देउवाका गाउँले, सत्ता गठबन्धनका ‘बागी’, दोस्रो प्रयासमा प्रदेश सांसद बने तारा जोशी

निर्वाचन विशेष

ललित बोहरा बिहीबार, मंसिर ८, २०७९ १२:५०

अमगरगढी– प्रदेश र प्रतिनिधि सभा निर्वाचनका लागि मनोनयनको अवधि नजिकिँदै गर्दा प्रधानमन्त्री तथा नेपाली कांग्रेसका सभापति शेरबहादुर देउवाको गृहजिल्ला डडेलधुरामा प्रदेश सभाको सिट बाँडफाँटलाई लिएर सत्ता गठबन्धनमै सकस परेको थियो।

गठबन्धनको नेतृत्वकर्ता कांग्रेससँगै दुई प्रमुख दल नेकपा माओवादी केन्द्र र नेकपा एकीकृत समाजवादीले प्रदेश सभाको एउटा सिट जसरी पनि पाउनुपर्ने अड्डी कसिरहेका थिए। कांग्रेसका जिल्लास्तरीय नेताहरुले प्रतिनिधि सभा र प्रदेश सभाका सबै सिटमा आफूहरुकै दाबी रहने बताइरहँदा देउवा भने एउटा सिट छाड्न राजी थिए।

संसदीय प्रतिस्पर्धमा उत्रिएपछि आफूसँग लगातार हार बेहोर्दै आएका माओवादी केन्द्रका नेता खगराज भट्टका लागि देउवा प्रदेश सभा (१) छाड्न तयार थिए, छाडे पनि। तर प्रदेश सभा (२)मा भने एकीकृत समाजवादी र कांग्रेसको आ–आफ्नै दाबी थियो। केन्द्रीय तहमा सहमति बन्यो– प्रदेश सभा २ मा कांग्रेसले उम्मेदवारी दिने।

डडेलधुराबाट नेकपा एमालेको ठूलै पंतिसहित एकीकृत समाजवादीमा आएका डा तारा जोशीको गठबन्धनबाट प्रदेश सभा सदस्यको उम्मेदवार बन्ने लक्ष्य समाप्त भयो।

उनले आफ्नै वलमा चुनाव लड्ने निधो गरे, र गठबन्धनसँग विद्रोह गरेर प्रदेश सभा (२) बाट प्रदेश सभा सदस्यका लागि स्वतन्त्र उम्मेदवारी दिए।

गठबन्धनको साझा उम्मेदवारका रुपमा डडेलधुरा प्रदेश सभा (२)मा कांग्रेसबाट सुदूरपश्चिम प्रदेश सरकारका सामाजिक विकासमन्त्री समेत रहेका गोविन्द राज बोहरा चुनावी प्रतिस्पर्धामा उत्रिए। २०७४ सालको चुनावमा समानुपातिकबाट प्रदेश सांसद बनेका उनी यसपटक प्रत्यक्ष रुपमा जनअनुमोदित हुने पक्षमा थिए।

तर, पार्टी सभापति एवम् प्रधानमन्त्री देउवाका गाउँले, गठबन्धनका ‘बागी’ उम्मेदवार जोशीले बोहोराको लक्ष्यमा ब्रेक लगाइदिएका छन्। जोशी बोहोरालाई ४२५ मतको अन्तरले पराजित गर्दै प्रदेश सभा सदस्य निर्वाचित भएका छन्।

जोशीले ११ हजार १६२ मत पाउँदा बोहरा १० हजार ३७३ मतमा सीमित रहे।

जोशी २०७४ सालको चुनावमा पनि डडेलधुरा प्रदेश सभा (२) बाट प्रदेश सभा सदस्यका उम्मेदवार बनेका थिए। तत्कालीन वाम गठबन्धनबाट नेकपा एमालेको उम्मेदवार रहेका उनी कांग्रेसका कर्ण मल्लसँग झिनो अन्तरले पराजित भएका थिए।

२०७४ सालमा कांग्रेसका मल्ल १३ हजार ४१३ मत ल्याएर विजयी हुँदा जोशी १३ हजार ५७ मतमा सीमित भएका थिए। ५ वर्षको अवधिमा डडेलधुराका लागि एमाले र कांग्रेस दुवैको राजनीति फेरियो।

मल्ल कांग्रेसबाट कारबाहीमा परे, र नेपाली कांग्रेस बीपीमा लागे। जोशी एमाले छाडेर एकीकृत समाजवादीमा लागे। पार्टी गठबन्धनमा सहभागी हुँदा जोशीले पार्टी र गठबन्धनसँग विद्रोह गरेर उम्मेदवारी दिए। जोशीलाई मल्लले समर्थन गरे।

मल्ल प्रतिनिधि सभा सदस्यको निर्वाचनमा पराजित भए। जोशीले भने प्रदेश सभाको यात्रा तय गरे।