प्रतिकात्मक तस्बिर
काठमाडौं– नेपाली सेनाको साइबर स्पेस (बेवसाइट)मा साइबर हमला गरेको आरोपमा पक्राउ परेका युवकले आफ्नो योजना अमेरिकी सेनामाथि साइबर हमला गर्ने रहेको बताएका छन्।
नेपाली सेनाको साइबर स्पेसमा साइबर हमला गरेको आरोपमा प्रहरीको केन्द्रीय साइबर ब्यूरोले चैत २४ गते स्याङ्जाको वालिङ नगरपालिका–१० घर भएका २१ वर्षीय सागर ढकाललाई पक्राउ गरेको थियो।
पक्राउ पर्दा उनको साथबाट प्रहरीले एउटा मोबाइल र एउटा ल्यापट बरामद गरेको थियो।
आफ्नो साइबर स्पेसमा हमला गरी साइट ह्याक गरेको देखिएपछि सेनाले साइबर ब्यूरोमा उजुरी दिएको थियो। सेनाको साइबर स्पेसमा ‘ब्रट फोर्स स्क्यानिङ’, ‘एचटीटीपी अन्नोन’ जस्ता ‘हमला’हरु भएका थिए। साइबर हमला भएपछि त्यससँग सम्बन्धित प्रमाणको एउटा सीडीसहित सैनिक प्रहरी गण जंगी अड्डा भद्रकालीले अनुसन्धान गरी कारबाही गर्न भन्दै नेपाल प्रहरीको साइबर ब्यूरोलाई गत चैत १५ गते पत्राचार गरेको थियो।
त्यसपछि साइबर ब्यूरोको टोलीले नेपाली सेनामाथि साइबर हमला गर्ने युवक ढकाल रहेको पत्ता लगाउँदै पोखराबाट पक्राउ गरेको थियो। पक्राउ परेका ढकाल पश्चिमाञ्चल इन्जिनियरिङ अध्ययन संस्थानमा अध्ययन गर्ने विद्यार्थी रहेको खुलेको थियो।
उनै ढकालले आफ्नो मुख्य टार्गेट नेपाली सेना नभइ अमेरिकी सेना रहेको भन्दै बयान दिएका हुन्। सेनाको साइट ह्याक गरेर त्यसको कमीकमजोरी पेस गरिएको अवस्थामा ठूलो पुरस्कार पाउने भन्ने जानकारी आएपछि अमेरिकन सेनामाथि आफूले साइबर हमलाको प्रयास समेत गरेको युवक ढकालले बताएका छन्।
साइबर ब्यूरो स्रोतका अनुसार अध्ययनको क्रममा विभिन्न वेबसाइट, न्यूज पोर्टलहरुको अध्ययन गर्दा अमेरिकामा ‘ह्याक द पेन्टागन’ भन्ने विषयमा ह्याकिङ कम्पिटिसन हुने गरेको आफूले जानकारी पाएको ढकालको भनाइ छ।
उक्त कम्पिटिसनमा विभिन्न देशका चर्चित वेवसाइटहरु कानुनी रुपमा नै ह्याक गरी त्यसको कमीकमजोरी देखाइ दिएमा पुरस्कार पाउने व्यवस्था उल्लेख गरिएको थियो। त्यही प्रतियोगितामा सहभागी हुन सकिन्छ कि भनेर आफूले अमेरिकन सेनाकै साइट ह्याक गर्ने प्रयास गरेको ढकालले बयान दिएका छन्।
अमेरिकन सेनाको साइट ह्याक गर्दा धेरै पुरस्कार पाइने भएकाले ह्याक गर्ने प्रयास गरे पनि असफल भएको ढकालको भनाइ छ। अमेरिकन सेनाको साइट ह्याक गर्ने योजना असफल भएपछि आफूले नेपाली सेनाको ‘साइबर सेक्युरिटीको अवस्था’बारे बुझ्न साइट ह्याक गरेको ढकालको भनाइ छ।
नेपाली सेनाको साइट ह्याक गर्ने उद्देश्यसहित फ्रेबुअरी २३ मा बिहान ९ बजेर ४१ मिनेट र १० बजेर २० मिनेटको समयमा ढकालले सेनाको साइटमा साइबर आक्रमण गरेका थिए।
यससम्बन्धमा साइबर ब्यूरोको टोलीले सेनाको प्राविधिक टोलीसँग पनि सोधपुछ गरेको थियो। प्राविधिक सेनानी माधव कार्कीले पनि साइबर स्पेसमा हमला भएको भन्दै कागज गराएका थिए। कार्की नेपाली सेनाको सूचना प्रविधि निर्देशनालय अन्तर्गतको सिस्टम तथा नेटवर्क शाखा प्रमुखको रुपमा कार्यरत छन्।
साइबर सेक्युरेटीको दैनिक सुरक्षाको रिपोर्ट दिने क्रममा सेनाको वेबसाइटमा अनधिकृत कार्य भएको जानकारी पाएपछि सेनानी कार्कीले आफ्ना कमाण्डरलाई जानकारी गराएका थिए।
पक्राउ परेका ढकालविरुद्ध विद्युतीय कारोबार ऐन, २०६३ अन्तर्गतको कसुरमा जिल्ला अदालत काठमाडौंमा मुद्दा दर्ता गरिएको छ। ऐनको दफा ४५ बमोजिमको कसुर गरेको भन्दै बरामद सामान जफत र सोही अनुसारको सजाय मागदाबी गरिएको छ।
दफा ४५ मा कम्युटर सामाग्रीमा अनधिकृत पहुँच गर्न नहुने उल्लेख छ। यस्तो कसुर गर्नेलाई २ लाख रुपैयाँसम्म जरिवाना वा तीन वर्षसम्म कैद वा दुबै सजाय हुने व्यवस्था छ।
जिल्ला अदालत काठमाडौंले उनीविरुद्ध दायर भएको मुद्दामा थुनछेक आदेश सुनाउँदै धरौटीमा रिहा गर्न भनेको छ।
जिल्ला अदालत काठमाडौंका न्यायाधीश चन्द्रप्रकाश तिवारीको आइतबारको इजलासले धरौटीमा रिहा गर्न आदेश दिएको हो। अदालतको आदेशपछि ढकाल १ लाख तिरेर रिहा भएको प्रहरीको केन्द्रीय साइबर ब्यूरोका प्रवक्ता पशुपति रायले जानकारी दिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1710220882.jpg)
-1751793737.png)
-1749826086.png)
