कोरोना संक्रमणको जोखिममा मर्चवार

कोरोना अपडेट

दीपक घिमिरे आइतबार, चैत २३, २०७६ १२:०५

मर्चवार- रुपन्देहीकाे दक्षिणी मर्चवार क्षेत्र काेराेना संक्रमणकाे उच्च जाेखिममा रहेकाे छ। मर्चवार नजिक सीमाबाट ५ किलोमिटरको दूरीमा पर्ने भारतको कोल्हुईमा ६ जनामा कोरोनाको संक्रमण भेटिएपछि मर्चवार उच्च जोखिममा देखिएको हाे।

भारतको दिल्ल्लीस्थित मरकजबाट फर्केर आएका २३ जनामध्ये कोल्हुईका ६ जनामा कोरोनाको संक्रमण देखिएको छ। संक्रमितहरुलाई भारत महराजगंज जिल्लामा रहेको मिठौरा स्वास्थ्य चौकीको आइसोलेसनमा राखिएको छ। यस्तै संक्रमितको परिवार तथा मरकजबाट आएका बाँकीलाई पनि क्वारेन्टाइनमा राखिएको भारतीय प्रहरीले जनाएको छ।

मर्चवारमा रहेका तीनवटै गाउँपालिका भारतको खुल्ला सीमासँग जोडिएका छन्। भारतका बजारका चोक तथा घर–घरमा पुगेर बिक्रि वितरण गरिएकोले कोरोनाको संक्रमणकाे जाेखिम बढेकाे हाे।

नेपाल सरकारले गरेको लकडाउन सहरी क्षेत्रमा पूर्ण प्रभावकारी भएपनि मर्चवार क्षेत्रमा भने त्यति प्रभावकारी देखिएको छैन। मर्चवारको खैरा, ठोठरी, थुम्हवा, जोगियाबारी, मंझरीया, चण्डी, कदमहवा, त्रिलोकपुरलगायतका नाकाहरुमा प्रहरी खटिए पनि आउने जाने क्रम भने रोकिएको छैन। त्यस्तै भित्रि सडक तथा गाँउहरुमा पनि मानिसहरुको जमघट हुने गरेकाे छ।

नेपाल सीमा क्षेत्रका अधिकांश किसानहरुले नेपाल भारतको खुल्ला सीमा भएर प्रहरीलाई छलेर मुख्य बाटो छोडी अन्य चोर बाटोको प्रयोग गरी दैनिक रुपमा भारतको ठोठरी, कोल्हुई तथा नौतनवा बजारमा तरकारी तथा दुध बिक्री गर्न जाने गरेका छन्। उनीहरुका कारण मर्चवारबासी जोखिममा परेको स्थानीय पत्रकार हृदयराम गुप्ताले नेपाल लाइभलाई बताए।

व्यापारका लागि गएकाहरु काेराेना संक्रमित व्यक्तिकाे सम्पर्कमा आएकाे हुनसक्ने सामुदायिक विपद् व्यवस्थापन संजालका राष्ट्रिय अध्यक्ष जगन्नाथ कुर्मीले बताए। उनका अनुसार मर्चवारको चोरबाटो भएर नेपाल भारत दैनिक रुपमा २ सयभन्दा बढी मानिसकाे आवतजावत हुने गरेको छ। अध्यक्ष कुर्मीले मर्चवारमा बनेका क्वरेन्टाइनमा सबै जनालाई राख्न सम्भव नभएकोले नागिरकले आफैं सतर्कता अपनाउनु पर्ने बताए।

भारत तथा तेस्रो मुलकबाट आएका नागरिकलाई गाउँपालिकाले सामान्य जाँच गर्ने गरेको भएपनि दैनिक रुपमा सामान ओसारपसार गर्नेहरुलाई कुनै चेकजाँच नभएकाले मर्चवारबासी उच्च जेखिममा रहेको कुर्मीले बताए।

मर्चवारको कोटहीमाई गाउँपालिकामा १ सय १९ जना, सम्मरीमाई गाउँपालिकामा ५३ जना र मर्चवारी गाउँपालिकामा १ सय १० जना भारत तथा तेस्रो मुलुकबाट आएको सम्बन्धित पालिकाका स्वस्थ्य शाखाले जनाएका छन्। तर अहिले तीनवटै पालिकाको क्वारेन्टाइनमा बसेकाकाे संख्या १ सयभन्दा कम छ।