यी हुन् माओवादीबाट उम्मेदवार बनेका २० नयाँ अनुहार

निर्वाचन विशेष

भूपेन्द्र शाह ठकुरी मंगलबार, असोज २५, २०७९ १८:२९

काठमाडौं- नेकपा माओवादी केन्द्रले मंसिर ४ गते हुने प्रतिनिधि सभा निर्वाचनको प्रत्यक्षतर्फ धेरै नयाँ अनुहारलाई मौका दिएको छ।

माओवादी केन्द्रले उम्मेदवार बनाएका नयाँ अनुहारमध्ये अन्य पार्टी परित्याग गरी आएकादेखि पार्टीका विभिन्न संगठनमा सक्रिय युवाहरु छन्।

केन्द्रीय सदस्य तथा जिल्ला इन्चार्ज खेलप्रसाद बुढा क्षेत्री (पराग) ले ताप्लेजुङबाट प्रतिनिधि सभाको टिकट पाएका छन्। उनी द्वन्द्वकालदेखि नै माओवादी केन्द्रमा आवद्ध भएका थिए। पार्टीको विभिन्न जिम्मेवारीमा रहेका उनले यसअघि अवसर पाएका थिइनन्।

सुनसरी- १ बाट मुक्सामहाङ सुब्बाले उम्मेदवारी दर्ता गराएका छन् भने सुनसरी- ३ बाट नरेन्द्र साह उम्मेदवार बनेका छन्। साहले यसअघि स्वतन्त्र उम्मेदवारी दिएका थिए। उनी माओवादीकै रामेश्वर राय यादवसँग पराजित भएका थिए।

यस्तै रविन्द्र पटेलले रौतहट- ३ बाट माओवादी केन्द्रका तर्फबाट उम्मेदवारी दर्ता गराएका छन्। उनी पनि नयाँ हुन्।

माओवादी केन्द्र दोलखाका संस्थापक नेतामध्येका गंगा कार्कीले उम्मेदवारी दर्ता गराएका छन्। उनी पनि संसदीय प्रतिस्पर्धामा पहिलो पटक आउन लागेका हुन्।

त्यसैगरी काठमाडौं- ३ बाट बद्रीप्रसाद बजगाईंले उम्मेदवारी दिएका छन्। उनी पनि नयाँ हुन्।

बर्दियाबाट माओवादी केन्द्रका सुरेश पन्थ पहिलो पटक प्रतिनिधि सभाको सदस्यमा उम्मेदवार बनेका छन्।

मानुषी माओवादीको चुनाव चिह्नबाट लड्दै
नेपाल समाजवादी पार्टीकी नेतृ मानुषी यमि भट्टराई सत्ता-गठबन्धनको तर्फबाट नेकपा (माओवादी केन्द्र) को चुनाव चिह्नबाट काठमाडौं- ७ बाट पहिलो पटक प्रतिस्पर्धा गर्दैछिन्।

उनी पूर्व प्रधानमन्त्री बाबुराम भट्टराई र हिसिला यमिकी छोरी हुन्। हिसिला यही क्षेत्रबाट सांसद बनेकी थिइन्।

काठमाडौं- ९ बाट माओवादी पोलिटब्युरो सदस्य कल्पना धमलाले उम्मेदवारी दर्ता गरेकी छन्। उनी पनि पहिलो पटक संसदीय प्रतिस्पार्धामा जाँदै छिन्।

अग्नीको ठाउँमा भतिजको उम्मेद्वारी
निवर्तमान सभामुख अग्नीप्रसाद सापकोटाको क्षेत्र सिन्धुपाल्चोक- १ मा उनकै भतिजा माधव सापकोटाले उम्मेदवारी दिएका छन्। माओवादी केन्द्रको पोलिटब्युरो सदस्य र सिन्धुपाल्चोक जिल्ला इन्चार्ज समेत रहेका सापकोटा पहिलो पटक निर्वाचनमा होमिँदैछन्।

भागबण्डामा सिन्धुपाल्चोक- १ माओवादी केन्द्रको भागमा परेको थियो। अग्नीले चुनाव जित्दै यो क्षेत्रमा माओवादी केन्द्रले युवा नेता सापकोटालाई टिकट दिएको हो।

जिल्लामा राम्रो संगठन गर्ने र कार्यकर्तामाझ परिचित भए पनि उनी अग्नी सापकोटाको छायामा पर्दै आएका थिए। यस पटक सभामुख सापकोटाले युवालाई प्राथमिकता दिने भन्दै उम्मेदवार हुन अस्वीकार गरेपछि उनले टिकट पाएका हुन्।

प्रचण्डको क्षेत्र चितवनमा डा. भोजराज
माओवादी केन्द्रका अध्यक्ष पुष्पकमल दाहाल प्रचण्डको गृह जिल्ला चितवन- ३ मा डा. भोजराज अधिकारीले उम्मेदवारी दर्ता गरेका छन्। प्रचण्डले गोरखा रोजेसँगै माओवादीले सो क्षेत्रमा अधिकारीलाई ल्याएको हो। उनी पहिलो पटक प्रतिनिधि सभाको निर्वाचनमा प्रतिस्पर्धा गर्न लागेका हुन्।

नवलपरासी बर्दघाट सुस्ता पूर्व- २ बाट माओवादी केन्द्रकै नेता बालकृष्ण गैरेले उम्मेदवारी दर्ता गरेका छन्। गैरे २०७४ सालको निर्वाचनमा नवलपरासी पूर्व- २ (क) मा कांग्रेसका विष्णु लामिछानेसँग पराजित भएका थिए।

एमाले परित्याग गरी माओवादी रोजेका राना उम्मेदवार
झापा- २ बाट हरिकुमार राना उम्मेदवार बनेका छन्। उनी माओवादी केन्द्रका नयाँ अनुहार हुन्। राना यसअघि नेकपा एमालेबाट झापा अर्जुनधारा नगरपालिकाका नगर प्रमुखमा विजयी भएका थिए। उनी एमाले परित्याग गरी माओवादी केन्द्रमा प्रवेश गरेका थिए।

हरिबोलको ठाउँमा राजनलाई मौका
सिन्धुली- २ को प्रतिनिधिसभा सदस्यका लागि लेखनाथ दाहाल (राजन) ले उम्मेदवारी दर्ता गरेका छन्। दाहाल पार्टीका पोलिटब्युरो सदस्य एवं पूर्व बागमती प्रदेश सभा सदस्य हुन्।

२०७४ सालको निर्वाचनमा सिन्धुली- १ को प्रदेश सभा (क) मा विजयी भएका दाहाल यस पटक संघमा निर्वाचन लड्न लागेका हुन्।

माओवादी केन्द्रबाट सिन्धुली- २ बाट प्रतिनिधि सभामा दुई पटक विजयी भएका पार्टी उप-महासचिव हरिबोल गजुरेलले यस पटक टिकट पाएनन्।

माओवादी केन्द्रबाट २०४७ सालको निर्वाचनमा रुकुम पूर्व (ख) बाट प्रदेश सभामा निर्वाचित भएका पूर्णबहादुर घर्ती मगर उम्मेदवारमा बढुवा भएका छन्। उनी यस पटक रुकुमपूर्वबाट प्रतिनिधि सभा सदस्यका लागि उम्मेदवार बनेका छन्। उनी लुम्बिनी प्रदेश सभाका सभामुख समेत हुन्। प्रदेश सभाको अनुभव सहित उनी पहिलो पटक प्रतिनिधि सभामा उठेका हुन्।

विवादित कार्चेन पनि उम्मेदवार
गैरसांसद भएर मन्त्री भएको भन्दै विरोध खेपेका हुम्लाका छिरिङ डम्डोल लामा(कार्चेन) प्रतिनिधि सभाको उम्मेदवार बनेका छन्। हुम्लाका छिरिङ डम्डुल लामा माओवादीको कोटाबाट कर्णाली प्रदेश सरकारको उद्योग पर्यटन वन तथा वातावरण मन्त्री भएका थिए।

लामाले मूर्ति चोरेको अभियोगमा दुई वर्ष जेल सजाय र पाँच हजार जरिवाना समेत तिरेका थिए। २०४९ सालमा तिब्बतको खोचेरनाथ गुम्बाबाट १२ सय वर्ष पुरानो मूर्ति चोरेर ल्याएको अभियोगमा दोषी ठहर भई लामाले कैद र जरिवाना भुक्तान गरेका थिए।

माओवादी केन्द्रले उनलाई पहिलो पटक प्रतिनिधि सभा सदस्यको उम्मेदवार बनाएको हो।

त्यसैगरी कैलाली- २ बाट माओवादी केन्द्रले नयाँ अनुहार भरतबहादुर बडुवाललाई प्रतिनिधि सभाको उम्मेदवार बनाएको छ।

कैलाली- ३ बाट माओवादी केन्द्रबाट कृष्णकुमार चौधरी उम्मेदवार बनेका छन्। चौधरी २०६४ मा माओवादीबाट निर्वाचित संविधान सभा सदस्य हुन्।

त्यसैगरी बैतडीका नरेन्द्रबहादुर कुँवरले पनि प्रतिनिधि सभामा टिकट पाएका छन्। कुँवर २०६४ सालको निर्वाचनमा संविधान सभा सदस्यमा निर्वाचित भएका थिए।

माओवादीले जुम्लाबाट गोमा गौतमलाई उम्मेदवार बनाएको छ। उनी कर्णाली प्रदेशकै एक मात्र महिला उम्मेदवार हुन्। उनी पहिलो पटक उम्मेदवार बनेकी हुन्।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।