बेलायतको ठूलो बैंक एचएसबिसीले अवैध रकम सार्न सहयोग गरेकाे ‘फीनसेन फाइल्स’को खुलासा

विश्व

नेपाल लाइभ सोमबार, असोज ५, २०७७ ०७:४८

लण्डन–बेलायतकै सबैभन्दा ठूलो बैंक एचएसबिसी अवैध रकम ओसारपसारमा संलग्न रहेको खुलासा भएको छ।

बैंकहरुको शंकास्पद गतिविधिसम्बन्धी रिपोर्ट (सस्पिसियस एक्टिभिटी रिपोर्ट्स’ मा एचएसबिसीको उक्त संदिग्ध गतिविधिबारे उल्लेख गरिएको हो। सार्वजनिक भएको उक्त गोप्य दस्तावेजलाई ‘फीनसेन फाइल्स’ भनिएको छ।

उक्त दस्तावेजमा एचएसबिसीले घोटालामा संलग्नहरुलाई विश्वभर लाखौं डलर पठाउन दिएको उल्लेख गरिएको छ। बैंकले सन् २०१३ २०१४ मा आफ्नो अमेरिकी व्यवसायमार्फत् हङकङस्थित आफ्नो खातामा रकम सारेको थियो।

बैंकले भने त्यस्ता गतिविधिबारे जानकारी गराउने विषयमा सधैं आफ्नो कर्तव्य पूरा गरेको जनाएको छ। ‘फीनसेन फाइल्स’ का अनुसार अमेरिकामा सम्पत्ति शुद्धीकरणका विषयमा बैंकलाई १.९ अर्ब अमेरिकी डलर जरिवाना गरिएलगत्तै पछिल्लो घोटालासम्बन्धी गतिविधि सुरु भएको बताइएको छ। बैंकले यस्ता गतिविधि रोक्ने प्रतिबद्धता जनाएको थियो।

घोटालामा ठगिएकाहरुका वकिलहरुले त्यस्ता खाता बन्द गर्न बैंकले समयमै पहल गर्नुपर्ने बताएका थिए।

के हो फीनसेन फाइल्स ?
फीनसेन फाइल्स २६५७ दस्तावेजबारे खुलासा हो, जसमा २१०० शंकास्पद गतिविधि उल्लेख छन्। तर यी आफैंमा गलत कार्यको प्रमाण भने होइन। बैंकहरुले आफ्ना ग्राहकबारे शंका लागेको अवस्थामा ती दस्तावेजलाई नियमनकारी निकायलाई पठाउने गर्छन्। उनीहरु आफ्ना ग्राहकबारे जानकार हुनुपर्ने नियम पनि छ।

यसका साथै उनीहरुसँग आपराधिक गतिविधिबारे प्रमाण भए कारोबारमा रोक लगाउनुपर्ने हुन्छ । फीनसेन फाइल्सले अपराधीहरुले रकम लुकाउन कसरी गुमनाम ब्रिटिस कम्पनीहरुको प्रयोग गरेका थिए भन्ने देखाएको छ। ती दस्ताबेज ‘बजफिड्स’ वेबसाइटलाई दिइएको थियो।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।