एजेन्सी- इन्टरनेटको एक च्याट रुममा कसैले हेलो भनेर आफ्नो भनाइ सुरु गरे 'दुनियाभरका व्यक्ति लकडाउनमा बसेका छन्। के तिमिलाई लाग्छ कि यस्तो बेलामा पनि ‘xxx’ मा बच्चाहरु होलान्।'
ती व्यक्तिले एउटा यस्तो वेभसाइटका बारेमा कुरा गरिरहेका थिए‚ जसलाई सामान्य व्यक्तिहरुले वास्ता गर्दैनन्। इन्टरनेटमा यस्ता धेरै फोरमहरु छन्‚ जहाँ बच्चाहरुलाई लिएर यस्ता कुराकानी भइरहेका हुन्छन्। स्पेनको केन्द्रीय साइबर अपराध युनिटजस्ता निकायहरूले यस्ता गतिविधीमाथि निगरानी राखिरहेका हुन्छन्।
साइबर क्राइम युनिटकी सदस्य इन्सपेक्टर सेसिलिया क्यारियोनका भन्छिन्‚ 'पेडोफायल समूह‚ हामी उनीहरुलाई यही भनेर बोलाउने गर्छौं। उनीहरु यस्ता फोरममा आफ्नो विचार सेयर गर्छन्। आफ्नो इच्छा व्यक्त गर्छन्। अनि सल्लाह गर्छन्।'
यस्तो च्याट ग्रुपमा जब कसैले 'नयाँ माल छ?' भनेर सोध्छ यसको अर्थ कुनै अनलाइन फोरममा बालबालिकाको अश्लिल सामाग्री अपलोड भयो भन्ने हुन्छ।
सामान्यतया उनीहरुले बालबालिकाको अश्लिल तस्बिर र भिडियोका लागि माल शब्दको प्रयोग गर्ने गरेका हुन्छन्।
पेडोफायलको समूह
सेसिलिया कैरियोनका अनुसार यस्ता फोरमा उनीहरु बच्चासँग सम्पर्क गर्ने, उनीहरुलाई अल्मल्याउने र फकाउने गतिविधी समेत गर्छन्। बच्चाहरुलाई बिस्तारै प्रभावमा पारेर उनीहरु उनीहरुलाई अश्लिल गतिविधी गर्न उक्साउँछन् र रेकर्ड गर्छन्। र यस्ता सामग्री फोरमहरुमा राखेर आफ्ना समूदायमाझ बाँड्छन्।
स्पेनको प्रहरी विभागका अनुसार कोरोना भाइरस संक्रमण बढेसँगै सुरु भएको लकडाउनमा बाल यौन दुराचारीको संख्या बढेको छ। स्पेनमा यस्ता घटनाहरु बढेको र उनीहरुले बालबालिकालाई प्रभावमा पारेर यौन दुराचार र यौन शोषण गरिरहेको सेसिलियाले बताइन्।
डरलाग्दो तथ्यांक
कोरोना संक्रमणसँग लडिरहेको स्पेनमा १४ मार्चमा राष्ट्रिय आपतकाल घोषणा गरिएको थियो। बिबिसीको तथ्यांकअनुसार राष्ट्रिय संकटकालको घोषणाको ठिक तीन दिनपछि स्पेनमा १७ देखि २४ को बीचमा इन्टरनेटमा १७ हजारवटा बालबालिकासँग सम्बन्धित अश्लिल सामग्री डाउनलोड भएको थियो।
त्यसपछिको हप्तामा यो बढेर २१ हजार पुग्यो। तेस्रो हप्ता डाउनलोडको क्रम बढेर २१ हजार पुगेको छ। अहिले यसको संख्या केही घटेको त छ। तर जोखिम भने उस्तै छ।
कोरोना संक्रमणसँगै बाल यौन दुराचारीको सक्रियताबाट पिडित स्पेनमात्रै होइन। लकडाउनको अवधीमा अन्य देशहरुमा समेत यौन दुराचारीहरु बढेका छन्।
बढ्दो साइबर अपराध
अप्रिलको सुरुमा युरोपियन प्रहरी अफसर्स(युरोपोल) बाट बाल यौन दुराचारबारे एक रिपोर्ट सार्वजनिक भएको थियो। रिपोर्टमा युरोपोलका कार्यकारी निर्देशक क्याथरिन डे बालद्वारा कोरोना महामारीबाट प्रभावित देशमा सबैभन्दा धेरै इन्टरनेटरको प्रयोगबाट बालबालिकामा भइरहेको यौन शोषणका घटनाबारे चिन्ता व्यक्त गरिएको थियो।
इटालीका पोस्ट एन्ड टेलिकम प्रहरी विभागकी प्रमुख नुनजिया कियार्डी भन्छिन्‚ 'हामी सबै घरमा बसिरहेका छौं। एक अर्कासँग जोडिएका छौं। इन्टरनेटमा यति धेरै गतिविधी गर्न चाहन्छौं‚ जो वास्तविक जीवनमा गर्न सक्दैनौं। र यसमा कुनै शंका छैन कि अहिले लकडाउनको अवधीमा साइबर अपराधका घटना बढिरहेका छन्।'
चाइल्ड पोर्नोग्राफी
नुनजियाका अनुसार उनले जे तथ्यांक फेला पारेकी छन्‚ त्यसले इन्टरनेटमा अहिले बाल यौन दुराचार र बालबालिकासम्बन्धी अश्लिल सामग्रीहरु बढेका छन्।
गत वर्ष मार्च र अप्रिलमा इटालीमा चाइल्ड पोर्नोग्राफीबारे ६ वटा केस दर्ता भएको थियो। यो वर्ष बढेर एक सय ८१ पुगिसकेको छ। जुन समयमा लकडाउन लागू भएको छ त्यो बेलामा सबैभन्दा धेरै यस्ता घटना आइरहेका छन्। इटालीको प्रहरीले सन् २०२० को प्रारम्भबाट अहिलेसम्म १ लाख ८ हजार जिबी त्यस्ता अश्लिल सामग्री जफत गरिसकेको छ।
इटाली प्रहरीका अनुसार बाल यौन दुराचारीको फन्दामा पर्नेमा १० देखि १३ वर्ष उमेर समूहका बालबालिकाको संख्या धेरै छ।
अन्य देशमा बढे
विश्वका अधिकांश प्रहरीलाई बाल यौन दुराचारसम्बन्धी जानकारी अमेरिकी संस्था नेशनल सेन्टर फर मिसिङ्ग एन्ड एक्सप्लाइटेड चिल्ड्रेनले दिने गरेको छ। उनीहरुले साइबर टिपलाइनको नामबाट यस्तो सेवा दिने गरेका छन्। उनीहरुले यस्ता सामग्री र सूचना संकलनका लागि अमेरिकामा रहेका इलेक्ट्रोनिक सर्भिस प्रोभाइडर र सर्भिस प्रोभाइडरसँगै माइक्रोसफ्ट, फेसबुक, टुइटर र टिकटकजस्ता कम्पनीसँग कानुनी रुपमै जोडिएर विश्वको कुनै पनि कुनामा हुने यस्ता खालका गतिविधिमाथि निगरानी गर्ने र अलर्ट गराउने गर्छन्।
उनीहरुले यस्ता सामग्रीको समिक्षा गर्छन् र जोखिमपूर्ण अवस्था देखे सम्बन्धित देशको प्रहरीलाइ यसबारे जानकारी गराउँछन्।
सन् २०२० मा उनीहरुकोमा २० लाख बढी यस्ता गुनासा आइसकेका छन्। मार्चमा यस्ता रिपोर्ट दोब्बर भएका छन्। सो संस्थाका उपाध्यक्ष जोन शेहान यसलाई नाटकीय वृद्धि भएको प्रतिक्रिया दिएका छन्।
तीन समान विषय
बाल यौन शोषणविरुद्ध ३० वर्षदेखि अभियान चलाइरहेको गैर सरकारी संगठन इसिपिएटी इन्टरनेशनलकी कार्यकारी निर्देशक मैरी लारे लेमिनुएर बालबालिकामाथि गलत नजर लगाउनेहरुले बाध्यताको सहजै फाइदा उठाउने गरेको बताउँछिन्। कोरोना भाइरस संक्रमणसँगै सुरु भएको लकडाउनको अवधीमा बालबालिकामाथि जस्तो जोखिम देखिएको छ‚ त्यस्तो जोखिम पहिला कहिल्यै नदेखिएको उनले बताइन्।
इन्सपेक्टर सेसिलिया क्यारियोन भन्छिन्‚ ‘बाल यौन दुराचारीमा तीन विषय समान देखिने गरेको छ। यस्तोमा ९९ प्रतिशत पुरुष हुने गरेका छन्। त्यसमा १३ देखि १५ वर्षसम्मदेखि अवकाशप्राप्तहरु समेत संलग्न देखिएका छन्।' यस्तोमा बेरोजगारहरु, प्रवासी र उच्चतहका अधिकारीहरु समेत हुने गरेका छन्। उनीहरु इन्टरनेटमा आफ्नो पहिचान लुकाएर सक्रिय हुने गरेका छन्।
मुख्य समस्या
यस्ता अनलाइन प्लेटफर्ममा यस्ता सामग्री सर्भरबाट सिधै डाउनलोड गर्न मिल्नेगरी राखिएको हुँदैन। यस्ता सामग्री अन्य कम्प्युटरबाट डाउनलोड गरिन्छ‚ जहाँ यस्ता सामग्री राखिएको हुन्छ।
यस्ता सामग्री कुनै बाल यौन दुराचारीको कम्प्युटरमा राखिएको हुन्छ र लगातार बाँडिरहेको हुन्छ। त्यसैले यस्ता सामग्रीसम्म पहुँच पुर्याउन निक्कै कठीन हुन्छ। जब सामग्री बाल यौन दुराचारीको समूहमा भाइरल भइसकेको हुन्छ त्यसबेला ती सामग्री हटाउन कठीन हुन्छ।
लकडाउन सकिएपछि बाल यौन दुरचारसम्बन्धी गम्भीर समस्याहरु देखिने प्रहरी अधिकारीहरुको निष्कर्ष छ। त्यसैले उनीहरू अहिलेदेखि नै निक्कै चिन्तित छन् यसको नियन्त्रणलाई लिएर।
बिबिसी हिन्दीबाट साभार
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1749801778.jpg)
-1749797959.png)
-1749979333-1749983311.jpg)
-1749826086.png)
