काठमाडौँ– ‘संवैधानिक परिषद् (काम, कर्तव्य, अधिकार र कार्यविधि) सम्बन्धी (पहिलो संशोधन) विधेयक २०७९’ संशोधन भएको छ।
प्रतिनिधिसभाको बुधबारको बैठकले विधेयकमाथि राष्ट्रियसभाबाट भएको संशोधनमाथि विचार गरियोस् भन्ने प्रस्ताव बहुमतले पारित भएको हो।
मंगलबार विधेयकमाथि राष्ट्रियसभाबाट प्राप्त प्रतिवेदनमाथि भएको छलफलमा सांसदहरूले भाग लिएका थिए। बुधबार सांसदहरूले छलफलका क्रममा उठाएका प्रश्नको जवाफ प्रधानमन्त्री केपी शर्मा ओलीको तर्फबाट रक्षामन्त्री मानबहादुर राईले दिएपछि सभामुख देवराज घिमिरेले निर्णयार्थ प्रस्तुत गरेका थिए। निर्णयार्थ प्रस्तुत हुँदा विधेयक बहुमतले पारित भएको हो।
अव विधेयकको संशोधन सभामुख घिमिरेले प्रमाणित गरी प्रमाणीकरणका लागि राष्ट्रपति रामचन्द्र पौडेलसमक्ष पठाउनेछन्। राष्ट्रपति पौडेलले प्रमाणीकरण गरेपछि संशोधन राजपत्रमा प्रकाशित हुन्छ। त्यसपछि कानुन बन्ने कानुनी प्रावधान छ।
विधेयकमाथिको संशोधन तत्कालीन प्रधानमन्त्री पुष्पकमल दाहाल ‘प्रचण्डले ०७९ फागुन १२ गते सङ्घीय संसद् सचिवालयमा दर्ता गरेका थिए। ०८० वैशाख १५ गते दफावार छलफलका लागि राज्य व्यवस्था तथा सुशासन समितिमा पठाइएको विधेयकमाथिको संशोधनमा समितिले सदनमा ०८१ जेठ १७ गते बुझाएको थियो।
संशोधनलाई ०८१ चैत १८ गते प्रतिनिधिसभाबाट पारित गरेर राष्ट्रियसभामा पठाइएको थियो। राष्ट्रियसभाले पारित गरेर संशोधन ०८२ जेठ ३० गते फिर्ता पठाएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1752043710.jpg)
-1749826086.png)
