पाकिस्तानको हैदरावादकी १९ वर्षीया इकरा जीवानी र उत्तर प्रदेश प्रयागराजका २१ वर्षीय मुलायम सिंह यादव अनलाइन लुडो खेल्दा प्रेममा परे।
यो सन् २०२०को कुरा हो।
इकरा अवैध रुपमा नेपाल हुँदै भारत पुगेकी थिइन्। दुवैले विवाह गरेर बेंगलोरमा बस्न थाले।
तर पुलिसलाई इकराको पाकिस्तानसँग सम्बन्धित ह्वाट्सएप कलको बारेमा शंका लाग्यो। अनुसन्धानपछि उनलाई पाकिस्तान पठाइएको थियो।
मुलायमलाई प्रहरीले पक्राउ गरी जेल पठाएको छ।
तर मुलायम सिंह यादवको परिवारले अहिले सरकारलाई बुहारी फिर्ता गरी छोरालाई रिहा गर्न आग्रह गरिरहेको छ।
हामी तपाईंलाई इकरा र मुलायमको प्रेम, विवाह र विछोडको कथा सुनाउँछौं।
लुडो खेल्दा प्रेम
गत १९ फेब्रुअरीमा इकरा जीवानीलाई वाघा सीमाबाट पाकिस्तान पठाइएको थियो। उनको अपराध अवैध रुपमा भारत आउनु थियो। उनले प्रयागराजका मुलायम सिंह यादवसँग विवाह गरेकी थिइन् र उनीसँगै बेंगलोरमा बस्दै आएकी थिइन्।
लकडाउनपछि सन् ०२० मा समीर अन्सारी बनेर मुलायम सिंह यादवले इकरासँग अनलाइनमा लुडो खेल्न थालेका थिए।
इकरा १९ वर्षकी मात्र थिइन्। २१ वर्षीय मुलायम बेंगलोरको एउटा आइटी कम्पनीमा गार्डको रूपमा काम गर्थे। दुईबीचको सम्बन्ध गहिरो थियो। लामो दूरीको सम्बन्धमा थुप्रै कठिनाइ थिए। इकरामाथि परिवारबाट विवाहको दबाब पनि बढ्दै गयो। यसकाकारण मुलायमको सल्लाहमा इकरा पाकिस्तानबाट दुबई हुँदै नेपाल आइपुगेकी थिइन्।
उनीहरू दुवैले मन्दिरमा विवाह गरेर सन् ०२२ को सेप्टेम्बरमा नेपालबाट पटना हुँदै बेंगलोर पुगेको प्रहरीको अनुमान छ। जहाँ उनीहरू बेलन्दुर थाना इलाकामा बस्न थाले। प्रहरीका अनुसार मुलायम काम गर्थे र इकरा घरमै बस्थिन्। मुलायमले रिया यादवको नाममा बनेको इकराको ‘नक्कली’ आधार कार्ड पनि बनाएका थिए।
ह्वाट्सएप कुरा हुन्थ्यो
परिवारबाट टाढा बसेकी इकराले पाकिस्तानको हैदराबादमा आफ्नी आमासँग ह्वाट्सएप कलिङमा कुरा गर्न थालिन्।
बेंगलोरमा हुने जी२० कार्यक्रम र एयरो शोलाई ध्यानमा राख्दै बेङ्गलोर प्रहरीको गुप्तचर प्रणाली उच्च सतर्कतामा थियो र सोही निगरानीका क्रममा इकराले गरेको कल प्रहरीकहाँ आयो।
यसपछि प्रहरीले इकराको खोजी गर्न थाल्यो। उनलाई सोधपुछ गर्दा यो सीमा पारको प्रेमकथा मात्रै हो भन्ने थाहा भयो।
सोधपुछपछि, इकरालाई जनवरी २० मा विदेशी क्षेत्रीय दर्ता कार्यालय (एफआरआरओ) लाई सुम्पियो।
बेंगलोरको ह्वाइटफिल्डका डीसीपी एस गिरीशले बीबीसीलाई भने, ‘अहिलेसम्म उनीविरुद्ध अवैध रूपमा देशमा आएको बाहेक अरू कुनै अपराध दर्ता गरिएको छैन। तर अनुसन्धान जारी छ।’ अर्को प्रहरी स्रोतका अनुसार, ‘अवैध प्रवेश र जालसाजी बाहेक, यो एक प्रेम कथा पनि देखिन्छ।’
मुलायम सिंह यादवलाई जालसाजी, विदेशी कानून र आईपीसीका अन्य धाराहरू अन्तर्गत गिरफ्तार गरियो र न्यायिक हिरासतमा पठाइयो। हाल उनी बेंगलोर केन्द्रीय जेलमा छन्।
सरकारलाई अपिल
मुलायमकी आमा शान्तिदेवीले बीबीसी संवाददातालाई भनिन्, ‘हामी छोरा बुहारीलाई छुटकरा दिएको हेर्न चाहन्छौं। हामी उनीहरूलाई राम्रोसँग राख्छौं। चाहे तिनीहरू पाकिस्तानका हुन् वा मुस्लिम, हामी माया गर्नेछौं। जुनै जातपात भए पनि दुवैको विवाह भइसकेको छ, हाम्रो छोरालाई छोडिदिनुहोस्।’
मुलायमकी आमाले पाकिस्तान सरकारलाई भनिन्, ‘विवाह भइसकेको छ, दुवैलाई घर पठाइदिनुहोस्।’
मुलायमका दाइ जीतलाल यादवले बीबीसीलाई भने कि १९ जनवरीमा प्रहरीले कारबाही गरेपछि मात्र आफूलाई मुलायम र इकराको बारेमा थाहा भएको थियो।
जीतलाललाई लाग्थ्यो मुलायम आफ्नो साथीसँग बस्छन्। ‘उनी हाम्रो बुहारी हुन्, भारतकी बुहारी हुन्,’ जीतलालले भने।
इकरालाई पाकिस्तान पठाइएको मिडिया रिपोर्टबाट जितलाल यादवले थाहा पाएपछि उनी निराश भए।
जीतलाल भन्छन्, ‘अनुसन्धान भइसकेको छ। त्यसपछि इकरालाई पाकिस्तान पठाइएको छ। भाइलाई किन जेलमा राखिएको छ?’
बीबीसीले पाकिस्तानमा रहेका इकरा र उनको परिवारका सदस्यहरूलाई पनि सम्पर्क गर्ने प्रयास गरेको थियो तर हालसम्म सम्पर्क हुन सकेन।
यो सामग्री बीबीसी हिन्दीबाट अनुवाद गरिएको हो।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।
![सय दिने प्रगति विवरण सार्वजनिक गर्दै प्रधानमन्त्री केपी ओली [प्रत्यक्ष प्रसारण]](https://nepallive.net/uploads/posts/500X300/kllllllllll-1729675876.jpg)
![Nepal Live Samachar नेपाल लाइभ समाचार, भदौ १९ [भिडियाे]](https://nepallive.net/uploads/posts/500X300/samachar++-1725458095.jpg)
![प्रधानमन्त्रीसँग प्रश्नोत्तर [प्रत्यक्ष प्रशारण]](https://nepallive.net/uploads/posts/500X300/PMM-(1)-1718866650.jpg)
![भारत भ्रमणबारे प्रतिनिधि सभा बैठकमा जवाफ दिँदै प्रधानमन्त्री प्रचण्ड [प्रत्यक्ष प्रशारण]](https://nepallive.net/uploads/posts/500X300/prachanda-sansad-1710309847.jpg)
![Nepal Live Samachar नेपाल लाइभ समाचार, जेठ ३० [भिडियाे]](https://nepallive.net/uploads/posts/500X300/samachar++-copy.jpg-30-1718203418.jpg)
-1743930985.png)
-1743318385.png)
-1742289396-1743592964.jpg)
