देउवासँग हारको ह्याट्रिक बेहोरेका खगराज, देउवाकै साथ पाएर चुनिए सांसद!

निर्वाचन विशेष

ललित बोहरा बिहीबार, मंसिर ८, २०७९ १०:३६

अमरगढी– नेपाली कांग्रेसका सभापति शेरबहादुर देउवा प्रतिनिधि सभामा निर्वाचित भइसकेका छन्। यसपटक ‘नयाँ’ प्रतिद्वन्द्वीलाई पछि पार्दै देउवाले डडेलधुराबाट सातौंपटकका लागि संसदको सिट सुरक्षित गरे।

२०६४ सालयता देउवासँग भिडेर लगातार हार बेहोरिरहेका खगराज भट्ट पनि यसपटक सांसद चुनिएका छन्, सुदूरपश्चिम प्रदेशको। डडेलधुरा प्रदेश सभा (१) मा नेकपा एमालेका पठानसिंह बोहोरालाई पराजित गर्दै भट्ट प्रदेश सभा सदस्य निर्वाचित भए।

माओवादी जनयुद्धका बेला सुदूरपश्चिमका विभिन्न जिल्लाको ईञ्चार्ज भएर जिम्मेवारी निभाएका खगराज हाल माओवादी केन्द्रको पोलिटब्यूरो सदस्य र सुदूरपश्चिम प्रदेश ईञ्चार्ज छन्। २०६४ सालको चुनावमा देउवासँग ‘झिनो’ मतको अन्तरले हारेका उनी त्यसपछिका २ निर्वाचन, संविधान सभा निर्वाचन २०७० र प्रतिनिधि सभा निर्वाचन २०७४ मा पनि देउवासँगै पराजित भए।

यसपटक भने देउवाकै ‘साथ’ पाएर प्रदेश सभा सदस्यमा विजयी भएका छन्।

विजयी भएका खगराजले १२ हजार ११२ मत ल्याए भने उनका प्रतिस्पर्धी एमालेका पठानसिंह बोहोरा ९ हजार १९५ मतमा सीमित रहे। बोहोरालाई २ हजार ९१७ मतको मतान्तरले पराजित गर्दै भट्टले प्रदेश सभाको सिट सुरक्षित गरे।

यस्तै, स्वतन्त्र उम्मेदवार महेशसिंह धामीले १ हजार ७५४, राप्रपाका पदमराज जोशीले ७६२ र धनबहादुर बोहराले २०२ मत पाएका छन्। २५ हजार ३६१ मत खसेकोमा १ हजार ३३६ मत बदर भयो।

२०७४ सालको निर्वाचनमा डडेलधुरा (१) बाट तत्कालीन वाम गठबन्धनको साझा उम्मेदवारका रुपमा बोहोरा निर्वाचित भएका थिए। पछि उनी सुदूरपश्चिम प्रदेश सरकारमा भौतिक पूर्वाधार विकास मन्त्री समेत भए।

मुख्यमन्त्रीका दाबेदार
भट्ट सुदूरपश्चिम प्रदेशको भावी मुख्यमन्त्रीका दाबेदार समेत हुन्। २०७४ सालको निर्वाचनपछि सुदूरपश्चिममा माओवादीकै नेतृत्वमा सरकार गठन भएको थियो। वाम गठबन्धन गरेर चुनावी प्रतिस्पर्धमा उत्रिएका एमाले र माओवादीले पार्टी एकीकरण गरे, नेकपा बन्यो।

प्रदेश सभामा बलियो उपस्थिति रहेको नेकपाको शक्तिशाली सरकारको नेतृत्व त्रिलोचन भट्टले गरे। नेकपा विभाजनपछि अरु प्रदेशमा सरकारहरु फेरबदल भए। तर, सुदूरपश्चिममा भने माओवादीको सरकार ५ वर्षै कायम रह्यो।

माओवादीले यसपटक पनि सुदूरपश्चिम प्रदेश सरकारको दाबेदारी गरेको छ।

चुनावी प्रचारका क्रममा गृहजिल्लामा आयोजित चुनावी सभामा प्रधानमन्त्री एवम् कांग्रेस सभापति देउवाले पनि खगराज मुख्यमन्त्री बन्ने घोषणा गरेका थिए।

कात्तिक २० गते जोगबुढामा आयोजित चुनावी सभालाई सम्बोधन गर्दै देउवाले भनेका थिए, ‘मेरो पार्टीले पनि भने त भइहाल्यो नि, यसपछि गठबन्धनको सरकारमा मुख्यमन्त्री खगराज भट्ट नै हो। तपाईंहरू जिताएर पठाउनुस्।’