प्रधानमन्त्री ओलीको राजीनामा माग्नेबारे अलमलमा कांग्रेस

राजनीति

लिलु डुम्रे बिहीबार, वैशाख १८, २०७७ १९:२९

काठमाडौं- पार्टीभित्रै अनेक समस्या भएपनि बुधबार सात घण्टा बसेको नेपाली कांग्रेसको केन्द्रीय समितिको बैठक सरकार र नेकपाभित्रको आन्तरिक किचलोबाट उत्पन्न राजनीतिक गतिरोधमा केन्द्रित भयो। संवैधानिक परिषद् (काम कर्तव्य अधिकार र कार्यविधि) सम्बन्धी (पहिलो संशोधन) अध्यादेश, २०७७ र राजनीतिक दलसम्बन्धी (दोस्रो संशोधन) अध्यादेश, २०७७ राष्ट्रपतिबाट जारी गर्न देखाइएको हतारो, मेडिकल सामाग्री खरिदमा भएको अनियमितता र अर्को पार्टी फुटाउन सांसद र पूर्व प्रहरी महानिरीक्षक लगाएर भएको सांसदको अपहरणलगायतका विषयमा बहस चर्किरहेकै छ।

यी लगायतका विषयलाई लिएर सत्तारुढ दलले नै प्रधानमन्त्री केपी शर्मा ओलीको राजीनामा माग गरिसकेका विषय सार्वजनिक भएका छन्। तर प्रमुख प्रतिपक्षी दल नेपाली कांग्रेसले भने यो विषयमा औपचारिक रूपमा कुनै धारणा सार्वजनिक गरेको छैन।

कांग्रेसले ओली नेतृत्वको सरकारले राजनीतिक र नैतिक आधार गुमेको ठहर गरेको छ। तर प्रधानमन्त्री ओलीको राजीनामा माग्ने निर्णयमा पुग्न सकेन।बुधबारको बैठकमा सरकारको राजीनामा माग्नेमा कांग्रेस केन्द्रीय सदस्य प्रदीप पौडेल एक्लो भए।

प्रदीप पौडेल

सरकारविरुद्ध आन्दोलनमा गइहाल्नुपर्नेमा नेता धनराज गुरुङले मात्र जोड दिए। कोरोना भाइरस संक्रमणको जोखिम अन्त्य भएपछि सरकारविरुद्ध आन्दोलित हुनुपर्नेमा कांग्रेस नेताहरू एकमत भए पनि प्रधानमन्त्रीको राजीनामा माग्नेबारे भने अन्यौलमा देखिए।

कतिसम्म भने सरकारको कामको विश्लेषणका क्रममा कुन शब्द प्रयोग गर्ने भन्नेमा समेत उनीहरु केन्द्रित भएका थिए। छलफलमा सरकारले कानुनी र राजनीतिक वैधता गुमाएको निष्कर्ष निकाले पनि आधिकारिक रुपमा कुन शब्द प्रयोग गर्ने भन्नेमा कांग्रेस नेताहरु अल्झिए।

केन्द्रीय सदस्य महेश आचार्यले सरकारको वैधता सकिएको भन्दा राजीनामा मागिएको देखिने भन्दै त्यसको साटो नैतिकता गुमेको भन्नुपर्ने मत समेत राखे।

राजीनामा नै भन्न किन हच्कियो कांग्रेस?
केन्द्रीय समितिको बैठकमा बोल्ने अधिकांश नेताहरूले सरकार फेरबदलको खेलमा पार्टी लाग्न नहुने तर्क गरेका थिए। निर्वाचनको म्यान्डेट सत्ता परिवर्तनका लागि नभएको र ओलीले राजीनामा दिएपनि नेकपाबाटै प्रधानमन्त्री हुने अवस्थामा सरकारको नेतृत्व परिवर्तन हुँदैमा कम्युनिस्ट नेताको प्रवृत्ति, संस्कार र चरित्रमा परिवर्तन नहुने भएकाले अहिले नेकपाभित्रबाट जो प्रधानमन्त्री भएपनि उस्तै व्यवहार हुने उनीहरूको मत देखियो।

नेकपाबाट प्रधानमन्त्रीमा नयाँ अनुहार आएपनि सत्ता सञ्चालनमा परिवर्तन नआउने पार्टीको बुझाई रहेको आएको काग्रेस नेता अर्जुननरसिंह केसीले बताए।

जनताको म्यान्डेट कांग्रेसलाई प्रतिपक्ष बेन्चमै बस्ने भएकाले अहिले प्रधानमन्त्रीको राजीनामाको खेलमा लागेर सांसदको संख्या गणना गर्न पार्टी नलाग्ने केसीले प्रष्ट पारे।

‘अमिलोको बोटबाट सुन्तला फल्दैन। त्यसैले कांग्रेसको प्राथमिकता प्रतिपक्षमै रहेर सरकारका जनविरोधी क्रियाकलापको विरोध गर्ने हो,’ केसीले भने, 'अहिले उनीहरुको आन्तरिक लडाई हो। कांग्रेसलाई यति थाहा छ, नेपाली जनताले शासन गर्ने मत नेकपालाई दिएका हुन्।’

सरकार अस्थिर भए त्यसको जिम्मेवार पनि नेकपा नै हुने भएकाले कांग्रेसले त्यसभित्र घुस्न नचाहेको र सत्ता परिवर्तनको खेलमा सहभागी भए अस्थिरताको अपजस आउने भएकाले त्यसतर्फको बाटो नै नहिड्ने पार्टीको निष्कर्ष रहेको उनले बताए।

तर अर्का केन्द्रीय सदस्य प्रदीप पौडेल प्रधानमन्त्रीको राजीनामा नैतिकताको माग भएको बताउँछन्। प्रधानमन्त्री ओलीको राजीनामाको माग राजनीतिक मात्र नभई प्रधानमन्त्रीको नैतिकतासँग समेत जोडिएकाले ओलीको राजीनामा माग्ने विषयमा पार्टीले निर्णय गर्नुपर्ने उनको मत छ।

उनले ओली नेतृत्वको सरकारलाई अराजकताको संरक्षक, अनियमितता र भ्रष्टाचारीको संरक्षणकर्ता, लोकतान्त्रिक मूल्य र मान्यता नमान्ने शासक भएको टिप्पणी गरे। वैयक्तिक स्वतन्त्रता र संवैधानिक व्यवस्थामाथि हस्तक्षेप गरेकाले प्रधानमन्त्रीको राजीनामा माग्नुपर्ने उनको धारणा छ।

'सरकारका जनविरोधी सबै कुराहरू भन्न चाँहि मिल्ने तर राजीनामा देऊ भन्न नमिल्ने?’ उनले आफ्नै पार्टीका नेताहरूलाई प्रश्न गरे, 'ओलीले राज्यका सबै अंगमा हस्तक्षेप बढाएकाले प्रधानमन्त्री हुने योग्यता गुमाइसकेका छन्। प्रधानमन्त्री पदको दुरुपयोग भएको कांग्रेसले मुद्दा स्थापित गर्नुपर्छ।’

गेजा शर्मा वाग्ले

राजनीतिक विश्लेषक गेजा शर्मा वाग्ले सरकारलाई जिम्मेवार बनाउन कांग्रेसको पहल हुनुपर्ने बताउँछन्। उनले नेकपा भित्रको आन्तरिक विवाद तथा सरकार परिवर्तनको खेलमा कांग्रेस लाग्न नहुने सुझावसमेत दिए।

'कांग्रेस अहिले संसदको अंकगणितमा लाग्न हुँदैन,' विश्लेषक शर्माले भने, 'कोरोनाको जोखिम कम भएपछि सार्थक, हस्तक्षेपकारी र थप शसक्तता सहितको भूमिका निर्वाह गरे राम्रो।’