दार्चुलामा पहिरोले पुरिएर दुई जना बेपत्ता, दुईको उद्धार

समाचार

ललित बोहरा मंगलबार, साउन ६, २०७७ १०:१२

डडेलधुरा-दार्चुलामा पहिरोले पुरिएर दुई जना बेपत्ता भएका छन् भने दुई जनाको उद्धार गरिएको छ। जिल्लाको मालिकार्जुन गाउँपालिका ८ शंकरपुरमा घर माथिबाट पहिरो खसेर घाईते भएका दुई जनाको उद्धार गरिएको छ भने दुई जना अझै बेपत्ता छन्।

पहिरोमा पुरिएका ३५ वर्षीया लक्ष्मी ढोली र ९ वर्षीय छोरा शुवम परियारको जिवितै उद्धार गरिएको प्रहरीले जनाएको छ।

घरभित्रै पहिरोमा पुरिएकी लक्ष्मीको छोरी सोनिया घरभित्रै सकुशल रहेको वडा सदस्य केशवसिह धामीले जानकारी दिए। 'बच्चा रोइरहेको आवाज आइरहेको छ,' उनले भने, 'उद्धारका लागि स्थानीय र प्रहरी लागेका छन्।'

घाईते लक्ष्मीको उपचारका लागि हेलिकप्टरको व्यवस्था गर्ने तयारी भइरहेको छ।

दिदी भेट्न आएका लेकम गाउँपालिका घर भएका मिलन दमाई र अर्जुन दमाईको अवस्था भने अज्ञात रहेको धामीले बताए।

वडा कार्यालयको शौचालय र फिल्ड भत्किएर वडा कार्यालय तल रहेको घर भत्किएको हो । घटना आज बिहान ३ बजेतिर भएकाे जिल्ला प्रहरी कार्यालय दार्चुलाका सूचना अधिकारी सुरेन्द्रप्रसाद जोशीले बताएका छन्। साेमबारमात्र दार्चुलामा पहिरोले दुई जनाको मृत्यु भएको थियो।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।