काठमाडौं ५ : मतले गठबन्धनभन्दा अगाडि ईश्वर पोखरेलको चुनौती को?

निर्वाचन विशेष

राजनीतिक ब्यूरो शनिबार, भदौ ११, २०७९ १९:०५

काठमाडौं- काठमाडौंको १० वटा चर्चामा रहेका क्षेत्र मध्ये एक हो- क्षेत्र नम्बर ५। २०७४ को स्थानीय तह निर्वाचनमा काठमाडौं महानगरपालिकाको उम्मेदवार बनेर चर्चामा आएकी रञ्जु दर्शना, तनहुँ गृहजिल्ला भएका कांग्रेसका नेता प्रदीप पौडेल, डडेलधुरा गृहजिल्ला भएका नैनसिंह महर, एकीकृत समाजवादीकाे विद्यार्थी संगठनका अध्यक्ष सुदेश पराजुली लगायतले सोही क्षेत्रबाट उम्मेदवारी दिने चर्चा भइरहेको छ।

२०७४ सालमा यो क्षेत्रबाट एमालेका उम्मेदवार ईश्वर पोखरेल विजयी भएका थिए। २०६४ र २०७० मा पोखरेल कांग्रेस उम्मेदवार नरहरि आचार्यसँग यही क्षेत्रमा पराजित भएका थिए। २०७४ मा आचार्यले चुनावी प्रतिस्पर्धा नै गरेनन्। त्यसको फाइदा पोखरेललाई पुगेको देखियो।

त्यतिबेला पोखरेलले कांग्रेस उम्मेदवार डा. प्रकाशशरण महतलाई झन्डै १० हजार मतान्तरले हराएका थिए। पोखरेलले २३ हजार २९ मत पाएका थिए भने डा. महतले १३ हजार १ सय ६९ मत पाए। विवकेशील साझाका उज्ज्वल थापाले ६ हजार ८ सय ५३ मत हासिल गरेका थिए। बाँकी १७ जना उम्मेदवार एक हजार भन्दा कम मतमै रोकिए।

आउदो मंसिर ४ को निर्वाचनमा पनि एमालेबाट पोखरेल नै प्रतिस्पर्धी बन्ने निश्चित प्रायः छ। गठबन्धनबाट भने उम्मेदवार निश्चित भइसकेको छैन। २०७४ मा पराजित महतले यसपटक नुवाकोट–१ बाट निर्वाचन लड्ने तयारी गरिरहेका छन्। यसअघि नुवाकोट–१ मा प्रतिस्पर्धी बनेका उनका दाजु डा. रामशरण महतले सक्रिय राजनीतिबाट बिदा लिने संकेत गरेका छन्।

काठमाडौं–५ अन्तर्गत काठमाडौं महानगरपालिकाका २, ३, ४ र ५, बूढानीलकण्ठ नगरपालिकाका ३, ४, ५, ६, ७ र टोखा नगरपालिकाका २, ३, ४, ५, ६ र ७ वडाहरू पर्छन्।

वैशाखमा सम्पन्न स्थानीय तहको निर्वाचनमा यस क्षेत्रका वडाहरुका अध्यक्षका उम्मेदवारले पाएको एकीकृत मतमा एमाले अगाडि छ। एमाले एक्लैको १९ हजार ७३ मत छ। त्यस्तै, कांग्रेसको १४ हजार ८५३, माओवादी केन्द्रको १ हजार १६८, एकीकृत समाजवादीको १ हजार ८२७ मत छ। राप्रपाको मत माओवादी केन्द्र र एकीकृत समाजवादीभन्दा बढी अर्थात् २ हजार ६२२ छ।

स्थानीय निर्वाचनमा खसे अनुसार नै पार्टीगत मत खसेमा पोखरेलले गठबन्धनका उम्मेदवारले भन्दा बढी मत पाउनेछन्। पोखरेललाई राप्रपाले पनि सघाएमा उनको मतान्तर झन् बढी हुनेछ। अर्कोतिर, उनको विपक्षमा अहिले चर्चा भएजस्तो धेरैभन्दा धेरै उम्मेदवार उत्रिए भने विपक्षी मतलाई नै विभाजन गर्ने सम्भावना बढी हुन्छ। त्यसको लाभ पनि उनैलाई पुग्नेछ।

पोखरेल एमालेका वरिष्ठ उपाध्यक्ष र प्रभावशाली नेता हुन्। त्यसको लाभ उनलाई हुनेछ। केपी ओली नेतृत्वको सरकारमा मन्त्री बन्दा उनी कतिपय विवादमा फसेका थिए। तर, त्यसले मतमा कति प्रभाव पार्छ वा पार्दैन भन्नेचाहिँ मंसिर ४ पछि नै स्पष्ट हुनेछ।
०००
२०७९ वैशाखमा सम्पन्न स्थानीय तहको निर्वाचनमा काठमाडौं- ५ अन्तर्गत पर्ने वडाहरुका अध्यक्ष उम्मेदवारले पाएको एकीकृत मतः
एमाले- १९०७३
कांग्रेस- १४८५३
माओवादी केन्द्र- ११६८
एकीकृत समाजवादी- १८२७
राप्रपा- २६२२
०००
२०७४ को आम निर्वाचनमा उम्मेदवारहरूले पाएको मतः
ईश्वर पोखरेल/एमाले- २३०२९
डा. प्रकाशशरण महत/कांग्रेस- १३१६९
उज्ज्वल थापा/ विवकेशील साझा- ६८५३