नेपाल लाइभ आजदेखि चौथो वर्षमा प्रवेश गरेको छ।
हामी यात्राको यो विन्दुमा आइपुग्दा विश्व एउटा संकट र सन्त्रासको भूमरीमा छ। कोभिड-१९ को यो दुष्चक्रको घेरोभित्र नेपाल र नेपाली पनि परेका छन्। देशको राजनीतिक-प्रशासनिक अवस्था, अर्थव्यवस्था र सामाजिक जीवन संकटको बाछिटाबाट मुक्त छैन। भय र अनिश्चितताको यस्तो अवस्थामा पनि हेल्प पब्लिकेशनले आफ्नो व्यावसायिक धर्म र दायित्वलाई सबैभन्दा माथि राखेको छ।
सञ्चारकर्मका आफ्नै प्रकारका चुनौती र ‘चार्म’ हुन्छन्। यसअघि नै विद्यमान चुनौतीमाथि थपिएको कोभिड-१९ सृजित चुनौतीबीच पनि हामीले हाम्रा प्रिय पाठकलाई कहिल्यै निरास नपार्ने प्रतिबद्धता व्यक्त गर्दछौं। पत्रकारिताको मूल कर्म भनेकै राज्यमाथि प्रश्न गर्नु हो। कहीँ-कतै गलत भएको छ भने त्यसलाई उजिल्याउनु हो। विकृति र विसंगति देखाइदिनु हो। खबरदारी गर्नु हो। कतिपय अवस्थामा बाटो देखाउनु पनि हो। सूचना प्रवाहको यो जनपक्षीय अनुष्ठानमा हामी कहिल्यै पनि विचलित हुनेछैनौं।
विषम अवस्थामा पनि हामीले हाम्रा गतिविधिहरुलाई अरु जिम्मेवार र परिपक्व बनाइरहेका छौं। बितेको एक वर्षमा ‘नेपाल लाइभ’को समाचार कक्षको शक्ति र सामर्थ्य अरु विस्तार भएको छ। अनलाइन पत्रकारिताको प्रभाव र विश्वसनीयता हाम्रा लागि सधैं प्राथमिकता र चासोका पक्षहरु हुन्। त्यसैले हामीबाट हुने मानवीय कमजोरी औंल्याइदिने र हामीलाई सधैं सुझाव दिने हाम्रा पाठक र सुभेच्छुकलाई हृदयदेखि धन्यवाद दिन चाहन्छौं। र, यस्तो पवित्र उपक्रमको निरन्तरताको अपेक्षा गर्दछौं। त्यसैले त हामी सधैं भनिरहेका हुन्छौं, पाठकहरुबाट प्राप्त विश्वास, उत्प्रेरणा र खबरदारी हाम्रा अमूल्य आर्जन हुन्।
वस्तुनिष्ठ, विश्वसनीय र गुणस्तरीय सामग्रीसँगै हाम्रो संविधानले दिएका नागरिकका सबै अधिकारहरुलाई सम्मान गर्छौं। समावेशी लोकतन्त्र, अभिव्यक्ति स्वतन्त्रता, नागरिकका मौलिक हक, मानव अधिकार, सुशासन र सीमान्तकृतका आवाजहरु नै हाम्रा मन्त्र थिए, छन् र हुनेछन्। यही मन्त्रलाई हृदयांगम गर्दै ताजा, सत्यतथ्य, खोजमूलक र विश्लेषणात्मक समाचार पस्कने हाम्रो अभियानलाई साथ दिन सबैमा सविनय अनुरोध गर्दछौं।
अलिक अलग अवस्था भए पनि हामी तेस्रो वर्ष पूरा गरेर चौथो वर्ष प्रवेश गरेको यो घडीमा नेपाल लाइभलाई अझै विविधतापूर्ण बनाउने वाचा गर्छौं। नेपाल लाइभलाई अझै पूर्ण, सम्पूर्ण र अर्थपूर्ण अनलाइन बनाउने हाम्रो प्रयास जारी नै छ। यो प्रयासमा सधैं हौसला दिने तपाईं सम्पूर्ण पाठक, लेखक, पेसाकर्मी, विज्ञापनदाता, व्यवसायी, चिकित्सक, स्वास्थ्यकर्मी र शुभेच्छुकलाई धन्यवाद ज्ञापन गर्दछौं।
र, अन्त्यमा फेरि भन्छौं, हामी तपाईंहरुको वाणी बन्छौं, सधैं-सधैं हामीलाई सम्झिरहनुहोला। हामीलाई पछ्याइरहनुहोला।
अनिल न्यौपाने
अध्यक्ष
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1751886908.jpg)
-1751885868.jpg)
-1751793737.png)
-1749826086.png)
