काठमाडौं- अर्थ मन्त्रालयको कर्मचारी बनेर ५० लाख रुपैयाँ ठगी गरेको पाइएको छ। मन्त्रालयकै कर्मचारी जस्तो देखिने गरी कर्मचारी पोशाक, परिचयपत्र समेत लगाएर आफू मन्त्रालयको कर्मचारी भएको परिचय दिँदै सर्वसाधारणलाई विश्वासमा पारेर लाखौं ठगी भएको पाइएको हो।
यसरी ठगी गर्ने गिरोहमा पाँच जना संलग्न भएको पाइएको छ। तीमध्ये दुई जनालाई पक्राउ गरेर प्रहरीले मुद्दा चलाएको छ। तीन जना भने फरार छन्।
पक्राउ पर्नेहरुमा काठमाडौंको तारेकेश्वर नगरपालिका–८ घर भएका ५१ वर्षीय रमेश थापा भनिने राजकुमार चापागाईं, रामेछापको मन्थली नगरपालिका–११ घर भई भक्तपुर, थिमी, बोडे बस्ने २९ वर्षीय सागर विश्वकर्मा छन्।
फरार हुनेहरुमा भने नुवाकोटको ककनी गाउँपालिका–२ घर भई मध्यपुर थिमी–९ बस्ने २३ वर्षीया रितिका सुनार, नुवाकोटको पन्चकन्या गाउँपालिका–२ घर भई ललितपुर बस्ने २१ वर्षीया रेजिना सुनार र सप्तरीको राजविराज नगरपालिका–१३ घर भएका ३४ वर्षीय रमेशप्रसाद साह छन्।
अर्थ मन्त्रालयको अधिकृत, विज्ञापन नखुलाई नियुक्ति भन्दै ठगी
पक्राउ परेकामध्ये चापागाईंले आफू अर्थ मन्त्रालयको अधिकृत भन्दै सर्वसाधारणलाई परिचय दिने गरेका थिए। विश्वास दिलाउन उनले मन्त्रालयको परिचयपत्र समेत देखाएको पीडितहरुले बताएका छन्। उनले विभिन्न सरकारी कार्यालयहरुमा करारमा कर्मचारी चाहिएको र त्यसका लागि विज्ञापन नखुलाई आफूले भर्ना गर्न सक्ने भन्दै विश्वासमा पारेका थिए।
सुरुमा करारमा भर्ना र पछि स्वतः स्थायी हुने भन्दै प्रलोभनमा पारेर त्यसका लागि उनले रकम उठाउने गरेको पाइएको छ। चापागाईंको विश्वासमा परेर केही व्यक्तिहरुले उनलाई ५० लाख रुपैयाँसमेत बुझाएका थिए।
पैसा बुझेपछि परीक्षा तथा अन्तर्वार्ता दिनु नपर्ने गरी च्यानल मिलाउँदैछु भनेर झुलाउने गरेका थिए। पछि च्यानल मिलिसक्यो अब त्यसका लागि थप शुल्क लाग्ने भयो भन्दै रकम असुल्न थालेका थिए।
यति मात्रै होइन, यो गिरोहले विश्वासमा पार्नका लागि हाल पक्राउ परेका सागर विश्वकर्माले आफ्नै साली रेजिना सुनार अर्थ मन्त्रालयको नासुमा र श्रीमती रितिका सुनार अर्थ मन्त्रालयकै खरिदारमा नियुक्तसमेत भइसकेको भन्दै उनीहरुलाई कर्मचारीको पोशाक लगाउने लगाएर त्यसको फोटो र परिचपपत्र समेत देखाएको पीडितहरुले बताएका छन्।
कर्मचारीको पोशाक, परिचयपत्र र एक महिनाको तलब आएको विवरण समेत देखाएपछि सर्वसाधारणले विश्वास गरेर यो गिरोहलाई पैसा बुझाएको अनुसन्धानबाट खुलेको प्रहरीले जनाएको छ।
पैसा असुलेपछि रमेशप्रसाद साहलाई कृषि तथा पशुपंक्षी विकास मन्त्रालयको सहायक पाँचौं पदमा नियुक्त भएको भन्दै परिचयपत्र समेत बनाएर दिएको, पुनिताकुमारी यादव, कृष्णनारायण साहलाई शिक्षा मन्त्रालयमा नियुक्ति भएको भन्दै परिचयपत्र बनाएर दिएको देखिएको छ।
त्यस्तै, प्रकाश कार्कीलाई डोली शिक्षण अस्पतालमा, नानुदेवी रायमाझीलाई सिंहदरबारभित्र कार्यालय सहायोगीमा, अन्जना हुमागाईंलाई नासुमा काम पाउने गरी मिलाएको भन्दै परिचयपत्र समेत बनाएर दिएको खुलेको छ।
उनीहरुमध्ये रमेशप्रसाद साहलाई तपाईंले काम गर्ने कार्यालय यही हो भन्दै हेटौंडास्थित सरकारी कार्यालयमा लगेर घुमाएको समेत पाइएको छ। त्यसपछि उनीहरुले सागर विश्वकर्माको ग्लोबल आईएमई बैंकको खाता नम्बरमा ४९ लाख ८० हजार रकमसमेत जम्मा गरेको अनुसन्धानबाट खुलेको छ।
चार पटक जेल जाँदा पनि खुलेन हुमागाईंको चेत
ठगीका मुख्य योजनाकार भनिएका चापागाईं पटकपटक जेल बसेर छुटेका व्यक्ति रहेको खुलेको छ। सुरुमा उनी २०६८ सालमा ठगी मुद्दामा पक्राउ परेका थिए। त्यसपछि ३ वर्षसम्म ठगी मुद्दामा कैद बस्दै उनी २०७१ सालमा कैद मुक्त भएका थिए।
२०७२ सालमा पुन: उनी ज्यान मार्ने उद्योगको आरोपमा पक्राउ परेका व्यक्ति रहेको खुलेको छ। त्यतिबेला उनी ४ वर्ष जेल बस्दै २०७६ माघमा रिहा भएका थिए। त्यसपछि पनि उनी पुनः ठगी मुद्दामा पक्राउ परेर जेल गएको खुलेको छ। मुना पाण्डेले ठगी सम्बन्धीको कसुरमा उजुरी दिएपछि उनी २०७७ सालमा पक्राउ परेका थिए।
२०७७ जेठ २७ गते जिल्ला अदालत काठमाडौंले पुर्पक्षका लागि कारागार पठाउने आदेश दिएपछि उनी कारागार चलान भएका थिए।
उनी कैद भुक्तान गरेर रिहा भएको तीन महिना अहिले फेरि ठगी मुद्दामा पक्राउ परेका हुन्। पटकपटक जेल चालन हुँदा चेत नखुलेका हुमागाईंले ललितपुरमा ओमकृष्ण ज्वेलर्स सुनचाँदी पसलका सञ्चालक सागर विश्वकर्माकोमा सुनको औंठी राखेर रकम निकालेका थिए।
यसअघि पक्राउ पर्दा बरामद भएका डीएसपीका परिचयपत्र सहितका कागजात ।
त्यसपछि उनीहरुबीच चिनजान भएको थियो। पछि उनैलाई प्रयोग गरेर ठगी गरेको देखिएको छ। उनी यसअघि सशस्त्रको डीएसपी भन्दै ठगी गरेको पाइएपछि पक्राउ परेका थिए। उनीबाट डीएसपीको परिचयपत्र समेत प्रहरीले बरामद गरेको थियो।
ठगी र लिखतसम्बन्धी कसुरको मुद्दा
पक्राउ परेकाहरुलाई ठगी र लिखतसम्बन्धी कसुरको मुद्दा चलाइएको छ। उनीहरुले ठग्नका लागि विश्वासमा पार्न विभिन्न मन्त्रालयका नक्कली कागजात बनाउने, स्ट्याम्प तयार पार्ने, परिचयपत्र समेत बनाउने गरेको पाइएकाले लिखतसम्बन्धीको कसुरमा मुद्दा चलाउनुपर्ने भन्दै चैत २१ गते जिल्ला अदालत काठमाडौंमा मुद्दा दर्ता गरिएको छ।
त्यस्तै ५० लाख ठगी गरेकाले ठगीको कसुरमा पनि मुद्दा चलाइएको छ। यस मुद्दामा प्रतिवादी बनाइएकी रितिका सुनारसमेत यही गिरोहबाट पीडित भएकोसमेत अनुसन्धानबाट खुलेको छ। विश्वासमा पार्न रितिकालाई कर्मचारीको पोशाक लगाउन लगाउनेदेखि परिचयपत्र समेत भिर्न लगाएर यो गिरोहले फोटो खिचाएको थियो। त्यही फोटो अन्य व्यक्तिलाई देखाएर विश्वासमा पार्ने काम भएको भन्दै उनीविरुद्ध पनि मुद्दा चलाइएको छ।
तर, उनी स्वयं यो गिरोहबाट ठगिएकी छिन्। उनले पनि जागिरका लागि भनेर १२ लाख रुपैयाँ बुझाइएको पाइएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1751886908.jpg)
-1751885868.jpg)
-1751793737.png)
-1749826086.png)
