हिमालको फेदमा रहेका दुई चुचुरा जोड्ने पुल। वरिपरि शून्यता चित्रित गर्ने खाली भाग। सांसारिक सोचभन्दा पर जान प्रेरित गर्ने बुद्धधर्मबाट प्रभावित भएको शीर्षक 'पारमिता'। बुद्धत्व प्राप्त गर्ने मार्गसँग जोडिने शीर्षक र चित्रको सम्बन्ध स्थापित गर्न तीक्ष्ण बौद्धिक चेतना आवश्यक पर्छ भन्ने बुझ्न गाह्रो थिएन।
सरसर्ती हेर्दा यो पेन्टिङमा प्रकृतिको एउटा सुन्दर देनलाई चित्रित गरिएको जस्तो देखिए पनि यसले बोकेको आध्यात्मिक चेतनाको सन्देशले मानिसलाई झन् उत्सुक बनाउँछ। कुनै पनि सांसारिक वस्तुलाई नियालेर त्यसमा लुकेको आत्मालाई मसीका माध्यमबाट कागजमा उतार्न सक्नु एक चित्रकारको विशेषता हो। प्रकृतिको एउटा समान्य छटालाई देखेर त्यसैबाट आध्यात्मिक चेतनातर्फ अग्रसर हुनका लागि प्रेरित गर्दै चित्रकारले चित्र कोर्न सक्नु उसको खुबी हो।
उल्लेखित चित्र गत डिसेम्बर ११ देखि सिद्धार्थ आर्ट ग्यालेरीमा सुरू भएको ‘अ सिंगल ब्रस्ट्रोक चान माइन्ड स्प्रिचुअल पेन्टिङ’ प्रदर्शनीमा राखिएका विभिन्न चित्रमध्येको कुनै एक चित्र हो। चित्रकार जेरोमी एडोउका विशेष संकलनहरू राखिएको प्रदर्शनी आगामी जनवरी १० सम्म चल्नेछ।
फ्रान्समा जन्मिएर चिनियाँ चित्रकलाको पनि चान पेन्टिङबाट बढी प्रभावित एडोउले प्राकृतिक सुन्दरतालाई हरेकको जीवनसँग तुलना गर्दै विभिन्न पेन्टिङहरू निर्माण गरेका छन्।
‘मैले बनाएका हरेक पेन्टिङमा हाम्रो जीवनलाई चित्रण गरेको छु। जीवनको अपूर्णता र शून्यतालाई चित्रमार्फत् उतारेर सबैसामू पुर्याउने कोशिस गरेको छु। मलाई के लाग्छ भने प्रकृतिको पनि आफ्नो छुट्टै जीवन छ। त्यसैले त्यसको जीवनमा चलिरहने शिलशिलालाई पेन्टिङमार्फत् उतारेको छु‚’ चित्रकार जेरोमी एडोउले भने‚ ‘म कतै हिँड्दै जाँदा त्यहाँ देखेको कुरालाई घरमा आएर मनन गर्छु र मेरो मनले यसको बारेमा के भन्छ त्यसलाई कागजमा मसीका माध्यमबाट उतार्ने गर्छु। मेरा पेन्टिङहरूले कुनै उद्देश्य बोकेका छैनन्।’
चित्रकला प्रदर्शनीमा प्रवेश गर्नासाथ ग्यालेरीको भित्तामा लेखिएको थियो ‘ह्वेन योर हार्ट इज् एम्प्टी एन्ड टोटल्ली फ्री फ्रम डस्ट द ल्यान्डस्केप विल राइज फ्रम द डेप्थ अफ योर सोल’ अर्थात् जब मनमा शून्यता छाउँछ र कोलाहलबाट जब यसले छुटकारा पाउँछ त्यसपछि मात्र भित्री आत्माबाट चित्रकलाको उदय हुन्छ।
चित्रकलामा उनले चिनियाँ आध्यात्मिक मार्गलाई अनुसरण गरेका छन्। ‘चिनियाँ भाषामा चान भनेको ध्यान हो। जब कुनै चित्रकारको आध्यात्मिक आँखाले कुनै वस्तु वा घटना देख्छ भने त्यसलाई ध्यानद्वारा शून्य भएको मनको माध्यमबाट आर्टको रूपमा चित्रण गर्नु नै चित्रकलाको विशेषता हो‚’ उनले भने‚ ‘प्रकृतिमा भएका हरेक घटनाहरूको आफ्नै शिलशिला छ। यिनीहरूको आफ्नै जीवन छ। त्यही जीवनलाई कागजमा उतार्नु नै मेरो चित्रकलाको प्रमुख पक्ष हो।’
कुनै उद्देश्यले प्रेरित भएर र कसैबाट केही पाइन्छ कि भन्ने आशभन्दा टाढा रहेर चित्र कोर्नुपर्छ भन्छन् उनी। प्रदर्शनीमा राखिएका चित्रहरूको बीचमा लेखिएको थियो‚ ‘मेक टि एन्ड लिभ’ यसको अर्थ खुलाउँदै उनले भने‚ ‘मेक टि एन्ड लिभ भन्ने चिनियाँ उक्ति हो। हामीले जुनसुकै पनि कार्य गर्दा त्यसलाई पछाडि फर्केर हेरिरहनु जरूरी छैन। यसलाई मनन गर्दै चान पेन्टरहरू आफूले बनाएका चित्रलाई सजाउँदैनन्। कुनै पनि विषय र घटनालाई शून्य मनले नियालेर त्यसलाई मसीको माध्यमबाट कागजमा उतार्ने गर्दछन्‚’ उनी भन्छन्‚ ‘एउटा बाँसको चित्र बनाउनु छ भने सबैभन्दा पहिला बाँसलाई महशुस गर्न सक्नुपर्छ। चान पेन्टरहरू प्रकृतिमा भएका कुराको कपी गर्दैनन्। बरू त्यसको आत्मा र अदृश्य घटना कागजको माध्यमबाट उतार्ने गर्छन्।’
उनका हरेक चित्रहरू चिनियाँ कागजमा कोरिएका छन्। कोभिड-१९ महामारीका बाबजुद पनि प्रदर्शनी सुरू भएको भन्दै उनले हरेक दिन थोरै मानिसहरूले अवलोकन गर्ने भएकाले कोभिडको डर नभएको बताए।
प्रदर्शनीमा उनका चित्रकला अवलोकन आएकी एक विदेशी नागरिकले भनिन्‚ ‘उनका चित्रकलामा जीवन छन्। हरेक चित्रमा उनले त्यस चित्रको नदेखिएका पाटाहरूको चित्रण गरेका छन्। चित्र बनाउनुभन्दा पनि चित्रमा प्राण भर्नु महत्वपूर्ण हुन्छ। जुन कुरा चित्रकारले गरेका छन्।’
गत डिसेम्बर ११ देखि सुरू भएको यो प्रदर्शनी जनवरी १० सम्म चल्ने एडोउले जानकारी दिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1751879619.webp)
-1749826086.png)
