काठमाडौं– साउन २९ गते दिउँसो २ बजे। ‘मोबाइल पसलमा काम छ, एकैछिन पुगेर आइहाल्छु है,’ बाबु कालीचरण यादवसँग छोरा गुणराजले भने। बाबुलाई त्यति कुरा सुनाएर तत्कालै गुणराज घरबाट बाहिरिए।
सुनसरीको भोक्राहा गाउँपालिका–७ का २२ वर्षीय गुणराजको घरबाट नजिकै मोबाइल पसल छ। ‘केही काम पर्यो होला। पुगेर आइहाल्छ’ बाबु कालीचरणले योभन्दा बढी केही सोचेनन्।
तर छोरोका पर्खाइमा बसेका कालीचरणका आँखा टट्याए। रात छिप्पिँदा समेत गुणराज घर फर्किएनन्। मोबाइलमा पटकपटक सम्पर्क गर्न खोज्दा सम्पर्क हुन सकेन।
छोराको पर्खाइमै कालीचरणका दुई दिनरात बिते। शुभ समाचारको पखाईमा बसेका कालिचरणको कानले छोरो हराएको तेस्रो दिन अर्थात् साउन ३१ गते जे सुन्न नपरोस् भनेको त्यही सुन्नु पर्यो। हात खुट्टा बाँधेर बोरामा प्याक गरेर खोलामा फ्याँकिएको अवस्थामा गुणराजको शव फेला पर्यो।
000
त्यसदिन गुणराज मोबाइल पसलमा काम छ भनेर साथी शिवकुमार मेहतासँग सुनसरी सदरमुकाम इनरुवा बजार गएका थिए। बजार गएका उनीहरुले साँझ ७ बजेसम्म पारिजाति स्कुल नजिक बसेर रक्सी पिए। रक्सीले टिल्ल भएका गुणराजलाई अर्का साथी इन्द्रजित यादवको घरमा पुर्याएर शिवकुमार आफ्नो घरतर्फ निस्किए।
गुणराज पनि धेरैबेर इन्द्रजितको घरमा बसेनन्। केही समय इन्द्रजितको घरमा बसेपछि आफ्नै घर जाने भन्दै गुणराज बाहिरिए। तर घर उनी घर पुगेका थिएनन्। गुणराज हराएको सूचना जिल्ला प्रहरी कार्यालय सुनसरीसम्म पुगेको थियो।
‘मान्छे हराएको भन्दै जानकारी आएपछि सुरुदेखि नै हामीले सिरियस्ली हेरेका थियौं। इन्द्रजितको घर नजिक बारीमा रगत भेटिएपछि अनुसन्धान साँघुरिँदै गयो,’ सुनसरीका प्रहरी प्रमुख एसपी कमल थापाले नेपाल लाइभसँग भने।
गुणराज हराएको भोलिपल्ट ३० गते स्थानीय मानिसले धानबारीमा रगत देखेको भन्दै प्रहरीमा खबर गरेका थिए। त्यसपछि डिएसपीको कमाण्डमा रगत देखिएको भनिएको ठाउँमा गएर प्रहरीले अनुसन्धान सुरु गरेको थियो।
इन्द्रजितको घरदेखि करिब ३ सय मिटर पर घन्सी बारीमा लुकेर बसेको अवस्थामा भोक्राहा नरसिंह गाउँपालिका–७ का ४२ वर्षीय दिनेश महतो, २० वर्षीय पप्पु राम, १९ वर्षीय शिव कुमार मेहता, १९ वर्षीय दीपक कुमार यादव र १९ वर्षीय प्रदीप रामलाई प्रहरीले पक्राउ गर्यो। अनुसन्धानपछि गुणराजको हत्यामा उनीहरु पाँचै जनाको संलग्न रहेको पाइएको एसपी थापाले बताए।
उनीहरुकै बयानका आधारमा गत साउन ३१ गते सोही गाउँपालिकास्थित सुनसरी खोलामा प्लास्टिकको बोराभित्र करिब ५० केजीको ढुंगासहित बोराको मुख बाँधेर खोलामा फालेको अवस्थामा गुणराजको शव फेला पर्यो।
हत्याको कारण भने युवतीसँगको प्रेम सम्बन्ध रहेको पाइएको एसपी थापाले जानकारी दिए। केटीको विषयमा उनीहरुबीच पटकपटक विवाद हुने गरेको, झगडा हुने र अन्तमा हत्यासम्मको योजना बनाएर गुणराजको हत्या गरेको देखिएको एसपी थापाले बताए।
उनीहरुले सुरुमा गुणराजको संवेदनशील अंग तथा टाउकोमा पालैपाले लात्ताले हाने। दिनेश मेहताले नजिकै रहेको गोरुगाडाको बाँस ल्याएर गुणराजको टाउकामा हिर्काए। उता शिवकुमारले भने नजिकै रहेको पानी तान्ने पम्पसेटको डोरी ल्याएको पेटमा बाँधेको प्रहरीसमक्ष बयान दिएका छन्।
प्रदीप, पप्पु र दीपक गरी तीन जना मिलेर हातखुट्टा बाँधी गुणराजको बिभत्स हत्या गरेको अनुसन्धानबाट खुलेको छ। हत्यापछि शव व्यवस्थापनका लागि दिनेशले आफ्नो घरबाट बोरा ल्याएका थिए। दिनेश ल्याएको 'बाबा चोकर'को बोरामा गुणराजको शव हालियो। त्यसपछि सबै जनाले शवलाई काँधमा पालैपाले बोकी घन्सीबारी र धानबारी हुँदै सुनसरी खोला किनारसम्म पुर्याएका थिए।
शवलाई यत्तिकै फाल्दा खोलामा तैरिने भन्दै उनीहरुले बोराभित्र करिब ५० किलोको ढुंगा समेत राखेर प्याक गरी फ्याँकेका थिए। खोला छेउको कल्भर्टमा प्रयोग भएको चेप्टो ठूलो ढुंगा शवसँगै उक्त बोराभित्र हालेर प्याक गरी मुखसमेत सिलाई खोलामा फालिएको अवस्थामा गुणराजको शव फेला परेको थियो।
घटनास्थलबाट प्लास्टिकको डोरी, चप्पल, पप्पुको हातमा लगाउने माला, प्रदीपको घाँटीमा लगाउने मालाका दानाहरु, मृतक गुणराजको औंठी, चोकरको बोरा, प्लास्टिकको डोरी, मृतकको झोला लगायतका सामान बरामद भएको छ।
पक्राउ परेका पाँचै जनाविरुद्ध कर्तव्य ज्यानको कसुरमा अनुसन्धान भइरहेको प्रहरीले जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1752126939.png)
-1752043710.jpg)
-1749826086.png)
