प्रहरीले सार्वजनिक गरेपछि त्यसको विरोधमा प्रहरी कार्यालयमै लडिबुडी गर्दै चिनियाँ।
काठमाडौं- नेपालमा ठगी धन्दा चलाएको आरोपमा ९ चिनियाँ नागरिकसहित १९ जना पक्राउ परेका छन्। काठमाडौं उपत्यका अपराध अनुसन्धान कार्यालयको टोलीले उपत्यकाका विभिन्न ठाउँबाट उनीहरुलाई पक्राउ गरेको हो।
उपत्यकाका तीन ठाउँमा अफिस नै खडा गरेर अनलाइनमार्फत ठगी हुने गरेको पाइएपछि उनीहरुलाई पक्राउ गरिएको हो। ९ चिनियाँलाई सहयोग गरेको आरोपमा १० नेपाली नागरिक पनि पक्राउ परेका छन्।
पक्राउ पर्नेहरुमा दोलखाको शैलुङगेश्वर गाउँपालिका–३ का ४६ वर्षीय बुद्धिराज श्रेष्ठ, नुवाकोटको शिवपुरी गाउँपालिका–५ का २९ वर्षीय इन्द्र तामाङ, सोही गाउँपालिका ६ का ३६ वर्षीय राजकुमार लामा, काठमाडौं बुढानिलकण्ठ नगरपालिका–२ का २५ वर्षीय प्रयास भण्डारी, दोलखाको बैतेश्वर गाउँपालिका–२ का २६ वर्षीय अर्जुन श्रेष्ठ, रामेछापको उमाकुण्ड गाउँपालिका–४ कि ३४ वर्षीया रविना सुनुवार, लमजुङको दुधपोखरी गाउँपालिका–६ कि ३४ वर्षीया सुनिता गुरुङ, मकवानपुरको हेटौंडा उपमहानगरपालिका–८ कि २२ वर्षीया कृष्टिना भनिने जमुना गोले, उदयपुरको गाईघाट नगरपालिका–११ कि १९ वर्षीया अनिता मगर र गोरखाको चुमनुब्री गाउँपालिकाकी २० वर्षीया अनु गुरुङ छन्।
त्यसैगरी चिनियाँ नागरिकहरुमा इजे ३४४५२७४ नम्बरको राहदानी वाहक ३३ वर्षीय हाङ हुवानरुङ, इजे ६८४३५५२ नम्बरको राहदानी वाहक ३६ वर्षीय छु फुक्सिङ, इएफ ९६०२९८४ नम्बरको राहदानी वाहक ३४ वर्षीय लान छिङहुई, ४० वर्षीय सि गुओ ई, २९ वर्षीय सि सुहाङ डी, ३१ वर्षीय ग्वो मिङ, ३१ वर्षीय इहो पिङ भिङ, ३० वर्षीय छिन दुर लिन र इसी ०१६७२३६ नम्बरको राहदानी वाहक ३९ वर्षीय लि जिआन हाङ छन्।
उनीहरुबाट विभिन्न कम्पनीका ल्यापटप १२ थान, मोबाइल ७७ थान, सिमकार्ड ७४ थान, राहदानी ६ थान, ४ लाख १ हजार ८८० नेपाली रुपैयाँ, डेस्कटप २ थान र राउटर ४ थान बरामद भएको पत्रकार सम्मेलन गरेर जानकारी गराइएको छ।
सप्लार्यसदेखि कस्टमर र प्रहरी समेत आफैं बनेर ठगी
चिनियाँ नागरिकले अनलाइन सपिङ एप बनाउने, ह्वाट् एप ग्रुपमा नेपालीहरुलाई ज्वाइन गर्ने र अनलाइनमै सामान खरिददेखि बिक्रीसम्म गर्न सकिने र त्यसवापतको कमिसन समेत तत्काल प्राप्त हुने भन्दै ठगी गरेको पाइएको अपराध अनुसन्धान कार्यालयका एसएसपी तथा प्रमुख डाक्टर मनोज केसीले बताए।
एक पक्ष ठूलो होलसेल सप्लायर्स बन्ने, अर्को पक्षले होलसेल सप्लायर्सबाट सामान खरिद गर्ने र तेस्रो पक्ष ग्राहकलाई बिक्री गर्ने र त्यसवापत होलसेलबाट किनेर तेस्रो पक्ष ग्राहकलाई बिक्री गर्नेले राम्रो मुनाफा पाउन सक्ने विश्वासमा पारेर ठगी गर्दै आएको पाइएको छ।
चिनयाँलाई सघाएको आरोपमा पक्राउ परेका १० नेपाली नागरिक ।
चिनियाँ नागरिक आफैं सामानको होलसेल डिलरवाला भएको बन्ने र आफैं सामान खरिद गर्ने ग्राहक समेत भएको बन्ने गरेका थिए। नेपाली नागरिकलाई भने दोस्रो पक्ष होलसेल सप्लायर्सबाट सामान किन्ने र तेस्रो पक्ष ग्राहकलाई बेच्ने र त्यसवापत कमिसन पाउने भन्दै अनलाइनमा यी सबै चिजहरु देखिने सिस्टम समेत बनाइएको थियो।
नेपाली दोस्रो पक्ष बनेर सामान किन्न अनलाइनमार्फत रकम हाल्ने गरेका थिए। सुरुमा थोरै रकम किनेर बेच्नेहरुको खातामा चिनियाँ नागरिकले कमिसन वापतको रकम भनेर समेत पठाउने गरेका थिए। सुरुमा सामान किनेर बेचेपछि कमिसन आएकाले थप विश्वास हुँदै ठूलो रकमको सामान खरिद गर्न भन्दै रकम हालेपछि भने उनीहरुले ठगी गर्ने गरेको खुलेको छ।
सामान खरिदका लागि भन्दै ठूलो रकम हालेपछि अनलाइन सिस्टममै चिनियाँ नागरिक आफैं प्रहरी बनेर म्यासेज गर्ने गरेको पाइएको छ। ‘तपाईंहरु अवैध अनलाइन सपिङ गर्दै हुनुहुन्छ। हामी प्रहरी हौं तपाईंहरुको सबै विवरण पाइसकेका छौं’ भन्ने आसयको म्यासेज मोटो रकम आएपछि चिनियाँ नागरिक आफैंले पठाउने गरेका थिए।
यसरी प्रहरीले थाहा पायो भनेपछि ठगिएका पीडितले प्रहरी समक्ष खबर नगरुन् भन्ने आशय चिनियाँ नागरिकको रहेको देखिएको एसएसपी केसीले बताए।
यसरी चिनियाँले अनलाइन सपिङ एप बनाएर आफैं नक्कली होलसेल सप्लायर्स बन्ने, आफैं नक्कली ग्राहक बन्ने र आफैं नक्कली प्रहरी बनेर ठगी गर्ने गरेको पाइएको छ। अनलाइन सिस्टममा उनीहरुले सामान खरिद भएको विभिन्न देशहरु हुँदै जहाजमार्फत सामान आएको/गएको देखिने सिस्टम बनाएको, खरिदकर्ताले खरिद गरेको देखिनेसम्मका झुटा सूचनाहरु उनीहरुले उक्त एपमार्फत जानकारी गराउने गरेका थिए।
एकै व्यक्तिको ४८ लाख झ्वाँम
चिनियाँको जालोमा परेर एकै व्यक्तिले ४८ लाख रुपैयाँसम्म सकेको पाइएको छ। विभिन्न ४ वटा खातामार्फत भएको आदानप्रदानको विवरण अनुसार १ करोड ६४ लाख रुपैयाँ ठगी भएको पाइएको छ।
प्रहरी थप संकास्पद १० वटा बैंक खाताहरुको विवरण पनि मगाएर अनुसन्धान गर्दैछ। जसअनुसार १० करोड भन्दा बढी ठगी भएको हुनसक्ने आशंका गरिएको छ। यसरी छोटो समयमा उनीहरुले करोडौं रुपैयाँ नेपाली नागरिकहरुबाट ठगी गरेको पाइएको हो।
मासिक १० हजार नेपालीको खाता खरिद
ठगिएको रकमहरु जम्मा गर्नका लागि उनीहरुले नेपालीहरु खरिद गरेको पाइएको छ। मासिक १० हजार रुपैयाँ दिएर उनीहरुले नेपालीहरुको बैंक खाता प्रयोग गर्ने गरेको पाइएको छ।
राजकुमार लामा, बुद्धिराज गुरुङ, इन्द्र तामाङ र प्रयास भण्डारीहरुको एनआईसी एसिया बैंकको खाता प्रयोग गरेर उनीहरुले ठगी गरेको रकम आदानप्रदान गर्ने गरेको पाइएको छ।
मासिक १० हजार रुपैयाँ दिएपछि यी व्यक्तिहरुको मोबाइल बैंकिङ एपदेखि एटीएम कार्डसम्म चिनियाँ नागरिकले लिने गरेका थिए।
पछि रकम निकाल्ने भने उनीहरुले बैंक खातावालाहरुलाई नै प्रयोग गरेको पाइएको छ। उनीहरुले एटीएम तथा चेकमार्फत रकम निकालेर चिनियाँलाई बुझाउने गरेका थिए। त्यसवापत चिनियाँ नागरिकले उनीहरुलाई मासिक १० हजार रुपैयाँ दिने गरेको खुलेको हो।
नेपाली र चिनियाँ नागरिकलाई जोड्ने काम भने हाल पक्राउ परेका अर्जुन श्रेष्ठले गर्ने गरेको खुलेको छ। नेपालीलाई प्रयोग गर्ने र रकम निकालेर सम्बन्धित ठाउँसम्म पुर्याउने जिम्मा पाएका श्रेष्ठलाई चिनियाँले स्कुटर समेत किनेर दिएको खुलेको छ।
पक्राउ परेका नेपाली युवतीहरुले भने चिनियाँको निर्देशन अनुसार अनलाइन एप तथा ह्वाट्स एप ग्रुपमा होलसेलरदेखि ग्राहकसम्म बनेर च्याट गर्ने गरेको खुलेको छ।
५ चिनियाँको पासपोर्ट नै छैन, ३ महिनादेखि ओभर स्टे
पक्राउ परेका ९ चिनियाँ नागरिकमध्ये ५ जनाको पासपोर्ट समेत नभेटिएको प्रहरीले जनाएको छ। पासपोर्ट नभएकाहरुले भने विभिन्न बहाना बनाएर हराएको बताउने गरेका छन्।
अर्कोतफ भने उनीहरुमध्ये २ जना बाहेक ७ जना ओभर स्टेमा रहेको समेत पाइएको छ। एक महिनादेखि ३ महिनासम्म ओभर स्टेमा बसेर उनीहरुले आपराधिक धन्दा चलाएको पाइएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1751886908.jpg)
-1751885868.jpg)
-1751793737.png)
-1749826086.png)
