पाटन नगरपालिका: केहीलाई माग्दा पनि जिम्मेवारी दिइएन, केहीलाई हाजिरमात्र लगाएर तलब

समाचार

ललित बोहरा बुधबार, कात्तिक १, २०८० २०:४२

बैतडी– बैतडीको पाटन नगरपालिकामा हाजिर मात्र लगाएर तलब खाने कर्मचारी बढदै गएका छन्। नगरपालिकाले जिम्मेवारी नदिएर तथा पहुँचका आधारमा हाजिर लगाएर तलब खाने बढदै गएका हुन्। स्थानीय कर्मचारीलाईसमेत जिम्मेवारी नदिइएपछि हाजिर लगाएर घर जाने गरेका छन्।

छैठौं अधिकृत विनोट भट्ट अध्ययन बिदा सकेर पाटन नगरपालिका हाजिर भएको ८ महिना पुग्नै लागे पनि उनलाई जिम्मेवारी दिइएको छैन। उनले तत्कालीन प्रमुख प्रशासकीय अधिकृत लक्ष्मी भट्टलाई जिम्मेवारीका लागि निवेदन दिँदासमेत उनलाई कामकाजमा खटाउन सकेको छैन।

उनको दरबन्दी कैलपाल स्वास्थ्य चौकी भएको नगरपालिकाले जनाए पनि उनले आफ्नो दरबन्दी नगरपालिकाको कार्यालयमै भएको दाबी गर्दै आएका छन्।

393651990_284003591197585_3120812383214712224_n-1697640969.jpg

अहिले नयाँ प्रमुख प्रशासकीय अधिकृत शेरबहादुर बुढालाईसमेत उनले जिम्मेवारी दिन माग गर्दै निवेदन पेस गरेका छन्। छैठौं अधिकृत भट्ट अध्ययन बिदा सकेर आएपछि जिम्मेवारी पाएका छैनन्।

सामाजिक विकास शाखा, स्वास्थ्य शाखा प्रमुख वा शिलंगा स्वास्थ्य चौकी प्रमुख माग गरेको भट्ट बताए। अर्का हुन् हुन् दानबहादुर विष्ट, आफूलाई छठौं अधिकृत दाबी गर्ने पाँचौ तहका कृषि प्राविधिक।

उनलाई ३ वर्षदेखि हाजिरकै आधारमा नगरपालिकाले तलब दिने गरेको खुलासा भएको छ। स्रोतका अनुसार कृषि शाखा प्रमुखको जिम्मेवारी मागेका उनले नदिएपछि कामकाज नगरेका हुन्।

उनको स्वाभाव ठूलो स्वरमा बोल्ने र कहिले काहिँ धेरै रिसाउने खालका पनि छ। कहिले हाकिमको कुर्सीमा गएर बसिदिने त कहिले मनलाग्दी काम गर्ने गरेको नगरपालिका स्रोतले जनाएको छ।

९ महिना यता नगरपालिको गाडी खराब भएपछि चालक भुवन भण्डारी पनि हाजिर लगाएर घर जाने गरेका छन्। उनी आफू एम्बुलेसको चालक भएको दाबी गर्छन् तर उनलाई एम्बुलेसको जिम्मेवारी दिइएको छैन्।

त्यसपछि १० बजे हाजिर लगाउन कार्यालय आउँछन् त्यसपछि निस्किने उनी ४ बजे फेरि ई–हाजिर लगाउन आउँछन्। त्यस्तै पुरानो एम्बुलेस चालक चक्रबहादुर चन्दको पनि हजिर लगाएर घुम्ने वा घर जानेबाहेक कुनै जिम्मेवारी छैन। नगरपालिकाले नयाँ एम्बुलेस खरिद गरेपछि दमकलमा सहायक चालकको रुपमा रहेका भुवन केसीलाई चालक बनाएपछि उनी करिब ७ महिनाबाट जिम्मेवारीविहीन छन्। दमकल चालक विहीन छ।

अनमी धानादेवी पन्तलाई सकार स्वास्थ्य चौकी पाटन नगरपालिका १ मा दरबन्दी भए पनि पहुँचकाभरमा नगरपालिकाको कार्यालयमा दर्ता चलानी कर्मचारी भनेर राखिएको छ। उनी पनि हाजिर लगाएर घर जाने गर्छिन्।

स्वास्थ्य संस्थामा हुनुपर्ने अनमी दर्ता चलानी छिन् तर कसैले बोल्न सक्दैन। आफू बिरामी भएकोले १ नम्बर वडामा काम गर्न जान नसकेको बताउँदै आएकी छन्। एक महिना बिरामी बिदा लिएकी उनलाई दार्ता चलानीमै राखिको छ तर दर्ता चलानी अरुले नै गर्नुपर्ने बाध्यता रहेको स्रोतको भनाइ छ।

तीन वर्षे तलबी अध्ययन बिदा सकेर काममा फर्किएकी अनमी निहा भट्ट पनि जिम्मेवारी नलिएर हाजिरकै भरमा तलब खाने गरेकी छन्। गुजर स्वास्थ्य चौकीमा दरबन्दी भए पनि पहुँचकै भरमा नगरपालिकामै बसेर उनलाई तलब खातामा आउँछ।

नगरप्रमुख र प्रमुख प्रशासकीय अधिकृतहरुलेसमेत कुनै पनि कर्मचारीको विषयमा चासो दिएका छैनन्। तर उप सचिव ओमप्रशाद पाण्डेयले प्रमुख प्रशासकीय अधिकृत पाएको समयमा दरबन्दी मिलाउन खोजेका थिए।

दरबन्दी अनुसारका स्वास्थ्यकर्मी आएपछि पाटन नगरपालिका वडा नम्बर १० का करारका कर्मचारीको ठाउँमा स्थायी आएको पत्र नगरपालकालाई आयो। त्यस अनुसार करारका कर्मचारीलाई करार अवधि सकिएको पत्र गयो। पत्रबारे कार्यपालिकामा बहस भयो।

स्थायी र करार दुवैलाई त्यहिँ राख्ने भन्दै करारका कर्मचारीलाई असारसम्म म्याद थपको निर्णय भयो। त्यसपछि प्रमुख प्रशासकीयले गरेको प्रशासकीय काम कार्यपालिकाले उल्टाउन थालेकाले उनले दरबन्दी मिलानको काम छोडेको स्रोतको दाबी छ। प्रशासकीय अधिकृत तथा कर्मचारीले सिधै गर्नसक्ने काम पनि कार्यपालिकाले नगर्न दिएपछि प्रशासकीय अधिकृत छोडेर जान बाध्य छन्।

अहिले नयाँ प्रमुख प्रशासकीय अधिकृत शेरबहादुर बुढा आएका छन्। आफू प्रमुख प्रशासकीय अधिकृत भएर आएको केही दिनमात्र भएको र त्यहाँको कुरा बुझ्नै बाँकी रहेको उनले बताए।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।