काठमाडौं– यतिबेला सेयर बजारले मौद्रिक नीति पर्खिरहेको छ। जसका कारण सेयर बजारमा सामान्यबाहेकको गतिविधि हुन सकेको छैन। लगानीकर्ता अहिले पर्ख र हेरको अवस्थामा छन्।
मौद्रिक नीतिले सेयर बजारलाई समेट्न सक्छ कि सक्दैन भनेर आफूहरु पर्खेर बसेको लगानीकर्ता संगठनका कार्यकारी बताएका छन्।
सेयर बजारका लगानीकर्ताले मौद्रिक नीतिप्रति धेरै अपेक्षा राखेको लगानीकर्ता राधा पोखरेल बताउँछिन्। उनी भन्छिन्, ‘लगानीकर्ताको मौद्रिक नीतिमा सबैभन्दा ठूलो अपेक्षा भनेको सेयर कर्जामा लगाइएको ४/१२ को सीमा हटाउँछ भन्ने नै हो।’
अन्य धेरै माग लगानीकर्ताले नेपाल राष्ट्र बैंकलाई सुझाइसकेको उनको भनाइ छ। मौद्रिक नीतिले अहिलेको सेयर बजारलाई सहज बनाउँछ कि बनाउँदैन भनेर कुरिराखेको उनी बताउँछिन्। गत आर्थिक वर्षमा मौद्रिक नीतिकै व्यवस्थाहरूका कारण घटेको सेयर बजारमा यसवर्ष भने सुधार आउने खालको सकारात्मक नीति आउनेमा आफूहरु विश्वस्त रहेको लगानीकर्ताको तर्क छ।
चालू आवको सुरुआती ८ दिनको सेयर बजारको गतिविधि
चालू आर्थिक वर्षको सुरुआती ८ दिनसम्म बढेको सेयर बजार बिहीबार (९ औं दिन) मा आएर सामान्य घटेको छ। साउन १ गतेदेखि कै सेयर बजारको गतिविधि हेर्दा सामान्य खालको गतिविधि देखिन्छ। साउन १ गतेबाट बढेको सेयर बजार बिहीबारसम्म आइपुग्दा सामान्य गिरावट आएको छ।
बिहीबारको दिन पनि सेयर बजार सुरुआति समयमा सामान्य घटेको थियो। ११ः३५ बजे ६.१८ अंकले घटेको सेयर बजार १ः५८ बजे ४.०८ अंकले बढेको थियो। बिहीबार अन्यमा सेयर बजार ५.८७ अंकले घटेर २०४४.७२ बिन्दुमा पुगेर बन्द भएको छ। बिहीबारको सेयर बजारको घटाईलाई लगानीकर्ताले सामान्य करेक्सनकोे रुपमा लिएका छन्।
बिहीबार सेयर बजारमा एक अर्ब ६४ करोड रुपैयाँ बराबरको कारोबार भएको छ। बिहीबारको दिन २२५ कम्पनीको ३९ लाख ८ हजारभन्दा बढी कित्ता सेयर कारोबार भएको छ।
वाणिज्य बैंक र अन्यबाहेक बाँकी सबै समूहका सूचक घटेका छन्। १७ करोड ८० लाख रुपैयाँभन्दा बढीसहित कारोबार रकममा शिवम् सिमेन्ट्स अग्रस्थानमा रहेको छ। यसैगरी, दोस्रो र तेस्रो स्थानमा क्रमशः एनआईसी एसिया बैंक र नेपाल पुनर्बिमा कम्पनी परेका छन्।
अघिल्लो कारोबार दिन सेयर बजारमा सामान्य खालको गतिविधि मात्र देखिएको थियो। ओपनिङको सुरुआती समयमा सामान्य घटेको सेयर बजार बन्द हुँदा सामान्य बढेको थियो। बुधबार सेयर बजार मापन गर्ने नेप्से परिसूचक ४.८९ प्रतिशतले बढेर २०५०.५९ बिन्दुमा पुगेको थियो।
शुक्रबार मौद्रिक नीति सार्वजनिक गर्ने तयारी
साउनको पहिलो हप्ता मौद्रिक नीति सार्वजनिक गर्ने तयारी गरेको राष्ट्र बैंकले बिहीबार बेलुका प्रधानमन्त्रीसँग भेट गर्ने भएको छ। प्रधानमन्त्री शेरबहादुर देउवालाई बिहानैदेखि भेट्न खोजेका गभर्नर महाप्रसाद अधिकारीले बेलुकासम्म भेट्ने निश्चित जस्तै भएको प्रधानमन्त्रीको सचिवालय श्रोतले जनाएको छ।
श्रोतका अनुसार प्रधानमन्त्रीको समयव्यस्तताको कारण भेट हुन नसकेको हो। बिहीबार प्रधानमन्त्री र गभर्नरबीच भेट भए शुक्रबार मौद्रिक नीति आउने निश्चित रहेको नेपाल राष्ट्र बैंक स्रोतले जनाएको छ।
राष्ट्र बैंक श्रोत भन्छ, ‘गर्भनरले प्रधानमन्त्रीसँग भेट्नको लागि कोशिस गरिरहनु भएको छ। भेट भएर छलफल सकिने बित्तिकै पनि मौद्रिक नीति सार्वजनिक गर्न सकिन्छ। राष्ट्र बैंकबाट सम्पूर्ण तयारी पूरा भइसहेको छ। अब प्रधानमन्त्रीसँग बिफ्रिङ गर्ने बित्तिकै सार्वजनिक हुन्छ।’
कस्तो आउला मौद्रिक नीति?
राष्ट्र बैंकले चालू आर्थिक वर्ष २०७९/०८० का लागि ल्याउन लागेको मौद्रिक नीति अहिले अर्थतन्त्रमा देखिएको समस्याको सुधार गर्ने खालको हुनुपर्ने विज्ञहरुको भनाइ छ। राष्ट्र बैंकले अहिले बैंकिङ क्षेत्रमा देखिएको तरलता अभाव समाधान गर्ने, सेयर बजारमा देखिएको अस्वभाविक उत्तार चढावलाई नियन्त्रण गर्ने खालको मौद्रिक नीति ल्याउनुपर्ने आवश्यकता विभिन्न संस्थाहरुले औंल्याएका छन्।
यसैगरी, राष्ट्र बैंकले अहिलेको आर्थिक अवस्थालाई पुनर्उत्थान गर्ने खालको मौद्रिक नीति ल्याउनुपर्ने व्यवसायीहरुको माग रहेको छ। यता राष्ट्र बैंकले भने चालू आर्थिक वर्षको मौद्रिक नीति संकुचित खालको आउने संकेत गरिहेको छ।
नेपाल राष्ट्र बैंकका गभर्नर महाप्रसाद अधिकारीले चालू आर्थिक वर्षको लागि ल्याउने मौद्रिक नीतिमा ब्याजदरमा कडाई, सहुलियतपूर्ण कर्जामा कटौती लगायतका विषय समेटिएको संकेत गरेका छन्। उनले विभिन्न कार्यक्रममा बोल्दै यस्तो अभिव्यक्ति दिँदै आएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1751879619.webp)
-1749826086.png)
