काठमाडौं– काठमाडौंको कपनबाट ४ वर्षीय बालकको अपहरण भएको छ। ४ वर्षीय बालक पियुस शर्माको अपहरण भएको हो।
भारत घर भइ कपनको टहरोमा बस्दै आएका विनोद शर्माका ४ वर्षीय छोरा पियुसको सोमबार दिउँसो साढे ४ बजे अपहरण भएको प्रहरी उच्च स्रोतले नेपाल लाइभलाई जानकारी दियो। प्रहरी उच्च स्रोतले भन्यो, ‘बालकलाई उनको घरबाट एक व्यक्तिले लगेको देखिएको छ। ती व्यक्तिको समेत पहिचान भइसकेको छ।’
कपनमा टहरो बनाएर बस्दै आएका बाबुसँगै बस्ने पियुसको सोमबार भने ठूलोबुवा मिठु शर्माको टहराबाट अपहरण भएको हो।
उनीहरुसँगै अर्को टहरोमा बस्दै आएका शंकर दासले बालक अपहरण गरी लगेको देखिएको प्रहरी स्रोतले जानकारी दियो।
अपहरणमा परेका बालक र अपहरणमा संलग्न भनिएका दास दुबैको घर भारत रहेको प्रहरीले जनाएको छ। बालकको भारत बिहार मधुवनी घर हो भने दासको बिहार वैशाली हो।
प्रहरी स्रोतका अनुसार दास उनका भाइमार्फत् करिब १ महिना अघि मात्रै कामको सिलसिलामा बालकको ठूलोबुवा मिठुको सम्पर्कमा पुगेका थिए। मिठु काठको काम गर्दै आएका छन् भने दास मार्बलको काम गर्ने व्यक्ति भएका पाइएको छ।
सोमबार दिउँसो साढे ४ बजेबाट बालकलाई लिएर दास वेपत्ता भएका पाइएको छ। मोबाइल समेत आफ्नै कोठामा छाडेर दास बालक लिएर वेपत्ता भएका पाइएको प्रहरी स्रोतले नेपाल लाइभलाई जानकारी दियो।
बालकलाई लिएर दास लोकल बस चढेर चाबहिल गोपिकृष्णसम्म पुगेको र त्यहाँ ओर्लिएको देखिएको प्रहरी उच्च स्रोतले नेपाल लाइभलाई जानकारी दियो।
बालक लिएर बस चढेका दासले 'वीरगञ्ज जाने बस कहाँ पाइन्छ?' भनेर सोधेको समेत प्रहरीले पुष्टि गरेको छ।
वीरगञ्ज जाने बसका बारेमा सोध्नुले बालक अपहरण गरी दास भारत प्रवेश गरेको हुनसक्ने प्रहरीले आशंका गरेको छ।
सोमबारदेखि बालक अपहरण गरेर वेपत्ता भएपछि प्रहरीले दासको खोजी गरिरहेको छ। अहिलेसम्म दास र बालकको अवस्थाबारे केही पत्ता लाग्न सकेको छैन।
अहिलेसम्म फिरौती समेत माग नभएकाले व्यक्तिगत रिसिइबीका कारण बालकको अपहरण भएको हुनसक्ने प्रहरीले आशंका गरेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1751879619.webp)
-1749826086.png)
