सुदूरपश्चिमका ४१ वर्षीय पुरुषले पनि जिते कोरोना, नेपालमा ७ जना निको भएर घर फर्किए

कोरोना अपडेट

ललित बोहरा बुधबार, वैशाख १०, २०७७ १६:१७

कैलाली- सुदूरपश्चिमका तेस्रो कोरोना संक्रमित पनि अस्पतालबाट डिस्चार्ज भएका छन्। कञ्चनपुरको बेदकोट नगरपालिकाका ४१ वर्षीय पुरुषको तेस्रो र चौथो रिपोर्ट नेगेटिभ आएपछि उनलाई अस्पतालबाट डिस्चार्ज गरिएको सेती प्रादेशिक अस्पतालले जनाएको छ।

उनको यसअघि गरिएको पहिलो र दोस्रो रिपोर्टमा कोरोना पोजेटिभ देखाएको थियो। यसअघि कैलालीको लम्कीचुहा नगरपालिकाका २१ वर्षीय युवक र धनगढी उप–महानगरपालिका वडा नम्बर ५ का ३४ वर्षीय संक्रमित युवकलाई निको भएपछि अस्पतालले डिस्चार्ज गरिसकेको छ।

उनीहरु दुवै जनाको पछिल्ला दुई रिपोर्ट नेगेटिभ आएको छ। हाल धनगढी उपमहानगरपालिका-५ की ३४ वर्षीय महिला र लम्कीचुहा नगरपालिका-१ की ६५ वर्षीय महिलाको सेती प्रादेशिक अस्पतालको आइसोलेसनमा उपचार भइरहेको छ।

यो सँगै कोरोना संक्रमण भएर पनि उपचार पछि निको हुनेको संख्या नेपालमा ७ जना पुगेको छ। बुधबार मात्र २ जना कोरोना संक्रमित निको भर घर फर्किएका हुन्। दिउँसो धादिङका युवा काठमाडौंस्थित शुक्रराज ट्रपिकल तथा सरुवा रोग अस्पतालबाट डिस्चार्ज भएका थिए। बुधबार मात्रै थप ३ जनामा कोरोना भाइरस संक्रमण भेटिएको र हालसम्म नेपालमा ४५ जनामा कोरोना संक्रमण पुष्टि भएको स्वास्थ्य तथा जनसंख्या मन्त्रालयले जानकारी दिएको छ।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।