काठमाडौंमा ३ वर्षपछि गुञ्जिएको नेपथ्य [तस्बिरहरु]

संगीत

मनिष अर्याल आइतबार, पुस १७, २०७९ १३:५३

काठमाडौं– लोकरक ब्याण्ड नेपथ्यको श्रृंखलाबद्ध यात्रा शनिबार सम्पन्न भएको छ। एक महिनाभन्दा लामो भ्रमणमा निस्किएको टोली शनिबार साँझ काठमाडौंको भृकुटीमण्डपमा गुन्जन पुग्यो।

निर्धारित समयमै ब्याण्डका दुईवटा म्यूजिक भिडियो बज्न सुरु भयो। लगत्तै मञ्चमा चढेको कलाकार टोलीले पहिलो कोशेलीका रुपमा हालसालै तयार भएको ब्याण्डको नयाँ गीत ‘भटभटे’ प्रस्तुत गर्‍यो।

पछिल्लो देश दौडाहाका क्रममा काठमाडौंभन्दा पहिले बुटवलका दर्शकमाझ पनि यो गीत प्रस्तुत गरिएको थियो। कन्सर्टकै पहिलो गीतका रुपमा भने राजधानीमै ‘भटभटे’ गाएर सुनाइएको हो।

नेपथ्यले दोश्रो प्रस्तुतिका रुपमा सर्वकालिक हिट गीत ‘भेडाको ऊनजस्तो’ प्रस्तुत गर्‍यो। अर्को पुरानो लोकप्रिय गीत ‘छेक्यो छेक्यो देउराली डाँडा’ गाउँदासम्म दर्शकको उत्साह बढिसकेको थियो।

कोभिड महामारीले संसार आक्रान्त पारेपछि थामिएको नेपथ्य काठमाडौंमा यसपालि ३ वर्षपछि प्रस्तुत भएको थियो। यसअघि भुकम्पले भत्किएको दोलखाको एउटा सरकारी विद्यालय निर्माणका लागि भृकुटीमण्डपमै सन् २०१९ मा ब्याण्डले कन्सर्ट गरेको थियो।

दर्शकहरूलाई स्वागत गरेपछि अमृत गुरुङले ‘फेरि तपाईंहरूलाई म मेरो भेगतिर लैजान्छु, रोदीघरहरुमा लैजान्छु’ भन्दै गाउन सुरु गरे–

‘खान्न म त लामपाते सुरती
लाउँ कि नलाउँ जुग जाने पिरती’

त्यसपछि पनि नेपथ्यका पुरानै गीत ‘चरि मर्‍यो’ र ‘जोमसोमे बजार’ले निरन्तरता पाएका थिए। दर्शकहरूलाई स्वदेश घुम्ने सल्लाह दिँदै अमृतले त्यसपछि धौलागिरितिर तयार पारिएको गीत सुनाएः

‘शिरफूल शिरैमा वनफूल वनैमा
हिउँको फूल धौलाशिरीमा’

‘हाम्रा गाउँघरहरु दिन प्रतिदिन तन्नेरीविहीन भई रित्तिँदै जान थालेका छन्,’ अमृतले गुनासो गरे, ‘उहिलेदेखि लाहुर जाने परम्परा एक वा अर्को रुपमा झनै बढ्दैछ।’

यस्तो अवस्थामा स्वदेशमै युवाहरूलाई रोजगारीको अवसर जुराइदिन उनले दर्शकदीर्घामा रहेका मुलुकका उच्चपदस्थ ब्यक्तित्वहरुलाई अनुरोध गरे।

त्यसपछि उनले लाहुरेहरुबाटै आएको गीत ‘नैनाताल’ सुनाएका थिए। प्रतिउत्तरमा दर्शकदीर्घाबाट ठूलो समर्थनसहितको आवाज आएको थियो।

कार्यक्रम अवधिभर गायक अमृतले मानवसेवा आश्रमको उद्देश्यबारे बोल्नुका साथै पछिल्लो समय ब्याण्डले मानवताका निम्ति चालेको कदमलाई अथ्र्याउने प्रयत्न पनि गरे। घर परिवारबाट निकालिएर वा अपहेलित भई सडकमा आश्रित बन्नपुगेका मुलुकभरका नागरिकको सेवामा खटिएको यो संस्थासँग मिलेरै नेपथ्यले यसपटकको देश दौडाहा गरेको हो।

यसै क्रममा ब्याण्डको अर्को सर्वकालीक हिट गीत ‘यो जिन्दगानी’ गाउँदै गर्दा मञ्चको पृष्ठ भागमा आश्रमकै आश्रित मानवहरुको मनछुने तस्बिरहरु देखाइएको थियो।

शनिबारको कन्सर्ट अघि बढ्दै जाँदा ‘गाउँ गाउँबाट उठ’को पालो आइपुग्यो। अमृतले मञ्चबाट यो गीत गाइरहँदा राजधानीका दर्शकले पनि गाएरै साथ दिइरहेको रोचक दृश्य देखिन्थ्यो।

धुनकै क्रममा गायकबाट आएको यो आव्हानले नृत्यरत दर्शकमा अझ उत्तेजना थपेको थियो।

कार्यक्रमको अन्त्यतिर सधैँजस्तै नेपथ्यको सर्वकालीक हिट गीतहरू ‘रेशम’ र ‘तालको पानी’ गाइएको थियो भने अन्तिममा ‘रातो र चन्द्रसूर्जे’ बाट बिट मारिएको थियो।

दर्शकदीर्घामा परिचित अनुहार टनाटन भरिएका थिए।

‘यसरी कन्सर्ट नहेरेको धेरै वर्ष भएको थियो,’ सिंगो परिवारसहित उपस्थित नेपाली कांग्रेसका महामन्त्री गगन थापा भनिरहेका थिए, ‘रमाइलो लाग्यो।’ उनको प्रतिक्रियामा रमाइरहेका छोरीहरूले पनि साथ दिएका थिए।

त्यसैगरी नेकपा (एमाले)का अध्यक्ष एवम् पूर्वप्रधानमन्त्री केपी ओलीको पनि स–परिवार उपस्थिति थियो। दर्शक दिर्घामा हरिवंश आचार्य, मदनकृष्ण श्रेष्ठ लगायतको उपस्थिति थियो।

कार्यक्रमकै बीच गायक अमृतले आफूलाई सघाउने साथीहरू ड्रमसेटमा ध्रूव लामा, किबोर्डमा सुरज थापा, बेसमा सुविन शाक्य, गितारमा निरज गुरुङ र मादलमा शान्ति रायमाझीको परिचय गराएका थिए।

संयोगवस कार्यक्रमको दिन अमृतको जन्मदिन परेको थियो। कार्यक्रम सुरु हुन पहिलेदेखि दर्शकदिर्घाबाट ह्याप्पी बर्थडेको सामूहिक शुभकामना गाइएको सुनिन्थो।