अस्पतालमा बालिकाको मृत्यु घटना : तीन सदस्यीय छानबि समिति गठन

समाचार

ललित बोहरा आइतबार, जेठ २९, २०७९ १०:५३

डडेलधुरा– डडेलधुरा अस्पतालमा जेठ १९ गते भागेश्वर गाउँपालिका–५, सिराडकी ५ वर्षीया बालिका यनुसा थापा मगरको मृत्यु भएको घटनामा पुनः तीन सदस्यीय छानबिन समिति बनाइएको छ।

अस्पतालका निमित्त मेडिकल सुपरिटेण्डेन्ट डा. चेतराज भट्टको संयोजकत्वमा स्वास्थ्य कार्यालयका प्रमुख आसुतोष श्रेष्ठ र जिल्ला प्रशासन कार्यालयका प्रशासकीय अधिकृत सदस्य रहने गरि तीन सदस्यीय छानबिन समिति बनाइएको हो।

समितिलाई घटनाको सत्यतथ्य छानबिन गरि सीसीटिभी फुटेज समेत संलग्न गरी प्रतिवेदन ल्याउन भनिएको छ।

यसअघि बालिकाका आफन्तले डाक्टरको चरम लापरबाहीले मृत्यु भएको भन्दै आपत्ति जनाएपछि जिल्ला प्रशासन कार्यालय डडेलधुरामा बसेको सर्वपक्षीय बैठकले ७२ घण्टाभित्र छानबिन गरि दोषीलाई कारबाही गर्न अस्पतालका निमित्त मेसु डा. भट्टलाई निर्देशन दिएको थियो।

तर, एक सातापछि मेसु भट्टले एकोहोरो प्रतिवेदन सार्वजनिक गरेको भन्दै मृतकका आफन्त र सरोकारवालाले आपत्ति जनाएपछि पुनः छानबिन समिति बनाइएको हो।

मेसु भट्टले सार्वजनिक गरेको छानबिन प्रतिवेदन एकोहोरो र दोषी बचाउनका लागि हचुवाका भरमा सार्वजनिक गरिएको मृतकका बाबु प्रकाश थापाले गुनासो गरे।

उनले प्रतिवेदनमा उल्लेख गरिएको यनुसा दुई दिनअघि बिरामी भएको र अस्पतालले यनुसाको प्राथमिक उपचार गर्दागर्दै मृत्यु भएको भन्ने विषयमा आपत्ति जनाए।

दोषी लुकाउन अस्पतालले विभिन्न बहाना गरिरहेको मृतक बालिकाका आफन्तको आरोप छ। विशिष्ठ विशेषज्ञ सेवासहित संघीय सरकार मातहत रहेको अस्पतालमा बाल रोग विशेषज्ञ डाक्टर समयमै उपस्थित नहुनु र रोग पत्ता नलगाइ अनावश्यक औषधि प्रयोग गरिएकोले यनुसाको मृत्यु भएको आफन्तको आरोप छ।

निमित्त मेसु डा. भट्टको प्रतिवेदन सार्वजनिक भएपछि सर्वपक्षीय बैठक बसेको थियो। बैठकले अस्पतालको सुधारका लागि विभिन्न सुझाव समेत दिएको छ। अस्पतालको सेवा सुविधा बढाउनुका साथै व्यवस्थापनका पक्षमा व्यापक सुधार गर्नुपर्ने विषयमा बैठकका सहभागिहरुले एकमत भएर सुझाव दिएका छन्।

अस्पताल विकास समिति अध्यक्ष करुणाकर ओझा र अस्पतालका निमित्त मेसु डा. भट्टले अस्पतालको सेवा र व्यवस्थापनका विषयमा सुधार ल्याउने प्रतिवद्धता व्यक्त गरेका छन्।

सुदूरपश्चिम प्रदेशमा एकमात्र रिफरल अस्पतालका रूपमा रहेको डडेल्धुरा अस्पतालमा आवश्यक जनशक्ति नहुँदा गुणस्तरीय सेवा दिन सकिरहेको छैन भने यहाँका बासिन्दाले उपचारका लागि बाहिर जानुपर्ने बाध्यता रहेको छ।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।