काठमाडौं- कञ्चनपुरकी बालिका निर्मला पन्तको बलात्कारपछि हत्या भएको ३१ महिनापछि प्रहरी प्रधान कार्यालय (प्रहरी हेडक्वार्टर)ले अनुसन्धानमा खटिएका प्रहरी अधिकारीहरूको राय बुझ्ने काम गरेको छ।
बालिका पन्तको बलात्कारपछि हत्या प्रकरणदेखि अहिलेसम्म अनुसन्धानमा खटिएका प्रहरी अधिकारीको अनुसन्धान प्रगति र उनीहरूको राय बुझ्ने काम भइरहेको हेडक्वार्टर स्रोतले नेपाल लाइभलाई जानकारी दियो।
साढे दुई वर्ष बितिसक्दा समेत हत्यारा पत्ता नलागेपछि अनुसन्धानमा खटिएका अधिकारीहरूको राय बुझेर विश्लेषण गरेपछि निष्कर्ष निकाल्न सकिन्छ भन्ने उद्देश्यसहित अनुसन्धान अधिकृतको राय बुझ्न थालिएको हो। साढे दुई वर्षसम्म पनि अपराधी पहिचान नहुनु र अनुसन्धानमा खटिएका प्रहरी अधिकारीकै कुरा बाझिने गरेको भन्ने जानकारी आएपछि हेडक्वार्टरले सबै अनुसन्धान अधिकृतलाई एकै ठाउँमा राखेर राय बुझ्ने काम गरेको हो।
अपराध अनुसन्धान विभागका एआइजी विश्वराज पोखरेल, मानव स्रोत तथा संशाधन विभागका एआइजी निरज शाहीको टोलीले राय बुझ्ने काम गरिरहेको छ। अनुसन्धान अधिकृतलाई प्रहरी हेडक्वार्टरमा बोलाएर अहिलेसम्म भएका उपलब्धी र अब गर्नुपर्ने अनुसन्धानको पाटाहरूमा छलफल भएको हेडक्वार्टर स्रोतले नेपाल लाइभलाई जानकारी दियो।
अहिलेसम्म सिआइबीका तत्कालीन डिएसपी अंगुर जिसी, डिएसपी रुगम कुवँर, कन्चनपुरका तत्कालीन एसपी दिल्लीराज विष्ट, एसएसपी कुवेर कडायत, एसएसपी सुदिप गिरीको राय हेडक्वार्टरले लिइसकेको छ।
राय लिइएका अधिकांश अनुसन्धान अधिकृतले यसअघि पक्राउ परेर छुटेका सोही ठाउँका दिलिपसिंह विष्टलाई नै पुन अनुसन्धानमा ल्याउनुपर्ने राय दिएका छन्। हेडक्वार्टर स्रोत भन्छ, ‘अहिलेसम्म राय लिइएका अधिकांश अनुसन्धान अधिकृतको राय दिलिपसिंह विष्टलाई नै पुन अनुसन्धानमा तानिनुपर्ने भन्ने छ। थप अनुसन्धान अधिकृतको राय लिएपछि हेडक्वार्टरले एउटा निष्कर्ष निकालेर हत्याकाण्डको अनुसन्धान गर्ने तयारी गरेको छ।’
निर्मला हत्याकाण्डको अनुसन्धानमा खटिएका महानगरीय प्रहरी अपराध महाशाखाका तत्कालीन डिएसपी (हाल सिआइबीमा कार्यरत) रुगम कुवँरले सुरुमा आफ्नो अनुसन्धान प्रगतिबारे प्रस्तुती गरेका थिए। सो क्रममा कुवँरले अनुसन्धान गर्नुपर्ने विभिन्न पाटाहरूबाट औंल्याएका थिए। उनले दिलिपसिंह विष्ट पनि संकाको घेरैमा रहेको र सँगै अन्य संकास्पदहरूको पनि खोजी गरी अनुसन्धान गर्नुपर्ने धारणा राखेका थिए।
डिएसपी कुवँर पछि सिआइबीका तत्कालीन डिएसपी अंगुर जिसी (जो अनुसन्धानका लागि सिआइबीबाट खटिएका थिए) ले आफ्नो अनुसन्धान र निष्कर्षबारे जानकारी गराएका थिए। डिएसपी जिसीले आफैंले पहिला सार्वजनिक गरेको व्यक्ति दिलिपसिंह विष्ट नै निर्मला हत्याकाण्डमा संलग्न भएको भन्दै त्यसको कारणसहित प्रस्तुती गरेका थिए।
विष्टको बयान, विष्टको परिवारले सुरुमा विष्टबारे भनेका भनाई, उनको आपराधिक पृष्ठभूमि, परिस्थितीजनय प्रमाण, बयान अनुसार घटना मेल खानुजस्ता कारणले निर्मलाको बलात्कार र हत्यामा उनको संलग्नता हुने डिएसपी जिसीको दाबी थियो। सबै पक्षबाट विष्ट नै अभियुक्त हुने देखिँदा पनि उनी हुन सक्दैनन् भनेर डिएनए रिपोर्टले भनेको तर पछि डिएनए रिपोर्ट नै गलत सावित भएपछि पुन: विष्ट नै अनुसन्धानमा तानिनुपर्ने डिएसपी जिसीले बताएका थिए।
कन्चनपुरका तत्कालीन एसपी दिल्लीराज विष्टले पनि डिएसपी जिसीकै कुरामा सहमति राख्दै पुन: दिलिपसिंहमाथि नै अनुसन्धान हुनेपर्ने जिकिर गरेका थिए।
त्यस्तै सिआइबीबाट अनुसन्धानमा खटिएका तत्कालीन एसपी, हाल एसएसपी सुदिप गिरी पनि हुन्। एसएसपी कुवेर कडायतले भने अहिलेसम्मको अनुसन्धान विष्टप्रति नै लक्षित भएको राय दिएका छन्।
एसपी मुकुन्द मरासिनीसहितका अनुसन्धान अधिकारीको भने राय बुझ्ने काम बाँकी नै छ। सबैको राय बुझिसकेपछि अहिलेसम्मको प्रगति विवरण र एउटा निष्कर्ष निकालेर निर्मला काण्डलाई जतिसक्दा चाँडोमा टुंगोमा पुर्याइने हेडक्वार्टर स्रोत बताउँछ।
२०७५ साउन १० गते साथी रोशनी बमको घर गएकी निर्मला बेलुकासम्म पनि नफर्केपछि आमा दुर्गादेवी पन्तले छोरी खोजिदिन भन्दै प्रहरीलाई आग्रह गरेकी थिइन्। त्यसको भोलिपल्ट निर्मलाको शव भीमदत्त नगरपालिका–१९ स्थित उखुबारीमा फेला परेको थियो।
भदौ ४ गते निर्मलालाई बलात्कार गरी हत्या गरेको आरोपमा भीमदत्त नगरपालिका–१९ बस्ने दीलीपसिंह विष्ट पक्राउ परेका थिए। पछि डिएनए नमिलेपछि सरकारी वकिल कार्यालयले विष्टलाई छाड्न निर्देशन दिएपछि उनी छुटेका थिए। सो घटनामा लापरबाही गरेको भन्दै केही प्रहरीलाई बर्खास्त गरिएको थियो भने केहीलाई निलम्बन गरिएको थियो। कारबाही भोगेका सबै प्रहरी अधिकृतले पछि सफाई पाएका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1752043710.jpg)
-1749826086.png)
