमा टोली खटिएर अनुसन्धान गरेको थियो। अनुसन्धानको क्रममा क्षेत्रीको हत्यामा उनकै श्रीमान लामाको संलग्नता देखिएको भन्दै प्रहरीले सोमबार बिहान ८ बजे युनपार्क नजिकबाट उनलाई पक्राउ गरेको हो।
मोबाइलले दियो ‘क्लु’
शव भेटिएको जानकारी आएपछि फरेन्सिक विज्ञसहित परिसरबाट डीएसपी दीपक भारतीको टोली घटनास्थल गोदावरी नगरपालिका–३ फुलचोकी पुगेको थियो। अनुहारको भाग कंकालको रुपमा परिणत भइसकेकाले मृतकको पहिचान खुल्न सक्ने अवस्था थिएन।
अन्य भाग पनि सडिसकेको अवस्थामा शव भेटिएको थियो। शव अर्धनग्न घोप्टो अवस्थामा भेटिएको थियो। कंकालको घाँटीको भागमा नाइलनको डोरी कसिएको थियो। प्रहरी घटनास्थल पुग्दा मृतक महिलाको नाडीमा लगाएको घडी समेत चालु अवस्थामा थियो।
तर, मृतक को हुन् भन्ने पहिचान प्रहरीले गर्न सकेको थिएन। सडिसकेको लास नजिकै प्रहरीले एउटा महत्त्वपूर्ण ‘क्लु’ भेट्टायो मोबाइल। उक्त मोबाइलकै आधारमा मृतक महिलाको पहिचान भयो– रुपा क्षेत्री। सडिसकेको लास भेटिएपछि परिसरको टोलीले कतै प्रहरीमा जाहेरी आएको छ/छैन भनेर बुझेको थियो। तर, कतै पनि जाहेरी आएको पाइएन। त्यसपछि प्रहरी मृतकको आफन्तसम्म पुग्यो।
घटनाका आरोपी सार्वजनिक गर्ने क्रममा ललिपुर प्रहरी प्रमुख, एसएसपी यज्ञविनोद पोखरेल।
झोलाको फोटोबाट खुल्यो रहस्य
मोबाइल बरामद भएपछि प्रहरीले मृतकको पहिचान गरिसकेको थियो। तर, हत्यारा को हुन् भन्ने पत्ता लगाउन सकेको थिएन। क्राइम सिनमै भएको महिलाको झोला खानतलासी गरेर हेर्दा निलो भेष्ट लगाएको एक पुरुषको पासपोर्ट साइजको फोटो प्रहरीले फेला पारेको थियो।
त्यसपछि फोटोमा देखिएका पुरुष र मोबाइलमार्फत् उनका श्रीमानको खोजी गर्नेतर्फ प्रहरी लागेको थियो। ‘विभिन्न प्राविधिक र म्यानुअल अनुसन्धानबाट हामी मतृकको श्रीमानसम्म पुग्यौं’ परिसरका प्रवक्ता एसपी सुधीरराज शाहीले भने।
आइतबार लास भेटिएपछि अनुसन्धानमा जुटेको प्रहरीले २४ घण्टा नबित्दै मृतकका श्रीमान घ्याल्मोसम्म पुगेर सोमबार बिहान ८ बजे उनलाई पक्राउ गरेको हो। मृतक महिलाको झोलामा भएको फोटो उनकै श्रीमान घ्ल्यामोको भएको पनि पुष्टि भयो। प्रहरीले पक्राउ गरेपछि घ्याल्मोले आफूले श्रीमतीको हत्या गरेको स्वीकार गरेको एसएसपी पोरखेलले बताए।
हत्या आरोपी घ्याल्मो लामा।
ज्यामी काम गर्दा चिनजान, रक्सी विवादपछि हत्या
प्रहरी अनुसन्धान अनुसार रुपा घ्याल्मोको तेस्रो श्रीमती हुन्। पहिलो श्रीमती लालमाया तामाङको १२ वर्ष अघि नै मृत्यु भएको थियो। पहिलो श्रीमतीबाट २ छोरी र १ छोरा छन्।
पहिलो श्रीमतीको मृत्यु भएपछि आइतमाया तामाङलाई दोस्रो श्रीमतीको रुपमा घ्याल्मोले भित्र्याएका थिए। दोलखा बस्दै आएकी आइतमायातर्फ २ छोरा छन्।
हाल हत्या गरिएकी रुपासँग भने ७ वर्षअघि ज्यामी काम गर्ने क्रममा घ्याल्मोको चिनजान भएपछि विवाह भएको थियो। उनीतर्फका भने छोराछोरी छैनन्।
विवाह गरेदेखि नै रुपासँग नराम्रो सम्बन्ध भएको घ्याल्मोले प्रहरीसमक्ष बयान दिएका छन्। श्रीमती रुपा दिनहुँ रक्सी पिएर आफूलाई कुट्ने गरेको घ्याल्माले बताएका छन्।
रक्सी पिउनाले १५/१६ दिनसम्म घरमा समेत नआउने, आएको बेलामा पनि निहुँ खोज्ने र कुटपिट गर्ने गरेको घ्याल्मोको दाबी छ।
भदौ १६ गते रक्सी खाएर श्रीमतीले झगडा गरेपछि आफू डेराबाट निस्केर हिँडेको उनले प्रहरीसमक्ष बताएका छन्। श्रीमती पनि आफ्नै पछि लागेर आएको र माइक्रो चढेर गोदावरीसम्म पुगेको, त्यसपछि हिँडेर फुच्चोकी डाँडामा पुगेपछि हत्या गरेको घ्याल्मोले बताएको प्रहरीले जनाएको छ।
हत्या गरिएकी रुपा क्षेत्री।
झण्डाको डोरीले घाँटी कसेर हत्या
मृतकको घाँटीमा नाइलनको डोरी कसिएको अवस्थामा रहेको भन्दै प्रहरीको घटनास्थल मुचुल्कामा उल्लेख गरेको छ। उक्त डोरी भने पक्राउ परेका घ्याल्मोले फुलचोकीमै पाएको प्रहरीसमक्ष बताएका छन्।
प्रहरीका अनुसार फुलचोकी डाँडामा पुगेपछि श्रीमान–श्रीमतीबीच विवाद भएको थियो। विवादको क्रममा ‘कि तँ मर कि म तँलाई मार्छु’ भन्नेसम्मको विवाद भएको पक्राउ परेका घ्याल्मोले बताएको प्रहरीको दाबी छ।
त्यसपछि घ्याल्मोले नजिकै रहेको बौद्ध धर्मावलम्बीको झण्डामा बाँधिएको डोरी निकालेर घाँटी कसेर श्रीमतीको हत्या गरेको खुलेको प्रहरीको दाबी छ। श्रीमतीको हत्या गरेपछि घ्याल्मो आफ्नी छोरीकोमा हरिसिद्धी बस्दै आएका थिए।
पक्राउ परेका घ्याल्मोलाई कर्तव्य ज्यानको कसूरमा म्याद लिएर प्रहरीले अनुसन्धान प्रक्रिया अघि बढाएको छ। शव भने पोष्टमार्टमका लागि पाटन अस्पतालमा पठाइएको प्रहरीले जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1751879619.webp)
-1749826086.png)
