काठमाडौं- नेपाल सुपर लिग (एनएसएल) को दोस्रो संस्करण चैत अन्तिम साताबाट काठमाडौं र पोखरामा आयोजना हुँदैछ।
विगतको संस्करणमा सात टिमले सहभागिता जनाएको प्रतियोगिताको दोस्रो संस्करणमा १० टिमले सहभागिता जनाउँदै छन्। दोस्रो संस्करणका लागि अक्सन पनि सम्पन्न भइसकेको छ।
सहिद स्मारक ए डिभिजन लिग सकिए लगत्तै घोषणा भएको मिति पछि खेलाडीको सम्झौताको विषयमा विभिन्न क्लबले असन्तुष्टि जनाएका छन्। अक्सन हुने-नहुने अन्योलका बीच सम्पन्न भएसँगै विशेष गरी ए डिभिजन क्लब मनाङ मर्स्याङ्दी, थ्रीस्टार, संकटा तथा न्युरोड टिम (एनआरटी)ले असन्तुष्टि जनाइरहेका छन्। यो विषयमा न्युज एजेन्सी नेपाललले अखिल नेपाल फुटबल संघ (एन्फा) का महासचिव इन्द्रमान तुलाधरसँग गरेको कुराकानी :-
एन्फाले नेपाल सुपर लिग (एनएसल) एन्फाको कार्यक्रमको रूपमा अगाडि सारेको थियो। ए डिभिजन लगत्तै आयोजना हुन लागेको एनएसलको अक्सन पनि सम्पन्न भइसकेको छ। यद्यपी शीर्ष डिभिजनका क्लबले खेलाडी सम्झौता विषयमा असन्तुष्टि जनाइरहेका छन्। खासमा क्लबको असन्तुष्टि के विषयमा हो?
एन्फाले फ्रेन्चाइज टोलीहरूलाई विभिन्न व्यापारीक घरानालाई फुटबलमा लगानी गर्नका लागि फ्रेन्चाइज लिगको परिकल्पना गरिएको हो। नेपाल सुपर लिग विशुद्ध एउटा फ्रेन्चाइज लिग हो र सोही अनुसार हामीले परिकल्पना गरेर एन्फाको कार्यक्रममा समावेश गरेका हौं।
फुटबल विकासमा टेवा पुगोस् भनेर फुटबल प्रतियोगितासँगै विभिन्न व्यापारीक घरानाहरूलाई फुटबलमा ल्याउने प्रयास गरेका हौं। फुटबलमा व्यापारीक घरानाहरूको पनि लगानि भित्रियोस् भन्ने उद्देश्य हो। एनएसललाई सहयोग पुगोस् भनेर खेलाडी तथा नामावली पनि बनाएका छौं। एनएसएलको समयमा खेलाडीलाई क्लबले रिलिज गर्नुपर्छ भन्ने नियामावली राखेका छौं।
लिग लगत्तै मोफसलका प्रतियोगिताहरू खेल्नुपर्ने समयमा खेलाडीलाई अक्सनमा समेट्न कतिपय क्लबको असहमति रहेको छ। एनएसलको आयोजकको सल्लाहबिना नै एनएसलको मिति आउनु क्लबहरूको गुनासो आएको छ। क्लबहरूको गुनासो सम्बोधनकालागि एन्फाले विभिन्न चरणका छलफल गरिरहेको छ। आजभोलि नै यस विषयले टुङ्गो लाग्ने विश्वास छ।
क्लबहरूले गुनासो गरिरहेका छन्। विशेष गरी खेलाडी सम्झौताको विषयमा क्लबहरूले असन्तुष्टि जनाइरहेका छन्। यस बाहेक क्लबको अन्य असन्तुष्टिहरू के हुन?
यो विषय क्लबहरूको माध्यमबाट एन्फामा आएको छ। वैधानिक रूपमा करारमा रहेका खेलाडीलाई अक्सनमा राख्नु अगाडि क्लबसँग छलफल गरियोस भन्ने थियो।
यस्तै क्लबका केही कठिनाइलाई एनएसएलले टुङ्ग्याइदियोस् भन्ने चाहना थियो। मोफसलका प्रतियोगितामा सहभागिता जनाइरहेको अवस्थामा अवरोध गरियोस् भन्ने पनि थियो। खेलाडीहरूको हकमा क्लबसँग छलफल नभएकोमा असन्तुष्टिको रूपमा लिएका छन्।
फिफा र एएफसीबाट कुनै पनि देशमा समानान्तर लिग सम्भव हुँदैन भन्ने गाइडलाइन छ। अस्तित्वमा रहेको ए डिभिजन लिग वा नेपाल सुपर लिग मध्येमा कुन हुने हो भन्ने गाइगुइ पनि चल्न थालेको छ। आधिकारिक लिग कुन हो?
हामी यस विषयमा एकदमै क्लियर छौं। आयोजक एनएसएल, खेल्ने टिम वा एन्फा होस् या क्लब सबै यस विषयमा स्पष्ट छन्।
नेपालको एउटै मात्र आधिकारिक लिग भनेको सहिद स्मारक लिग हो। ए डिभिजन लिग नै हो। यसैको च्याम्पियनले एएफसीको प्रतियोगिताहरू खेल्ने गर्छ। नेपाल सुपर लिग देशको एउटा फ्रेन्चाइज लिगको रूपमा लिएका छौं।
यो प्रतियोगिता करिव साढे दुई महिना जति चल्छ। यो प्रतियोगिताबाट कुनै पनि क्लबले अन्य प्रतियोगितामा सहभागिता जनाउँदैन्। यो प्रतियोगिता विशुद्ध फ्रेन्चाइज प्रतियोगिता हो।
व्यापारिक घरानाहरूले लगानीमा क्लबलको खेल्ने घरेलु प्रतियोगिता हो। यो लिग सहिद स्मारक लिगको प्रतिस्थापन वा विकल्पको रूपमा ल्याइएको प्रतियोगिता होइन। सहिद स्मारक नै नेपालको आधिकारिक लिग हो।
क्लबहरूले असन्तुष्टि जनाइरहेको अवस्थामा र एन्फाले आफ्नो कार्यक्रम भनिरहदा उत्पन्न विवाद समाधानका लागि फुटबलको अभिभावक संस्था एन्फाले कस्तो गृहकार्य गरिहेको छ त?
क्लबहरूले विज्ञप्ती जारी गरिसकेसँगै हामीले असन्तुष्ट क्लबहरूसँग बसेर छलफल गरिसकेका छौं। सुरूवातमा असन्तुष्टि जनाएको ८ क्लबसँग एन्फामा बसेर छलफल गरिसकेका छौं। एन्फाको बैठक पनि केही विषयमा सहमति भइसकेको छ। अक्सन अगाडि छलफल भएसँगै अक्शन रोक्नका लागि एनएसएललाई पत्र काटे पनि ढिला भएको हो। पत्र एकदमै ढिला भएकोले रोक्ने सम्भव भएन।
आयोजकले अक्सन गरेपछि सबै विषयमा खुला छौं भन्ने कुरा आएपछि अहिले असन्तुष्टि विषयमा विभिन्न चरणमा छलफल भइरहेको छ। दुबै पक्षसँग हामीले वार्ता गरिरहेका छौं। छलफल करिव करिव अन्तिम चरणमा पुगेको मैले बुझेको छु। क्लबले आधिकारिक धारणा पनि राख्दैछन्।
त्यस विषयमा एन्फा अध्यक्षसँग क्लबहरूको भेट पछि एनएसएल क्लबहरूलाई औपचारिक रूपमा छलफलका लागि आह्वान गर्छौं। त्यसपछि एनएसल क्लब र एन्फा बसेर आगामी दिनमा यस्तै विवाद नदोहोरियोस् भन्ने लक्ष्यका साथ टुङ्ग्याउँछौं।
एनएसएल एन्फाको कार्यक्रम भनिरहँदा दोस्रो संस्करण हुन लागेको छ। अहिलेसम्म क्यालेन्डरमा समावेस छैन। आउँदो सिजनमा समावेस होला? सँगै उत्तिकै मोफसलका प्रतियोगिता पनि रहेका छन्। कसरी व्यवस्थापन गर्नुहुँदै छ त एनएसएललाई?
मोफसलका विभिन्न गोल्डकप रहेका छन्। ती गोल्डकप भएकोले समावेश गर्न केही कठिन त पक्कै छ।
सामान्य अवस्थामा भदौ, असोजदेखि कात्तिकको २० सम्मलाई एनएसएलका लागि समय दिने योजना बनाएका छौं। त्यस लगत्तै एउटा नकआउट प्रतियोगिता गर्ने वा शहीद स्मारक लिगलाई आयोजना गर्ने योजनामा छौं। फागुनसम्म लिग चलिरहेपछि त्यसपछिको समय चैत, वैशाख र जेठ गोल्डकपका लागि छुट्याउने सोचमा छौं।
जसका कारण मोफसलका प्रतियोगिता आयोजना गर्नेका लागि सजिलो हुन्छ। अहिलेको अवस्थामा लिग लगत्तै एनएसएल आयोजना हुँदा केही कठिनाइ आइरहेको अवस्था छ। अर्को वर्ष आयोजना हुने एनएसएलका लागि अक्सन अगाडि खेलाडी रिलिजको बाटो खुला गर्नेछौं।
त्यसपश्चात् रिलिज भएका खेलाडीमात्र अक्शनमा समावेश हुन पाउने प्रावधान तोक्नेछौं। समग्ररूपमा सबैलाई समेट्नका लागि राष्ट्रिय लिग पनि आयोजना गर्नुछ। मोफसलका प्रतियोगिता पनि उत्तिकै छन्।
सहिद स्मारक ए, बी, सी डिभिजनका लिग आयोजना गर्नुपर्ने हुन्छ। महिलाका उत्तिकै प्रतियोगिता रहेका छन्। हामी यी सबैलाई नजुध्ने गरिकन भदौबाट सिजन सुरू गर्ने तयारी गरिहेका छौं।
तोकिएकै मितिमा एनएसएल आयोजना हुन्छ नि ?
तोकिएको मितिमा नै एनएसएल हामीले आयोजना गर्नुपर्छ। तोकिएको मिति भन्दापछि धकेलिएको अवस्थामा राष्ट्रिय टोलीको तयारीलाई असर गर्छ। हामीले एसियन कप क्वालिफायर खेल्दैछौं। हामी अत्यन्तै कठिन समूहमा रहेका छौं।
जोर्डन, कुवेत र इण्डोनेसिया जस्तो समूहमा रहेका छौं। तयारी राम्रो गर्नुपर्छ। त्यसका लागि मिति तलमाथि भए असर पर्छ। तसर्थ एनएसएल छिटो सकेर राष्ट्रिय तयारीमा लाग्नुपर्नेछ।
समयमा नै सम्पन्न गर्नका लागि क्लबहरूसँग छलफल गरिहेका छौं। कति जटिल विषय त छलफलपछि किनारा लागेका छन्। टेबलबाट नै समाधान हुनेमा हामी विश्वस्त छौं।
एनएसएल आयोजक र अभिभावक संस्थाबीच एनएसएल आयोजना सम्बन्धमा के–के विषयमा साझेदारी भएको छ?
एनएसएलमा हामीले आर्थिक पाटोमा खासै केही कुरा भएको छैन। व्यापारीक घरानाहरूलाई फुटबलमा आकर्षण गर्न कोसिस गरेका हौं। आयोजकले प्रतियोगिता मनदेखि नै आयोजना गरेको पाएका छौं। अघिल्लो संस्करण कोरोना महामारीको बीचमा पनि बन्द रंगशालामा खेलाएर सफल तरिकाले आयोजना गर्न सफल हुनुभयो। सोही प्रतियोगिताबाट खेलाडीको आर्थिक हिसाबमा राम्रो भएको पाएका छौं।
अहिलेको अवस्थामा हामीले आयोजकले प्राविधिक पाटोमा सहयोग गरेका छौं। रेफ्री खटाउने, मैदान व्यवस्थापन, परिषदबाट स्वीकृति लिने काम, प्रतियोगिताका नियामावली हेरिदिने काम, खेलाडी दर्ता, खेलाडी स्थानतरण, अनुसाशन गरी विभिन्न पाटामा हामीले हेरेका छौं। बाँकी आयोजनाको जिम्मा उहाँहरूले गर्नुभएको छ।
परम्परागत तरिकाले चलिरहेको फुटबलभन्दा भिन्न फुटबल एनएसएलमा पाएका छौं। जुन हामीले लिगमा पनि अनुसरण गर्ने प्रयास गरेका छौं। आयोजक एनएसएल र एन्फाबीच फुटबलको जितका लागि सहमति भएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
![सय दिने प्रगति विवरण सार्वजनिक गर्दै प्रधानमन्त्री केपी ओली [प्रत्यक्ष प्रसारण]](https://nepallive.net/uploads/posts/500X300/kllllllllll-1729675876.jpg)
![Nepal Live Samachar नेपाल लाइभ समाचार, भदौ १९ [भिडियाे]](https://nepallive.net/uploads/posts/500X300/samachar++-1725458095.jpg)
![प्रधानमन्त्रीसँग प्रश्नोत्तर [प्रत्यक्ष प्रशारण]](https://nepallive.net/uploads/posts/500X300/PMM-(1)-1718866650.jpg)
![भारत भ्रमणबारे प्रतिनिधि सभा बैठकमा जवाफ दिँदै प्रधानमन्त्री प्रचण्ड [प्रत्यक्ष प्रशारण]](https://nepallive.net/uploads/posts/500X300/prachanda-sansad-1710309847.jpg)
![Nepal Live Samachar नेपाल लाइभ समाचार, जेठ ३० [भिडियाे]](https://nepallive.net/uploads/posts/500X300/samachar++-copy.jpg-30-1718203418.jpg)
