काठमाडौं– शैक्षिक प्रमाणपत्र कीर्ते गरेर नक्कली प्रमाणपत्रका आधारमा डाक्टरी अध्ययन गरेको आरोप लागेका ७ जना डाक्टरसहित दुई कन्सल्टेन्सी सञ्चालकहरुमाथिको अनुसन्धान सकिएको छ। केन्द्रीय अनुसन्धान ब्यूरो (सिआइबी)ले अनुसन्धान सकेर फाइल सरकारी वकिल कार्यालयमा पेश गरेको छ।
२५ दिन लामो अनुसन्धान गरेर सोमबार रायसहित फाइल सरकारी वकिल कार्यालयमा पेश गरिएको सिआइबीका प्रवक्ता तथा एसपी गंगा पन्तले बताइन्।
एसएलसी लगायतका शैक्षिक प्रमाणपत्र नक्कली बनाएको आरोपमा सप्तरी विष्णुपुर–२ घर भई न्यूरो अस्पताल विराटनगरमा कार्यरत २८ वर्षीय मोहमद सिद्दिक, महोत्तरी सरपल्लो–६ घर भई जनकपुर चिल्ड्रेन अस्पतालमा कार्यरत २९ वर्षीय सुभाष प्रसाद साह, धनुषा सवैला नगरपालिका–५ घर भई दिर्घायु गुरु अस्पताल चाबहिलमा कार्यरत २८ वर्षीय मोहम्मद शाहिद राजा, मनाङ घर भई चौरजहारी अस्पतालमा कार्यरत रहेका दिपेन्द्र गौतम पक्राउ परेका थिए। उनीहरुसँगै सप्तरी मकरपुरा–९ घर भएका ३१ वर्षीय अखिलेश कुमार देव, महोत्तरी मनरा–५ घर भई भक्तपुर बस्ने २७ वर्षीया पल्लवी सिंह, ललितपुर महानगरपालिका–२ सानेपाका २९ वर्षीय फराज हुसेन खाँ पनि पक्राउ परेका थिए।
उनीहरुका शैक्षिक प्रमाणपत्र नक्कली बनाएको आरोपमा बागबजारस्थित दीपज्योति इन्टरनेसनल कन्सल्टेन्सीका सञ्चालक महोत्तरीका अरुण चौधरी, बागबजारमै रहेको ग्लोबल एजुकेशन कन्सल्टेन्सीका सञ्चालक सागिर अहमद खानलाई सिआइबीले पक्राउ परेका थियो।
पक्राउ परेका ९ जनालाई लिखत सम्बन्धी कसुरमा मुद्दा चलाउन भन्दै रायसहितको अनुसन्धान प्रतिवेदन सिआइबीले बुझाएकोे छ। उनीहरु सबैलाई ७ वर्षसम्म कैद र ७० हजार रुपैयाँ जरिवाना हुनेपर्ने भन्दै रायसहित प्रतिवेदन बुझाइएको एसपी पन्तले नेपाललाइभलाई जानकारी दिइन्।
मुलुकी अपराध संहिता, २०७४ को परिच्छेद २५ मा लिखत सम्बन्धी कसुरको बारेमा उल्लेख छ। परिच्छेद २५ को दफा २७६ मा कसैले पनि कीर्ते गर्नु वा गराउनु नहुने उल्लेख गरिएको छ। राष्ट्रपति र प्रदेश प्रमुखबाट प्रमाणिकरण भएको र अदालतको फैसला वा आदेश बाहेक अन्य कागजात कीर्ते गर्नेलाई सरकारी वा सार्वजनिक लिखतसम्बन्धी मुद्दा लाग्ने उल्लेख छ।
पक्राउ परेकाहरुलाई लिखत सम्बन्धी कसुरको सरकारी वा सार्वजनिक लिखतसम्बन्धी कसुरमा सजाय माग गर्दै सिआइबीले फाइल पेश गरेको हो।
कन्सल्टेन्सी र विद्यार्थीको भनाई बाझियो
पक्राउ परेका कन्सल्टेन्सी सन्चालक र विद्यार्थीहरुले भने एक अर्कालाई दोषी देखाएर उम्कने प्रयास गरेका छन्। उनीहरुको बयान नै एक आपसमा बाझिएको अनुसन्धानमा संलग्न अधिकारी बताउँछन्। विद्यार्थीहरुले भने डकुमेन्ट कीर्ते गर्ने काममा आफ्नो संलग्नता नरहेको दाबी गरेका छन्।
कन्सल्टेन्सीमा आफूहरुले डकुमेन्ट दिएको र कन्सल्टेन्सीले नै सबै प्रोसेसिङ गर्ने भएकाले नक्कली डकुमेन्ट बन्यो या बनेन भन्ने आफूहरुलाई जानकारी नै नभएको उनीहरुको तर्क छ। कतिपय विद्यार्थीले भने पक्राउ परेपछि मात्रै आफ्नो डकुमेन्ट कीर्ते गरेर बनाइएको थाहा पाएको दाबी गरेका छन्।
उता कन्सल्टेन्सी सञ्चालकले भने आफूले विदेश अध्ययनका लागि प्रोसेसिङ मात्रै गरेकाले यसमा विद्यार्थी आफैं जानकार हुनुपर्ने दाबी गरेका छन्। ‘सबै डकुमेन्ट विद्यार्थीले नै ल्याएर दिने हो हामीले त प्रोसेसिङ मात्रै गरिदिने हो। यसमा हाम्रो कुनै संलग्नता छैन’ पक्राउ परेका कन्सल्टेन्सी सञ्चालकको बयान उद्दृत गर्दै एक अधिकारीले भने, ‘सर्टिफिकेट, नागरिकतादेखि शिक्षा मन्त्रालयबाट नो अब्जेक्सन लेटर र नेपाल मेडिकल काउन्सिल (एनएमसी)को डकुमेन्ट पनि विद्यार्थीले नै ल्याउने हो। यसमा हाम्रो संलग्नता छैन।’
कन्सल्टेन्सीले नै नक्कली डकुमेन्ट एनएमसीलाई बुझाएको सिआइबीको निष्कर्ष
एसएलसी र प्ल टु को नक्कली शैक्षिक प्रमाणपत्रको अनुसन्धान गरेको सिआइबीले भने एउटा महत्वपूर्ण प्रमाण भेटाएको छ। शैक्षिक प्रमाणपत्र कीर्तेमा आफ्नो कुनै संलग्नता नरहेको दाबी गरे पनि कन्सल्टेन्सीमार्फत नै नेपाल मेडिकल काउन्सिलमा (एनएमसी) मा नक्कली शैक्षिक प्रमाणहरु पुगेको प्रमाण सिआइबीले फेला पारेको छ।
सिआइबीका प्रवक्ता पन्तले भनिन्, ‘कन्सल्टेन्सी सञ्चालकहरुको भूमिका चाहिँ के भन्नेबारे हामीले अनुसन्धान गर्दा उनीहरुले नै कीर्ते गरी नक्कली डकुमेन्ट बनाएको र कन्सल्टेन्सीमार्फत नै एनएमसीमा नक्कली डकुमेन्ट पुगेको प्रमाण फला परेको छ।’
विदेशमा एमएबिबिएस अध्ययनका लागि पेश गरिएका शैक्षिक प्रमाणपत्र मध्य कम अंक भएकाहरुलाई कन्सल्टेन्सीले नै कीर्ते गरी पेश गरेको निष्कर्ष सिआइबीको छ। उनीहरुको भिषा लागेपछि त्यसवापतको शुल्क लिनका लागि कन्सल्टेन्सीकै योजनामा यो काम भएको सिआइबीको निष्कर्ष छ। एमबिबिएस अध्ययनका लागि अंक पुग्नेहरुको पनि शैक्षिक प्रमाणपत्र कीर्ते हुनुलाई छात्रवृतिको लोभ देखाएर कन्सल्टेन्सीहरुले रकम असुलेको सिआइबीको निष्कर्ष छ।
आफू संलग्न नभएको दाबी गरे पनि कन्सल्टेन्सीको कीर्ते काम थाहा पाएर पनि चुप लाग्नु र आफ्नो डकुमेन्ट कीर्ते हुँदा विद्यार्थी पनि जिम्मेवार हुनपर्ने भन्दै उनीहरुलाई मुद्दा चलाउनुपर्ने राय सिआइबीको छ।
पुरानो केश र क्रस बोर्डर अनुसन्धान गर्नुपर्ने भएकाले जटिल : प्रवक्ता पन्त
झण्डै २५ दिन लामो अनुसन्धान सकेर रायसहित सरकारी वकिल कार्यालयमा फाइल पठाएको सिआइबीले भने पुरानो केश भएका अनुसन्धानमा केही समस्या देखिएको जनाएको छ। करिब एक दशक पुरानो केश भकाले धेरै प्रमाणहरु फेला पर्न गाह्रो भएको सिआइबीका प्रवक्ता पन्तले बताइन्।
उनका अनुसार यो केश पुरानो हुनाका साथै अन्तरदेशीय अनुसन्धान समेत गर्नुपर्ने भएकाले जटिल भएको उनको भनाई छ। ‘यसको रियल पिक्चर आउन बंगलादेशदेखि चीनसम्म अनुसन्धान गनुपर्ने हुन्छ’ प्रवक्ता पन्तले भनिन्, ‘क्रस बोर्डर अनुसन्धान गर्नुपर्ने भएकाले यसको अनुसन्धान निकै जटिल थियो।’
बंगलादेश, चीनमा अध्ययन गर्न पेश भएका डकुमेन्टलगायतको लिगेशी र तिनीहरुको प्रामाणिकरणसम्मको अनुसन्धान गर्नुपर्ने सिआइबीको तर्क छ।
यस्तो छ डाक्टरहरुको वास्तविक शैक्षिक प्रमाणपत्र
चीनको हुबेई युनिर्भसिटी फर नेसनालिटीमा एमबिबिएस अध्ययन गररेका अखिलेशकुमार देवले मेडिकल काउन्सिलको परीक्षा दिन बाँकी नै छ। २०६४ सालमा महावीर मावि सप्तरीबाट ६१ एलएलसी उत्तिर्ण गरेका देवले जम्मा ६१ प्रतिशत अंक ल्याएका थिए।
२०६७ सालमा छिन्नमस्ता एकेडेमीबाट प्ल टु उत्तिर्ण उनको प्राप्तांक ५५ प्रतिशत छ। तर उनको शैक्षिकप्रमाणपत्र कीर्ते गरी अंक बढाएर एमबिबिएस अध्ययन गरिएको थियो। उनले सन् २०२० मा एमबिबिएस सकेका थिए।
जनकपुरको चिल्ड्रेन अस्पतालमा कार्यरत रहेका सुभासप्रसाद साहले २०६३ सालमा सप्तरीको श्री योगकुमार उच्च माविबाट एसएलसी उत्तिर्ण गरेका थिए। त्यसबेला उनको प्राप्तांक ६१ प्रतिशत थियो। २०६६ सालमा प्लस टु उत्तिर्ण गर्दा उनको प्राप्तांक ५५ प्रतिशत छ। उनले सन् २०१७ मा बंगलादेशको ट्रष्ट मेडिकल कलेज चटगाउँ विश्वविद्यालयबाट एमबिबिएस उत्तिर्ण गरेका थिए। एनएमसीबाट अस्थायी चिकित्सा सेवा गर्न पाउने अनुमति साहले लिएका छन्।
बंगलादेशकै इब्राहिम मेडिकल कजेलबाट एमबिबिएस उत्तिर्ण गरेका थिए फराज हुसेल खाँ ले। २०६४ सालमा आइडियल मोडेल स्कुल ललितपुरबाट एसएलसी उत्तिर्ण भएका उनले त्यसबेला ७१ प्रतिशत अंक ल्याएका थिए भने प्लस टु मा ५५.५ अंक ल्याएका थिए। सन् २०१९ मा एमबिबिएस सकेर उनी नेपाल आएका थिए।
चाबहिलको दिघार्यु अस्पतालमा काम गरेका मोम्मद शाहिद राजाले बंगलादेशको नर्थ इष्ट मेडिकल कलेज विश्वविद्यालयबाट एमबिबिएस उत्तिर्ण गरेका हुन्। उनले एसएलसीमा ६८.६३ अंक र प्लस टुमा ७० अंक ल्याएका थिए।
ललितपुरकै किष्ट मेडिकल कलेजमा एमबिबिएस अध्ययनरत पल्लबी सिंहले छात्रवृतिमा अध्ययन गर्नका लागि शैक्षिक प्रमाणपत्रमा अंक बढाएको आरोप लागेको छ। उनले जनकपुरस्थित सिद्धार्थ शिशु सदन बोर्डिङ स्कुलबाट एसएलसीमा ७० र प्लस टु मा ६४ प्रतिशत अंक ल्याएकी थिइन्।
बंगलाशदेको बंगाल मेडिकल कलेजबाट एसबिबिएस गरेका मोहम्मद सिद्धिक प्लस टु मा ६० र एसएलसीमा ६८.५ प्रशितत अंक ल्याएका थिए। वल्र्ड भिजन सेकेन्डरी स्कुल सप्तरीबाट उनले एसएलसी उत्तिर्ण गरेका थिए।
ढाका नेशनल मेडिकल कलेजबाट एमबिबिएस उत्तिर्ण गरेका दीपेन्द्र गौतम चौरझारी अस्पताल रुकुममा कार्यरत थिए। उनले एसएलसीमा ६३.५ र प्लस टु मा ६६.८ अंक ल्याएका थिए।
यी विद्यार्थीको सबै नक्कली शैक्षिक प्रमाणपत्र कन्सल्टेन्सी सञ्चालकद्धय अरुण चौधरी र सागिर अहमद खानले बनाएको आरोप छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1752043710.jpg)
-1749826086.png)
