काठमाडौं- शंकर ग्रुप तथा जगदम्बा स्टिलका सञ्चालक सुलभ अग्रवाल पक्राउ परेका छन्। उनै अग्रवालको कम्पनीले नेपाल एयरलाइन्सको चार्टर जहाजमा आफ्नोमात्रै मेडिकल उपकरण र औषधी चीनको गोन्जावबाट ल्याएका थिए।
२२ टन क्षमताको वाइडबडी जहाजमा आफ्नोमात्रै ७ टन सामान ल्याएर अन्य व्यवसायीको सामान नल्याउन शंकर ग्रुपले जहाज चार्टर कम्पनीसँग सेटिङ गरेको थियो।
यसरी ल्याइएको सामान शंकर ग्रुपले आइतबारदेखि कालोबजारीमा बिक्री गरेको हल्ला सुरु भएको थियो। महानगरीय प्रहरी अपराध महाशाखाले अग्रवाललाई पाँच हजार बजार मूल्यको ज्वरो नाप्ने थर्मल गन १५ हजार रुपैंयामा बिक्री गरेको आरोपमा नक्सालबाट पक्राउ गरेको हो। उनको गाडीबाट ६७ वटा थर्मल गनसमेत बरामद भएको महाशाखाले जनाएको छ।
कुटनीतिक नियोगको २०९ एचसिसी १ नम्बरको गाडीमा थर्मल गन बोकेर महंगोमा बेच्दै हिँडेको अवस्थामा पक्राउ परेको प्रहरीले जनाएको हो।
उनी मेडिकल सामग्री विक्रेता होइनन्। तर केही समयअघि शंकर ग्रुपले चीनबाट मेडिकल उपकरण र औषधी ल्याएको थियो।
यसरी ल्याएको थियो शंकर ग्रुपले सेटिङमा आफ्नो मात्रै मेडिकल सामानः
चैत २१ गते अप्रिल ३ बिहान तीन बजेतिर त्रिभुवन अन्तर्राष्ट्रिय विमानस्थलमा नेपाल एयरलाइन्सको वाइडबडी जहाज ल्यान्ड भएको थियो। वाइडबडी जहाजले चीनको गोन्जाउबाट नेपाल उडान भरेको थियो। नेपाली समयअनुसार बेलुका ९ बजेर ४५ मिनेटमा उक्त जहाजले गोन्जाउबाट उडान भरेको थियो।
तर, २२ टन क्षमताको जहाज जम्मा ७ दशमलव ५ टनमात्रै सामान बोकेर नेपाल आएको थियो। वाइडबडी जहाजको क्षमता ४० टन हो। तर, सिट नझिकेको अवस्थामा २२ टनसम्म सामान बोक्न सक्छ।
उक्त जहाज चार्टर भने फ्ल्यास फ्राइट लजिस्टिकले गरेको थियो। उक्त कम्पनीले जहाज चार्टर गर्दै एक दर्जनभन्दा बढी व्यवसायीको सामान ल्याइदिने प्रतिबद्धता गरेको थियो। तर, जहाज बिहान काठमाडौं आइपुग्दा अधिकांश व्यवसायीको सामान नै आएन। साथै नेपाल चेम्बर अफ कमर्सले सहयोगको रुपमा बाँड्न भन्दै चीनबाट ल्याउन लागेको सामान पनि आएन। सामान नआउनुमा शंकर ग्रुपको नै सेटिङ थियो।
चेम्बरका अध्यक्ष राजेशकाजी श्रेष्ठले समेत वितरण गर्न भन्दै संस्थाले ल्याउन लागेको सामान ३ सय केजीमात्रै नल्याइदिएको बताएका थिए। त्यतिमात्रै नभई १ हजार २ सय केजी सामान ल्याइदिने र प्रतिकेजी १० डलर भाडा लाग्ने भनेर प्रतिबद्धता दिएको सनराइज सर्जिकल हाउसको समेत सामान आएको थिएन।
सामान नआएपछि हाउसले किन सामान आएन? भनेर सोध्दा ‘अफ लोड’ (लोड धेरै) भएका कारण सामान ल्याउन नसकेको जहाज चार्टर कम्पनीले जानकारी गराएको छ। तर, चार्टर जहाजमा आफ्नोमात्रै सामान ल्याउने गरी शंकर ग्रुपले सेटिङ गरिसकेको थियो।
जहाज चार्टर कम्पनीकी प्रतिनिधि नम्रता श्रेष्ठले जहाजमा ७ दशमल ५ टनमात्रै सामान आएको स्वीकार गरेकी थिइन्। तर, उनले शंकर ग्रुपको सेटिङको बचाउमा‚ जहाज गोन्जाउमा ल्यान्ड हुनासाथ विमानस्थलको भन्सारले सामानको स्पेसिफिकेसन क्लिएरेन्स हुनुपर्छ भन्दै चेक चाँज थालेपनि सामान छुटेको बताएकी थिइन्।
जहाजमा बसन्त चौधरीले सरकारलाई सहयोग गर्ने भनेको औषधी भने आएको छ। जहाजमा आएको सामानमध्ये शंकर ग्रुपको मात्रै ७ टन सामान थियो। शंकर ग्रुपको सेटिङमा अन्य व्यवसायीको सामान नेपाल आउन पाएको थिएन। चीनमा रहेका विभिन्न संस्थाले सहयोग स्वरुप दिएको दुई टन सामान पनि आउन सकेन। शंकर ग्रुपले फ्ल्यास फ्राइटको सेटिङमा अरुका सामान ल्याउन दिएको थिएन। नेपालका नीजी अस्पतालमा पनि कोरोना उपचार सामाग्रीको धेरै माग छ। अरुको सामान रोकेर आफ्नो सामान महंगोमा बेच्ने उसको सेटिङ रहेको बुझिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1752043710.jpg)
-1749826086.png)
