प्रतिकात्मक तस्बिर (पेक्सल)
काठमाडौं– कतारमा जारी विश्वकप फुटबलले यतिबेला सबैको ध्यान आकृष्ट गरेको छ।
नेपाली कलाकार तथा चलचित्रकर्मीलाई पनि विश्वकप लागिरहेको छ। सेलेब्रिटीहरू विश्वकपमा सहभागीमध्ये आफू समर्थक देशको टिसर्ट लगाएर ‘सेलिब्रेट’ गरिरहेका छन्।
तर, फिल्म क्षेत्रलाई भने विश्वकपले शून्यप्रायः बनाइदिएको छ। बरु नेपालका मल्टिप्लेक्स हलमा विश्वकपको फाइनल देखाउने तयारीमा छन् हल सञ्चालकहरू।
शुक्रबार प्रदर्शनमा आएको फिल्म ‘पासो’ले हलमा दर्शक नै पाएको छैन। फिल्मले लाखको व्यापार पनि गर्न नसकेपछि निर्माता निराश छन्। अन्य कारणहरूसँगै विश्वकपको प्रभावले पनि फिल्मको व्यापारलाई नोक्सान गरेको निर्माता भगवान भुजेल बताउँछन्।
‘फिल्म रिलिजको टाइमिङ गलत भयो। दर्शकहरू विश्वकप हेरेर बिहान सुत्छन्। यस्तो बेलामा फिल्म हेर्न को आउँछ र?’ उनी भन्छन्।
आगामी शुक्रबारबाट रिलिज हुने दुई फिल्म ‘डेसान’ र ‘कमान्डो’लाई पनि विश्वकपले असर गर्ने देखिएको छ।
फिल्म वितरक मनोज राठी विश्वकपले फिल्मलाई असर गरेका अघिल्ला घटना सम्झन्छन्। उनका अनुसार सन् २००२मा दक्षिण कोरिया र जापानमा भएको विश्वकपमा नेपालमा फिल्म ठप्प भएको थियो। ‘त्यतिबेला व्यापारलाई पूरै असर गरेको थियो,’ राठीले भने। ४ वर्षअघिको विश्वकपमा पनि फिल्म क्षेत्रको व्यापारलाई असर गरेको उनी बताउँछन्।
फिल्म वितरक करण श्रेष्ठ पनि विश्वकपले फिल्म क्षेत्रमा असर गरेको बताउँछन्। ‘वर्ल्डकपले फिल्म रिलिजसँगै प्रचारप्रसारलाई पनि असर गर्ने रहेछ। अहिले रिलिज भएका फिल्महरूको हाल त्यस्तै छ,’ उनी भन्छन्, ‘कि त विश्वकप बिर्साउने फिल्म हुनुपर्यो। नत्र त नेपाल मात्र हैन अन्य देशमा पनि यसको असर छ।’
डिसेम्बर १८सम्म विश्वकप जारी छ। त्यसपछि मात्र फिल्म क्षेत्रमा चर्चा र व्यापारमा उकालो लाग्ने उनी बताउँछन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1751630115.png)
-1751625798.png)
-1751533150.jpg)
-1749826086.png)
