हात्तीसार र कमलादीमा जमिन खोतल्दा फेला पर्‍यो टुकुचाको बहाव क्षेत्र

समाचार

मनिष अर्याल शनिबार, असोज १, २०७९ १७:०७

काठमाडौं– काठमाडौं महानगरपालिकाले अहिले टुकुचा खोला खोज्ने अभियान सञ्चालन गरेको छ। बिहीबार काठमाडौंको हात्तीसारस्थित जयनेपाल हलको कम्पाउन्ड भत्काउँदा जमिनमुनि खोला फेला परेको थियो।

नारायणहिटी दरबार क्षेत्रबाट निस्किएको टुकुचा खोला हात्तीसार क्षेत्रमा गायव थियो।

महानगरले शनिबार हात्तीसार–कमलादी क्षेत्रका थप केही संरचना हटाएर खोलाको बहाव क्षेत्र पत्ता लगाएको छ।

शनिबार हात्तीसार–कमलादीस्थित लक्ष्मी बैंक नजिकैको जमिन खोतल्दा खोलाको बहाव क्षेत्र फेला परेको हो।

खोला अतिक्रमण गरेर संरचनाहरु निर्माण गरिएको भन्दै स्थानीयले विगत लामो समयदेखि उत्खननको माग गर्दै आएका थिए।

महानगरले साउन १२ गते सार्वजनिक सूचना जारी गर्दै टुकुचा खोला मिचेर बनाएका संरचना हटाउन भनेको थियो। महानगरले सूचना जारी गरेको लामो समयसम्म पनि कसैले संरचना नहटाएपछि महानगर आफैं टुकुचा खोलाको खोजीमा जुटेको हो।