नयाँ दिल्ली- भारतमा किसानहरुले नयाँ आन्दाेलन सुरू गरेका छन्। ‘दिल्ली चलाे’ अभियानअन्तर्गत दसौं हजारको संख्यामा किसानहरू सरकारको विरोध गर्दै राजधानी दिल्लीतर्फ लागेका छन्।
५० हजारको संख्यामा हरियाणाबाट उनीहरू दिल्लीतर्फ मार्च गरिरहेका हुन्। मार्चका क्रममा प्रहरीले उनीहरुमाथि बल प्रयोग गरेको छ। प्रहरीले किसानलाई राेक्न अश्रु ग्याँस, पानीकाे फाेहाेरा र सडक अवराेध गरेकाे थियाे। प्रहरीसँग झडपको अवस्था सिर्जना भएपछि प्रहरीले पानीको फोहोरा, टियर ग्यास र रबरका गोली समेत प्रहार गरेको थियो। बिहीबार दिनभर प्रदर्शन गरेका उनीहरुलाई दिल्लीको सिमानामा पर्ने एउटा पुलबाट प्रहरीले अघि बढ्न दिएको छैन।
किसान अगुवाहरुले यस आन्दोलनमा ५० हजारभन्दा धेरै किसान सहभागी भएको दावी गरेका छन्। सत्तारुढ दल भाजपाले भने प्रतिपक्षी दल कंग्रेसलाई आफ्नो स्वार्थका लागि किसानलाई उचालेको आरोप लगाएको छ।
किसानहरू भने विभिन्न माग गर्दै दिल्लीको सिमानामा बिहीबार साँझ अबेरसम्म धर्ना दिइरहेका छन्। किसानका विभिन्न संगठनको आह्वानमा विशाल प्रदर्शन उठेको हो। केही महिनाअघिदेखि नै भारतका विभिन्न सहरमा किसानहरु सरकारको कृषि विधेयकको विरोधमा आन्दोलित बनेका थिए।
यसै आन्दोलनलाई लिएर हरियणा र पन्जाबका मुख्यमन्त्रीहरुबीच मनमुटाव सुरु भएको छ। किसानको आन्दोलनलाई प्रहरीले बल प्रयोग गरी दबाएकोमा हरियाणाका मुख्यमन्त्री मनोहर लाल खट्टरलाई पन्जाबका मुख्यमन्त्रीले कडा आलोचना गरेका छन्।
पन्जाबका मुख्यमन्त्री अमरेन्द्र सिंहले खट्टरलाई महामारीको बेलामा सस्तो राजनीति गरेको भन्दै आलोचना गरेका थिए। र मुद्दाबाट भागेर ट्वीटमात्रै गरिरहेको उनको भनाइ थियाे। आन्दोलनमा पन्जाब र हरियाणाका किसानहरु पनि सहभागी छन्। उनीहरुले केन्द्र सरकारसँग विभिन्न माग राख्दै दिल्लीसम्म मार्च गरिरहेका हुन्।
बुधबारदेखि नै उनीहरुले दिल्लीका लागि मार्च गरेकोमा प्रहरीको अवरोधपछि सिमानामा रोकिएका छन्। तर बिहीबार दिउँसो दुई घण्टा लामो झडपको क्रममा ठूलो हताहत भएको बिबिसी हिन्दीले जनाएकाे छ। दिल्लीको सिमाना नजिकै २०० किमी टाढा पर्ने पुलमा किसानहरु रोकिएका छन्। उत्तर प्रदेश, हरियाणा, उत्तराखण्ड, राजस्थान, केराला र पन्जाबका किसानहरु प्रदर्शनमा सहभागी छन्।
केन्द्रीय कृषिमन्त्री नरेन्द्र सिंह तमाेरले किसानसँग वार्ता गर्न तयार रहेकाे भन्दै आन्दाेलन स्थगित गर्न आग्रह गरेकाे छ। तमाेरले सरकार वार्ताबाटै किसानहरुकाे माग सम्बोधन गर्न तयार भएकाले आन्दाेलनमा उत्रन आवश्यक नभएकाे बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1751793737.png)
-1749826086.png)
