काठमाडौं- नेपाली कांग्रेसका नेता कृष्णप्रसाद सिटौला पक्षका नेताहरूको बैठकले सडकलाई प्रमुख प्रतिपक्ष दलले उपयोग गर्न नसक्दा राजावादीको कब्जामा गएको निचोड निकालेको छ।
नेता सिटौलाले आफूपक्षीय केन्द्रीय नेता तथा भ्रातृ संस्थाका पदाधिकारीलाई बोलाएको बैठकमा पार्टी भूमिकाविहीन भएको आवाज उठेको थियो। बैठकमा नेता सिटौलाले पार्टी महाधिवेशन समयमा हुन सक्ने नसकेको अवस्थाप्रति चिन्ता व्यक्त गरेका थिए।
बैठकमा सहभागी नेविसंघका महामन्त्री बलदेव तिमल्सिनाका अनुसार सिटौलाले क्रियाशील सदस्यता वितरण र नवीकरणको कार्यमा सक्रियतापूर्वक लाग्न निर्देशन दिएका थिए।
संविधानको भावना र व्यवस्थाविरुद्ध गतिविधि हुनुमा सरकारकै कमजोरी औंल्याइएको छ। सरकारले जनअपेक्षालाई वेवास्ता गर्दा परिस्थिति प्रतिकूल बनेको नेता सिटौलाले बताएका थिए। सिटौलाको भनाई उद्धत गर्दै तिमल्सिनाले भने, ‘सरकारले डेलिभरी गर्न नसक्दा व्यवस्थाविरुद्धको प्रर्दशनमा आकर्षित हुनेको संख्या बढेको छ।’
वैचारिक धारको अगुवाई गर्ने हैसियतमा प्रतिपक्ष भूमिका शसक्त बनाउने कार्यको जिम्मेवारी ‘हाम्रो धार’मा सिटौलाको तर्क थियो। पार्टीमा प्रगतिशील धार भएकै कारण पनि भूमिका बढाउनुपर्ने सिटौलाको भनाई थियो।
बैठकमा नेताहरु गगन थापा, प्रदीप पौडेल, भीमसेनदास प्रधान, शिव हुमागाईं, उमाकान्त चौधरीलगायत सहभागी थिए। नेविसंघ महामन्त्रीद्वय बलदेव तिमल्सिना र युवराज पाण्डे पूर्व महामन्त्री कुन्दनराज काफ्ले, तरुण दलका उपाध्यक्ष उत्तम चापागाईं सहभागी थिए।
बैठकको अधिकांश समय सिटौलाले लिएका थिए। अन्य सहभागीले कांग्रेस चलायमान हुन नसकेको बताएका थिए। महाधिवेशनको कार्यतालिका अनुसार पार्टीको गतिविधि नहुनु र विधानअनुसार पार्टी सञ्चालन नभएको प्रति चिन्ता व्यक्त गरेका थिए। पार्टी कमजोर हुनुमा नेतृत्वकै कमजोरी रहेको उनीहरुको ठम्याई थियो। ‘सडक कांग्रेसका लागि खाली थियो। खुला बाटोलाई कांग्रेसले उपयोग गर्न सकेन।’
नेता थापाले बैठकमा भने,‘कांग्रेसले सडकको प्रयोग गर्न नसक्दा राजावादीको नाममा प्रर्दशन देखियो। हाम्रो स्पेश ओगट्न खोजे।’ कांग्रेसले भूमिका बढाए सडकको बल प्राप्त हुने थापाको भनाई थियो। नेता प्रदीप पौडेलले विपक्षी भूमिका कमजोर भएकाले टिकाटिप्पणी बढेको बताए। कार्यतालिका अनुसार तल्लो तहको अधिवेशन भएमा केन्द्रलाई दबाब पुग्ने पौडेलले बताए।
सिटौलाले आफ्नो समूह १३औं महाधिवेशन भन्दा विस्तारित भएको बताएका थिए। समूहका नेताहरु १४औं महाधिवेशनसम्म दायाँबायाँ हुने सम्भावना नरहेको उनले बताए। प्रतिस्पर्धा तेश्रो समूहकै रुपमा हुने उनको दाबी थियो।
क्रियाशील सदस्यता वितरण र नवीकरण सकिएपछि आफ्नो समुहको नीतिगत योजना सार्वजनिक गर्ने सिटौला पक्षको तयारी छ। मुद्दा, योजना र भावी कार्यदिशाबारे जानकारी गराउने बताइएको छ। क्षेत्र र प्रदेशको महाधिवेशन प्रतिनिधि चयन भए लगत्तै दोश्रो चरणको योजना सार्वजनिक गर्ने उक्त समूहको तयारी छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1751859077.png)
-1751793737.png)
-1749826086.png)
