काठमाडौं– सर्लाहीका थापाजी भनिने लाल मोहम्मद दर्जी हत्यामा जेलमा रहेका भारतीय नागरिक उदय सेट्टीसम्मको कनेक्सन देखिएपछि उनीमाथि अनुसन्धानको तयारी सुरु गरिएको छ।
नख्खु कारागारबाट केही समय पहिला रसुवा कारागार पुर्याइएका सेट्टी र मोहम्मद हत्याका योजनाकार भारतीय नागरिक नितिन मदनको निरन्तर सम्बन्ध रहेको देखिएपछि सेट्टीमाथि अनुसन्धान प्रक्रिया सुरु गरिएको हो। रसुवा कारागार पुगेर प्रहरीको एक टोलीले सेट्टीमाथि अनुसन्धानका लागि प्रक्रिया सुरुको तयारी थालिसकेको उच्च स्रोतले नेपाल लाइभलाई जानकारी दियो।
‘मोहम्मदको हत्याका मुख्य योजनाकार नितिनको निरन्तर सम्पर्क सेट्टीसँग रहेको देखिएपछि उनीमाथि अनुसन्धान सुरु गरिएको हो। सेट्टीमाथि अनुसन्धान गरेपछि केही नयाँ तथ्य खुल्न सक्छ भन्ने आशा हाम्रो छ’, प्रहरी स्रोतले भन्यो।
भारतीय नागरिक नितिन भने लामो समयदेखि काठमाडौंमै बस्दै आएको र उनको मोबाइल नम्बरमा रसुवा कारागारबाट निरन्तर फोन सम्पर्क भएको देखिएपछि सेट्टी–नितिन कनेसक्न देखिएको थियो।
अनुसन्धानको क्रममा नितिन सेट्टीकै विश्वास पात्र भएको र उनकै निर्देशनमा काम गर्ने गरेको खुलेपछि प्रहरीले जेलमा रहेका सेट्टीमाथि अनुसन्धान अघि बढाएको हो। सेट्टीकै निर्देशनमा यो समूहले काठमाडौंमा हुण्डीको धन्दा चलाउने र ठूलो कमिसन लिने गरेको अनुसन्धानबाट खुलेको छ।
रसुवा कारागारमा रहेका भारतीय नागरिक सेट्टी अपहरण घटनामा पक्राउ परेर जेल बसेका व्यक्ति हुन्। अपहरणका मुख्य नाइके अमर टण्डन पक्राउ परेपछि त्यसको बिडो सेट्टीले धान्दै नेपालमा अपहरण श्रृंखला नै चलाएका थिए। २०६६ सालमा तत्कालीन महानगरीय प्रहरी अपराध महाशाखाले सेट्टीसहितका व्यक्तिलाई पक्राउ गरेको थियो। त्यसयता उनी जेलमै छन्।
नितिन लामो समयदेखि काठमाडौंमा बस्दै आएका थिए। उनका दाई र आमा अहिले पनि काठमाडौंमै बस्छन्। मोहम्मद हत्यापछि उनी भने फरार छन्। वसन्तपुरमा बस्दै आएका नितिन मोहम्मद हत्याको केही समय पहिलामात्रै भोटेबहालमा डेरा सरेको अनुसन्धानबाट खुलेको छ। प्रहरी उच्च स्रोतका अनुसार नितिनका दाजुमाथि प्रहरीले यो घटनाका बारेमा सोधपुछ समेत गरिरहेको छ।
हत्याका योजनाकार नितिन र उनीसँगै सुटर रहेको फुटेज पनि प्रहरीले हात पारेको छ। सेतो सर्ट, खैरो क्याप टोपी, कालो झोला बसेर होटलको लबीमा नितिनसँगै उभिएको अवस्थामा फुटेज प्रहरी फेला पारेको छ। उक्त फुटेजलाई पनि केन्द्रमा राखेर प्रहरीले अनुसन्धान गरिरहेको छ।
सोमबार साँझ ६ बजेर ४५ मिनेटतिर बा ६ च ५१५२ नम्बरको कारमार्फत् गोठाटारमा रहेको आफ्नो गार्मेन्ट पसलमा आइपुगेका बेला रातो रङको सर्ट लगाएका व्यक्तिले मोहम्मदमाथि गोली प्रहार गरी हत्या गरेका थिए। सुटरले उनलाई लडाएर छाती, कन्चट, टाउकोमा गरी चार राउण्ड गोली प्रहार गरेका थिए।
हुण्डी धन्दा चलाउनेको पहिचान खुल्यो
मोहम्मद हत्याका मुख्य योजनाकार नितिन काठमाडौंमा बसेर हुण्डी धन्दा चलाउने गरेका थिए। तर, यसका मुख्य नाइके भने भारतमै बसेर काठमाडौंमा हुण्डीको गिरोह चलाउने गरेको खुलेको छ।
ती व्यक्ति हुन् गुलाम जिलानी खान। भारत दिल्लीमा बसेर उनी नेपालमा हुण्डीको धन्दा सञ्चालन गर्नेको मुख्य नाइके रहेको प्रहरी अनुसन्धानबाट खुलेको छ। जिलानी खानकै निर्देशनमा काठमाडौंमा बसेर नितिन र मोहम्मदले काम गर्ने गरेको प्रहरीको दाबी छ।
उनै जिलानी खानको हुण्डीको रकम ७० लाख नेपाली र ३० लाख भारु करिब एक वर्ष अघि काठमाडौंबाट लुटिएको थियो। लुटिएको उक्त रकम हुण्डीको भएकाले पीडितले समेत प्रहरीलाई खबर गर्न सकेका थिएनन्।
हुण्डीको उक्त रकम मोहम्मदले नै लुटेर लगेकोे नितिन र जिलानी खानको बझुाइ रहेको थियो। रकम नै लुटेर लगेपछि भएको खटपटबाट सुरु भएको द्वन्द्वको कारण मोहम्मदको हत्या भएको हुनसक्ने प्रहरी प्रारम्भिक निष्कर्ष छ।
मोहम्मदको हत्या गर्न नितिनले नै गोठाटारको मोहम्मदको डेरा नजिकै कोशिपारी गेष्टहाउसमा भाडामा सुटर राखेको खुलेको छ। जितन खानको नाममा कोठा बुक गरेर गेष्टहाउसमा बसेर रेकी गरिसकेपछि मोहम्मदको हत्या भएको प्रहरी निष्कर्ष छ।
हुण्डीको धन्दा सञ्चालन गर्ने मुख्य नाइके जिलानी खानले नेपालबाटै विवाह गरेकाले उनी पनि पटक–पटक नेपाल आउने र क्यासिनोमा गएर जुवा खेल्ने गरेकोसम्मको रिपोर्ट प्रहरीले प्राप्त गरेको छ।
थप सामग्री :
गोठाटार गोलीकाण्ड: जुवा खालबाट पक्राउ परेका नितिन मदनले बनाएका थिए मोहम्मद हत्याको योजना?
गोठाटारमा मारिएका मोहम्मद: नक्कली भारुको कारोबार, काठमाडौंमा बलरामको हत्या र पाकिस्तानी एजेन्टलाई फोन
गोठाटार गोलीकाण्ड अनुसन्धान गर्न विशेष समिति गठन
गोठाटार गोली काण्ड : विवादास्पद पृष्ठभूमिका मोहम्मदको हत्या गर्ने को हुन्?
गोठाटारमा गोली प्रहारबाट घाइते भएका व्यक्तिको उपचारका क्रममा मृत्यु
पल्सर मोटरसाइकलमा आएका २ जनाले चलाएका थिए गोठाटारमा गोली
काठमाडौंको गोठाटारमा गोली चल्यो
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1751879619.webp)
-1749826086.png)
