काठमाडौं– दर्ज्यानी चिह्न (फुली) लगाएको एक साता बित्न लाग्दा समेत प्रहरी नायव महानिरीक्षक (डीआईजी)को पदस्थापन हुन सकेको छैन। पदस्थापन हुन नसक्दा प्रहरी बरिष्ठ उपरीक्षक (एसएसपी) बाट डीआईजीमा बढुवा भएका १३ अधिकृत एक सातासम्म जिम्मेवार विहीन बनेका छन्।
बढुवा सिफारिस समितिले गत चैत २९ गते १३ एसएसपीलाई डीआईजीमा बढुवाका लागि सिफारिस गरेको थियो। मन्त्रीस्तरीय निर्णयबाट उक्त सिफारिस सदर भएपछि वैशाख ६ गते बढुवा भएका १३ प्रहरी अधिकृतले डीआईजीको दर्ज्यानी चिह्न लगाएका थिए।
प्रहरी प्रधान कार्यालयमा दर्ज्यानी चिह्न प्रदान गर्दै प्रहरी महानिरीक्षक (आईजी) वसन्तबहादुर कुँवरले व्यवसायिक भएर जिम्मेवारी पूरा गर्न भन्दै निर्देशन समेत दिएका थिए।
बढुवा भएर फुली लगाइदिँदै व्यवसायिक भएर काम गर्न निर्देशन दिएको एक साता बित्न लाग्दा पनि डीआईजीहरुको पदस्थापन भने अहिलेसम्म हुन सकेको छैन। सामान्यतया प्रहरीमा बढुवा भएर दर्ज्यानी चिह्न लगाएकै दिन पदस्थापन समेत गरिँदै आइएको थियो। अर्थात् एकै दिन दर्ज्यानी चिह्न र पदस्थापन हुने चलन थियो। तर यसपटक भने १३ डीआईजी बढुवा भएर फुली लगाएको एक साता बित्न लाग्दा पनि पदस्थापन हुन सकेको छैन।
प्रहरी प्रधान कार्यालय भने डीआईजीको पदस्थापन तथा सरुवाको जिम्मेवारी आफ्नो नभइ गृह मन्त्रालयको भन्दै पन्छिने गरेको छ। प्रहरी नियमावलीअनुसार डीआईजीको पदस्थापन तथा सरुवा गृहमन्त्रीको मन्त्रीयस्तरीय निर्णयबाट हुने गर्छ।
बढुवा भएका प्रहरी अधिकारीहरु आकर्षक ठाउँमा जान शक्ति केन्द्रमार्फत् लबिइङमा लाग्दा पदस्थापन हुन नसकेको विषय ‘ओपन सेक्रेट’ नै छ । ‘बढुवा भएकाहरु सबैलाई प्रदेश चाहिएको छ । त्यो पनि रोजेर। प्रदेश इञ्चार्ज तथा आकर्षक पोस्टिङ जान दबाब दिएकाले पदस्थापन हुन नसकेको हो,’ प्रहरी प्रधान कार्यालयका एक उच्च अधिकारी भन्छन्।
डीआईजीको नेतृत्वमा चल्नुपर्ने कार्यालयहरु अहिले एसपीको भरमा चल्नुपर्ने अवस्था छ। तर, बढुवा भएर फुली लगाइसकेका डीआईजीले जिम्मेवारी पाएका छैनन्। डीआईजीले कमाण्ड गर्ने कार्यालयमा एसपीको भरमा चलेको एक साता बित्न लाग्दा पनि प्रहरी प्रधान कार्यालयले पदस्थापनका लागि तदारुकता नदेखाएको आरोप लागेको छ ।
प्रहरी महानिरीक्षक भएपछि पहिलो सम्बोधनमै कुँवरले आन्तरिक सुद्धीकरण गर्ने, बाहिर चलखेल र भनसुन तथा दबाब दिएमा कारबाहीसम्म गर्ने चेतावनी दिएका थिए । तर डीआईजीहरुको चलखेलकै कारण अहिलेसम्म पदस्थापन हुन नसक्दा आईजी कुँवरको उक्त भनाइ प्रभावकारी भएको देखिएन।
एआईजीमा पनि भएको थियो उस्तै ताल
डीआईजीमा मात्रै होइन, यसअघि अतिरिक्त महानिरीक्षक (एआईजी)को पदस्थापनमा पनि यस्तै भएको थियो। बढुवा भएको एक साता बितिसक्दा समेत एआईजीको पदस्थापन हुन सकेको थिएन। सिफारिस पछि बढुवाको निर्णय गर्दा नै पदस्थापन समेत तोकिने गरिए पनि एआईजीको पदस्थापन पनि १ सातासम्म हुन सकेको थिएन।
गत चैत ८ गते एआईजीको दर्ज्यानी चिह्न लगाएका ५ जनामध्ये चैत १० गते वसन्त कुँवर आईजीमा बढुवा भएका थिए। तर बाँकी चार एआईजीहरु श्यामलाल ज्ञवाली, दीपक थापा, टेकप्रसाद राई र किरण बज्राचार्यको एक सातापछि चैत १५ गते मात्रै पदस्थापन भएको थियो।
एक सातासम्म उनीहरु जिम्मेवार विहीन भएका थिए। त्यतिबेला उनीहरु प्रहरी प्रधान कार्यालयको प्रशासन विभागमा हाजिर गर्दै दिन कटाउँथे। अहिले फेरि डीआईजीको उस्तै नियति दोहोरिएको छ।
सरुवामा ‘हाइज्याक’, बढुवाविरुद्ध उजुरी
अझ कतिसम्म भने अघिल्लो दिनसम्म प्रदेश प्रमुखको कमाण्ड सम्हाल्न भनेर ठिक्क परेका व्यक्तिको सरुवा नै ‘हाइज्याक’ समेत भएको थियो।
मधेस प्रदेश प्रहरीका तत्कालीन प्रमुख वसन्तबहादुर कुँवर एआईजी हुँदै आईजी बनेपछि त्यहाँको कमाण्ड खाली थियो। मधेस प्रदेश प्रमुखकको जिम्मेवारी डीआईजी किरण राणाले पाएकी थिइन्। संगठन प्रमुख आईजी कुँवरले राणालाई निर्देशन समेत दिँदै चुनौतीपूर्ण प्रदेश २ को राम्रो कमाण्ड गर्न निर्देशन दिएका थिए।
डीआईजी राणा आईजीको निर्देशनपछि मधेस जाने तयारीमा थिइन्। तर रातारात डीआईजीको सरुवा एसएसपीले नै ‘हाइज्याक’ गरिदिएका थिए। डीआईजीकै सरुवा हाइज्याक गरेर डीआईजी बस्ने ठाउँमा पुगेका शक्तिशाली एसएसपी हुन् जनक भट्टराई।
डीआईजी प्रमुख हुने ठाउँमा डीआईजीकै सरुवा गरेर एसएसपी प्रमुख बनेर गएका शक्तिशाली भट्टराई भने प्रहरीमा सधैंजसो इन्चार्ज पाइरहने प्रहरी अधिकृत हुन्। उनै एसएसपी भट्टराई डीआईजी बढुवा हुँदा पनि अहिले अग्रस्थानमै छन्।
अहिले पनि भट्टराईजस्तै प्रहरी अधिकारीहरुले आकर्षक पोस्टिङका लागि दवाब दिइरहेकाले १३ डीआईजीको पदस्थापन हुन सकेको छैन।
अर्कोतर्फ अहिले पदस्थापन हुन नसकेका टोलीहरुको बढुवा पनि विवाररहित भने हुन सकेन। बढुवा सिफारिसविरुद्ध एसएसपीद्वय चक्रबहादुर सिंह र अनुरागकुमार द्विवेद्वीले उजुरी नै हालेका थिए।
लोकसेवा आयोगको उजुरी सुन्ने समितिमा बढुवा सिफारिसविरुद्ध उजुरी हालिएको थियो। यद्यपि उजुरी सुन्ने समितिलाई अंक जोड्ने बाहेकको जिम्मेवारी भने दिइएको छैन। उजुरी सुन्ने समितिले पनि सिफारिस समितिकै निर्णयलाई सदर गरेपछि बढुवा भएकाहरुले दर्ज्यानी चिह्न लगाएका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1751886908.jpg)
-1751885868.jpg)
-1751793737.png)
-1749826086.png)
