नवनिर्वाचित सांसद काठमाडौं केन्द्रित, नयाँ सरकार गठनमा ढिलाई

राजनीति

धनगढी– प्रतिनिधि सभामा निर्वाचित सांसदहरूको शपथ ग्रहण र नयाँ सरकार गठनको छलफल सुरू भएको छ। केही प्रदेश सभाले पनि शपथको समय निर्धारण गरिसकेका छन्। तर, सुदूरपश्चिम प्रदेशमा भने नयाँ सरकार गठनको प्रक्रिया मात्र होइन प्रदेश सभा सदस्यको शथपको समेत टुंगो लागेको छैन।

केन्द्रीय राजनीतिक समीकरणको पर्खाइमा रहेका यस प्रदेशका नवनिर्वाचित प्रदेश सभा सदस्यहरू काठमाडौं केन्द्रित हुँदा प्रदेश सभा सचिवालयले कार्यतालिका तय गर्न सकेको छैन। प्रदेश सभा सचिवालयले सर्वदलीय बैठक र नवनिर्वाचित प्रदेश सभा सदस्यलाई शपथ ग्रहण गराउने कार्यक्रम तय गर्न नसकेको प्रदेश सभा सचिवालयका सचिव देवबहादुर बोगटीले बताए।

सुदूरपश्चिम प्रदेशका नवनिर्वाचित प्रदेश सभा सदस्यहरूलाई पुस १५ भित्र पद तथा गोपनियताको शपथ गराउने गरि छलफल भइरहेको उनले बताए।

‘प्रदेशका नवनिर्वाचित पदाधिकारीलाई शपथ पुस ११ गतेको मिति तय गर्नेगरि छलफल भएको थियो’, प्रदेश सभा सचिवालयका सचिव बोगटीले भने, ‘यद्यपि, नवनिर्वाचित प्रदेश सभा सदस्यहरू संघीय राजधानी काठमाडौंमै भएकाले केही दिन लम्ब्याउनु परेको हो। हामीले पुस १५ गतेभित्र शपथ गराउने भनेर प्रदेश प्रमुखसंग छलफल भएको छ। अहिले नै मिति तय हुन सकेको छैन।’

संविधानको धारा १८२ को उपधारा (५), प्रदेश सभा सदस्य निर्वाचन ऐन २०७४ को दफा ७५ बमोजिम निर्वाचित प्रदेश सभा सदस्यहरूमध्ये ज्येष्ठ सदस्यले प्रदेश सभाको अध्यक्षता गर्ने व्यवस्था अनुसार प्रदेश प्रमुखको कार्यालयमा शपथ ग्रहण गराउने व्यवस्था रहेको छ।

सुदूरपश्चिम प्रदेश सभामा निर्वाचित सबैभन्दा ज्येष्ठ सदस्य मानबहादुर रावल रहेका छन्। ६८ वर्षीय रावल नेपाली कांग्रेसबाट अछाम–२ (२)बा निर्वाचित प्रदेश सभा सदस्य हुन्।

रावललाई प्रदेश प्रमुख देवराज जोशीले पद तथा गोपनियताको शपथ गराउने छन्। त्यसपछि रावलले ५२ जना प्रदेश सभा सदस्यलाई शपथ ग्रहण गराउने छन्। प्रदेश सभामा प्रत्यक्ष निर्वाचित ३२ र समानुपातिकतर्फबाट २१ सांसद रहेका छन्।

पद तथा गोपनियताको शपथ खाएपछि मात्र प्रदेश सभाको पहिलो बैठक ज्येष्ठ सदस्यले सञ्चालन गर्ने व्यवस्था रहेको छ। प्रदेश सभा सचिवालयका सचिव बोगटीले भने, ‘१५ गते पद तथा गोपनियताको शपथ खुवाउने र १८ गते पहिलो बैठक आह्वान गर्ने भन्ने प्रदेश प्रमुखसँग सामान्य छलफल भएको छ।’

संविधानको धारा १७९ अनुसार प्रदेश सभा सदस्यले प्रदेश सभा वा त्यसको कुनै समितिको पहिलो बैठकमा पहिलो पटक भाग लिनुअघि प्रदेश कानुन बमोजिम शपथ लिनुपर्ने भन्ने व्यवस्था रहेको छ। सोही व्यवस्था अनुसार ज्येष्ठ सदस्यले शपथ ग्रहण गराउने कार्यक्रममा निर्वाचन आयोगबाट प्रदान गरिएको प्रदेश सभा सदस्य निर्वाचित भएको प्रमाणपत्र, नागरिकताको प्रमाणपत्र र हालसालै खिचेको पासपोर्ट साइजको फोटोसहित प्रदेश सभा सचिवालयमा उपस्थित हुनुपर्छ।

सचिवालयले मातृभाषामा शपथ लिन चाहेमा त्यस्तो सदस्यले शपथको व्यहोरा आफ्नो मातृभाषामा अनुवाद गरी सो अनुवादको प्रतिसहित प्रदेश सभा सदस्यको निर्वाचन ऐन २०७४ को दफा ७५ को उपदफा (२) तथा प्रदेश सभाका पदाधिकारी तथा सदस्यको पारिश्रमिक र सुविधा सम्बन्धी ऐन २०७५ को दफा १९ बमोजिम तीन दिन अगावै प्रदेश सभा सचिवालयमा उपलब्ध गराउनुपर्नेछ।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।